- 14-21 قازان ارالىعىندا سەمەيدە بوكستان ەرلەر مەن ايەلدەر اراسىندا قازاقستان چەمپيوناتى وتەدى. اتالعان جارىستا رەسپۋبليكامىزدىڭ بارلىق وڭىرىنەن كەلگەن 370-تەن اسا بىلعارى قولعاپ شەبەرى كۇش سىناسادى. قاتىسۋشىلار World Boxing ۇيىمى بەكىتكەن سالماق دارەجەلەرى بويىنشا ونەر كورسەتەدى. بۇل باسەكەدەن تەك بيىل ليۆەرپۋلدە ۇيىمداستىرىلعان الەم چەمپيوناتىنان ولجالى ورالعان وعىلاندار عانا بوساتىلدى.
- قازاقستاننىڭ ءبىرىنشى راكەتكاسى ەلەنا رىباكينا قىتايدىڭ ۋحان قالاسىندا ءوتىپ جاتقان WTA ءتۋرنيرىنىڭ 1/8 فينالىندا چەحيالىق ليندا نوسكوۆادان 6:3, 6:4 ەسەبىمەن باسىم ءتۇستى. ەندى ول الەمدىك رەيتينگتىڭ كوشباسىندا تۇرعان بەلارۋس تەننيسشىسى ارينا سوبولەنكومەن شەبەرلىك بايقاسادى.
- باسكەتبولدان بيىلعى ەل چەمپيوناتىندا بەس كوماندا عانا باق سىنايدى. ولار – «الماتىنىڭ لەگيونى», «استانا», «توبىل», «كاسپي» جانە «اتىراۋدىڭ بارىسى». ال قالعان كلۋبتار قاراجات تاپشىلىعى سالدارىنان جارىسقا قاتىسۋدان باس تارتتى. سولاردىڭ قاتارىندا 2023–2024 جىلعى ماۋسىمنىڭ جەڭىمپازى – الماتىنىڭ «يربيس–الاتاۋى» دا بار.
- قۇرلىقتىق حوككەي ليگاسىندا (قحل) ونەر كورسەتىپ جۇرگەن «بارىس» چەليابىگە ساپار شەگىپ, جەرگىلىكتى «تراكتورمەن» كەزدەستى. باسەكە بارىسىندا ايدىن يەلەرى اراسىنان اندرەي سۆەتلاكوۆ پەن الەكساندر كادەيكين نىسانانى ءدال كوزدەسە, قوناقتاردىڭ ساپىنان ماكسيم مۇحامەتوۆ پەن سەميون سيمونوۆ مەرگەندىك تانىتتى. قوسىمشا ۋاقىت تەڭ اياقتالىپ, ويىن وۆەرتايمعا ۇلاستى. بۇل رەتتە «تراكتوردىڭ» جولى بولدى. ەسەپ – 3:2.
- سۋ دوبىنان ءۇندىستاندا ءوتىپ جاتقان ازيا چەمپيوناتى ناعىز قىزعان شاعىنا جەتتى. ۆاتەرپولدان ەلىمىزدىڭ ايەلدەر قۇراماسى شيرەك فينالدا سينگاپۋردى (10:7) سان سوقتىرسا, ەرلەر وزبەكستاننىڭ (27:11) تاس-تالقانىن شىعاردى. ەندى جارتىلاي فينالدا قازاقستاننىڭ قوس كومانداسى دا قىتاي قۇراماسىمەن كەزدەسەدى.
