بالاباقشانىڭ ءباسىن ارتتىرعان
«دامۋ» قورى – شاعىن جانە ورتا بيزنەس سۋبەكتىلەرىن قارجىلاي قولداۋ ماقساتىندا قۇرىلعان ينستيتۋت. مەملەكەت قوردىڭ كومەگىمەن ىسكەر ازاماتتارعا ءوز كاسىبىن دامىتۋعا قولداۋ كورسەتەدى. شىمكەنت قالاسىندا بۇگىندە شاعىن جانە ورتا بيزنەس سۋبكتىلەرىنىڭ سانى ارتىپ كەلەدى. ولاردىڭ ىشىندە قوردىڭ قارجىلاي كومەگىنە جۇگىنەتىندەر جىلدان-جىلعا ءوسىپ وتىر. كاسىپكەرلەردى نەگىزىنەن پايىزى تومەن نەسيە نەمەسە كەپىل م ۇلىكپەن قامتاماسىز تەتىگى قىزىقتىرادى. كاسىپكەرلىك نىسانداردىڭ كوبەيۋى, ولاردىڭ قور ۇسىنعان جەڭىلدىككە ۇمتىلۋى مەگاپوليستە بيزنەس سالاسى وركەن جايىپ كەلە جاتقانىن بىلدىرەدى.
وسىنداي مەملەكەت جەڭىلدىگىن پايدالانعانداردىڭ ءبىرى – «ساۋران» بالاباقشاسى. شاھاردىڭ تۇران شاعىن اۋدانىندا ورنالاسقان, مەكتەپكە دەيىنگى تاربيە بەرەتىن مەكەمە وسى اۋماقتاعى جالعىز بالاباقشا بولعاندىقتان, بالا سانى كوپ. قازىر مۇندا 220 بالا تاربيەلەنىپ جاتىر. بالاباقشا مەڭگەرۋشىسى زاۋرە وڭعاروۆانىڭ ايتۋىنشا, مەكەمە العاشىندا 75 ورىنعا ارنالىپ اشىلعان. كەيىن كەلە سۇرانىستىڭ ارتۋىنا بايلانىستى جانىنان قوسىمشا ۇلكەن عيمارات سالىندى. كاسىپكەرلىك نىسان ءوز بيزنەسىن كەڭەيتۋ ماقساتىندا «دامۋ» قورىنا ءوتىنىش جاسادى. ءسويتىپ, ەكى رەت قولداۋ قاراجاتىن الدى. العاشقى ينۆەستيتسيالىق قارجىنى ەسكى عيماراتتى قايتا جوندەۋگە, كەرەكتى قۇرال-جابدىقتار الۋعا جۇمساعان. «دامۋ» قورىنىڭ ماماندارى بيىل مەكەمە باسشىلىعىنا قوسىمشا عيمارات قۇرىلىسىنا قاجەتتى قاراجاتتى قاراستىرۋعا بولاتىنىن ايتىپ كەڭەس بەرگەن. سول تۇرعىدا بالاباقشا قۇرىلتايشىسى «بانكتسەنتركرەديت» قارجى ۇيىمىنا نەسيە الۋعا ءوتىنىش بىلدىرەدى. ءوتىنىش ماقۇلدانىپ, قوردىڭ «ورلەۋ» باعدارلاماسى اياسىندا 12,6%-بەن بالاباقشانىڭ جاڭا جوباسىنا نەسيە بەرىلەدى. سونداي-اق «كەپىلدىك قور-1» باعدارلاماسىمەن قور كەپىل م ۇلىكتى قامتاماسىز ەتەدى. سونىڭ ناتيجەسىندە كاسىپكەرگە قوسىمشا جاڭا عيمارات سالۋعا, ءىشىن كەرەكتى قۇرال-جابدىقتارمەن تولتىرۋعا مۇمكىندىك تۋدى. ەكىنشى ينۆەستيتسيالىق نەسيە 240 ملن تەڭگە قاراجاتتى قۇرادى. نەسيە سوماسىن تولىق وتەپ ءبىتۋ مەرزىمى – 7 جىل. پايىزى تومەن نەسيە, ونى وتەۋ مەرزىمىنىڭ ۇزاقتاۋ بولۋى كاسىپكەرگە مەملەكەت ۇسىنعان ۇلكەن كومەك دەيدى ماماندار. سوندىقتان وسىنداي جەڭىلدىك پەن جاردەمدى بيزنەس وكىلدەرى ءوز پايداسىنا بارىنشا پايدالانىپ قالعاندارى ءجون.
