باسقوسۋدا ەلىمىزدىڭ دەنساۋلىق ساقتاۋ جۇيەسىندەگى وزەكتى ماسەلەلەر ورتاعا تاستالدى. ەكى كۇنگە جالعاساتىن فورۋمعا 300-دەن استام ادام قاتىستى. ولاردىڭ قاتارىندا حالىقارالىق جانە وتاندىق جەتەكشى ساراپشىلار, مەديتسينالىق ۇيىمداردىڭ باسشىلارى, ەۋروپالىق دەنساۋلىق ساقتاۋ مەنەدجەرلەرى قاۋىمداستىعىنىڭ (EHMA) پرەزيدەنتى, مەديتسينا عىلىمدارىنىڭ دوكتورى (MD), يسپانياداعى CASAP (Consorci Castelldefels Agents de Salut) ۇيىمىنىڭ باسشىسى انتوني پەريس, ددسۇ ەۋروپالىق العاشقى مەديتسينالىق-سانيتارلىق كومەك ورتالىعىنىڭ جەتەكشىسى مەليتتا ياكوب, پارلامەنت ءماجىلىسىنىڭ دەپۋتاتى اسحات ايماعامبەتوۆ, دەنساۋلىق ساقتاۋ ءبىرىنشى ۆيتسە-ءمينيسترى تيمۋر سۇلتانعازيەۆتار بولدى.
فورۋم بارىسىندا دەنساۋلىق ساقتاۋ جۇيەسىن دامىتۋدىڭ نەگىزگى باعىتتارى قاراستىرىلدى. العاشقى مەديتسينالىق-سانيتارلىق كومەككە قاتىستى ماسەلەلەر تالقىلاندى. سالانىڭ تسيفرلىق ترانسفورماتسياسىنا نازار اۋدارىلدى. ونىڭ ىشىندە يننوۆاتسيالاردى ەنگىزۋ, دەرەكتەردى پايدالانۋ جانە جاساندى ينتەللەكتتى قولدانۋ ماسەلەلەرى تالقىلاندى. فورۋمعا قاتىسۋشىلار دەنساۋلىق ساقتاۋدى باسقارۋدا ادامي كاپيتالدى دامىتۋ, مەديتسينالىق كومەكتىڭ ساپاسىن ارتتىرۋ جانە پاتسيەنتتەردىڭ قاۋىپسىزدىگىن قامتاماسىز ەتۋ, سونداي-اق العاشقى مەديتسينالىق-سانيتارلىق كومەكتى قارجىلاندىرۋ تەتىكتەرىن قاراستىردى.
فورۋمنىڭ اشىلۋىندا قازاقستاندىق دەنساۋلىق ساقتاۋ مەنەدجەرلەرى قاۋىمداستىعىنىڭ توراعاسى ءارى نەگىزىن قالاۋشىسى قۋانىش ەرعاليەۆ بىلاي دەدى:
«پرەزيدەنت قاسىم-جومارت توقاەۆ جولداۋدا اتاپ وتكەندەي, جاساندى ينتەللەكت پەن تسيفرلىق ترانسفورماتسيا – دەنساۋلىق ساقتاۋ بولاشاعىنىڭ اجىراماس بولىگى. جي ەنگىزۋ ارقىلى دياگنوستيكا, تالداۋ, شەشىم قابىلداۋدا جاڭا مۇمكىندىكتەر تۋادى. ەڭ باستىسى – مەديتسينالىق كومەكتى قولجەتىمدى ەتەدى. الايدا, ءبىز تۇسىنگەنىمىزدەي, تەحنولوگيا ادامدى الماستىرمايدى. ول ونىڭ الەۋەتىن كۇشەيتەدى. سوندىقتان دەنساۋلىق ساقتاۋ مەنەدجەرلەرىنىڭ قۇزىرەتتەرى اسا ماڭىزدى بولا تۇسۋدە. بەيىمدەلە ءبىلۋ, جەدەل شەشىم قابىلداۋ, وزگەرىستەردى الدىن الا بولجاي ءبىلۋ, كوماندالاردى باسقارۋ – مۇنىڭ ءبارى ورنىقتى جۇيەنىڭ بەرىك نەگىزىن قالايدى», دەدى قۋانىش ەرعاليۆ.
ىزىنشە, ددۇ-نىڭ ەۋروپالىق العاشقى مەديتسينالىق-سانيتارلىق كومەك ورتالىعىنىڭ باسشىسى مەليتتا ياكوب العاشقى مەديتسينالىق-سانيتارلىق كومەكتى دامىتۋعا ينۆەستيتسيا سالۋدىڭ قاجەتتىگىن اتاپ ءوتتى. ول مەديتسيناداعى تەڭسىزدىكتى جويۋ ءۇشىن تسيفرلىق قۇرالدار مەن جاساندى ينتەللەكتىنى قولدانۋدىڭ, كومەك كورسەتۋدىڭ, كادرلىق الەۋەتتى نىعايتۋدىڭ جانە دەنساۋلىق ساقتاۋدى باسقارۋعا قاۋىمداستىقتاردىڭ قاتىسۋىن كەڭەيتۋدىڭ ماڭىزىن ايتتى. سول سەكىلدى ەۋروپالىق دەنساۋلىق ساقتاۋ مەنەدجەرلەرى قاۋىمداستىعىنىڭ (EHMA) پرەزيدەنتى, دوكتور انتوني پەريس دەنساۋلىق ساقتاۋ جۇيەلەرىنىڭ نەگىزگى سىن-قاتەرلەرىن اتاپ ءوتتى. ونىڭ ىشىندە حالىقتىڭ قارتايۋى, كادر تاپشىلىعى, الەۋمەتتىك سۇرانىستاردىڭ ءوسۋى جانە پسيحيكالىق دەنساۋلىق ماسەلەلەرىنىڭ كوبەيۋى سىندى تارماقتار بار.
