شىعىس وڭىرىنە كورەيادان بىلىكتى دارىگەرلەر كەلىپ, ءبىر اپتا ىشىندە 800-دەن استام ادامعا مەديتسينالىق قىزمەت كورسەتتى. دارىگەرلىك قىزمەت كورسەتۋ بارىسىندا شىعىسقازاقستاندىق تۇرعىندار وتباسىلىق دارىگەرلەر مەن سيرەك كەزدەسەتىن بىلىكتى مامانداردىڭ قابىلداۋىندا بولدى. ايتالىق, ەنسە ۋنيۆەرسيتەتىنىڭ «كانگنام سەۆەرانس» ەمحاناسىنىڭ ايتۋلى ماماندارى ءۇش كۇن بويى تۇرعىنداردى قابىلدادى. ولار وزدەرىمەن بىرگە ۋزي, ەكگ, ەحو جانە تالداۋ ناتيجەسىن 7 مينۋتتىڭ ىشىندە شىعارىپ بەرەتىن بيوحيميالىق قان تالداۋ اپپاراتتارىن الىپ كەلىپ, كوپتەگەن ءدارى-دارمەك پەن دارۋمەندەردى تەگىن تاراتتى. وسىلايشا, ەكىجاقتى ارىپتەستىك جونىندەگى مەموراندۋمعا سايكەس, وڭتۇستىك كورەيالىق ماماندار وسكەمەندە 150 ادامدى, كاتونقاراعاي اۋدانىندا 200 ادامدى, ال ۇلكەن نارىن اۋىلىندا 300 ادامدى تەكسەرۋدەن وتكىزدى. كاتونقاراعاي اۋدانىندا كورەيالىق دارىگەرلەر 5-6 جاستاعى ەكى بالاعا دەمەۋشىلەردىڭ كومەگىمەن ءوز ەمحانالارىندا وتا جاسايتىندىقتارىن جەتكىزدى. قازىرگى كەزدە بالالاردى «كانگنام سەۆەرانس» ەمحاناسىنا شاقىرۋ ماسەلەلەرى شەشىلىپ جاتىر.
ايتا كەتكەن ابزال, اتالعان كەلىسىم ارقىلى حالىققا مەديتسينالىق كومەك كورسەتۋ شەڭبەرىندە ەكىجاقتى ارىپتەستىك پەن تاجىريبە الماسۋ, بىرلەسكەن كونفەرەنتسيالار, سەمينارلار وتكىزۋ, ساراپشىلاردىڭ كەزدەسۋىن ۇيىمداستىرۋ سىندى شارالار قاراستىرىلعان بولاتىن.
دۋمان اناش, «ەگەمەن قازاقستان».
شىعىس قازاقستان وبلىسى.