«ساۋران» بالاباقشاسى 2023 جىلى اشىلعان. باستاپقىدا جەتپىستەن استام بالانى قابىلدادىق. بالاباقشا ورنالاسقان تۇران شاعىن اۋدانىندا بىزدەن باسقا ازىرگە ەشقانداي بالاباقشا جوق. سوندىقتان ماڭايدا تۇراتىن اتا-انالار الىسقا سابىلماي بالالارىن بىزگە اكەلەدى. سونىڭ ناتيجەسىندە ءبىر-ەكى جىل ىشىندە بالا سانى كۇرت كوبەيىپ, عيمارات تارشىلىق ەتە باستادى. سودان سوڭ باسشىلىق ەسكى بالاباقشا جانىنان قوسىمشا ۇلكەن زاماناۋي عيمارات سالۋدى ۇيعاردى. «دامۋ» قورىنان الىنعان قوماقتى قاراجاتقا بيىل ءزاۋلىم عيماراتتىڭ قۇرىلىسى اياقتالىپ, ءىشى كەرەكتى قۇرالدارمەن تولىق جابدىقتالدى. بالالاردىڭ ەمىن-ەركىن دامۋىنا قازىر بارلىق جاعداي جاسالعان. بالاباقشادا توعىز توپ جۇمىس ىستەيدى. ءار توپتىڭ ءوز تاربيەشىسى مەن تاربيەشىنىڭ كومەكشىسى بار. ودان بولەك, بالالاردىڭ تازالىعىنا جاۋاپ بەرەتىن كۇتۋشىلەر, تاماعىن ازىرلەيتىن اسپازدار, دەنساۋلىعىنا قارايتىن مەديتسينا ماماندارى قىزمەت اتقارادى. جالپى سانى مەكەمەدە وتىزدان استام قىزمەتكەر ەڭبەك ەتەدى. ولاردىڭ ءبارى دە بىلىكتى ماماندار. تاربيەشىلەردى جۇمىسقا الاردا ديپلومى مەن ەڭبەك وتىلىنە, تاجىريبەسىنە اسا قاتتى ءمان بەرەمىز. مۇندا بالالارعا قازاق, ورىس تىلدەرىندە ساباق وتكىزىلەدى. ولاردىڭ فيزيكالىق, شىعارماشىلىق دامۋىنا بار مۇمكىندىكتەر قاراستىرىلعان. ماسەلەن كاراتە ساباعىندا تاربيەلەنۋشىلەر جاتتىعۋلار ارقىلى دەنەسىن شيراتىپ, وسى سپورت ءتۇرىنىڭ قاراپايىم تاسىلدەرىن ۇيرەنىپ شىعادى. ول كەلەشەكتە بالانىڭ ءوزىن-ءوزى قورعاۋىنا دا ۇلكەن كومەگىن تيگىزۋى مۇمكىن. بالادا فيزيكالىق مۇمكىندىك ارتسا, ەرتەڭگى كۇنى ءوز-وزىنە دەگەن سەنىمدىلىك تە كۇشەيەدى. سونىمەن بىرگە لوگوپەد سەكىلدى مامانداردى دا جۇمىسقا الدىق. ولار بالدىرعانداردىڭ ءتىل مۇكىستىگىن قالپىنا كەلتىرۋمەن اينالىسادى. بۇگىندە مۇنداي ماماندار قوعامدا ۇلكەن سۇرانىسقا يە بولىپ وتىر. سەبەبى قازىردە ءتىلى دۇرىس شىقپاعان, انىق سويلەي المايتىن بالالار كوبەيىپ بارادى. سولارمەن جۇمىس ىستەپ, ءتىلىن جونگە كەلتىرۋ ماقساتىندا وسىنداي لوگوپەد مامانداردى ارنايى جۇمىسقا تارتىپ وتىرمىز. كوپ اتا-انانىڭ بالاسىن لوگوپەدكە اپارۋعا قولى تيمەيدى. بۇل جەردە ماماندار بالاباقشانىڭ وزىنەن تابىلىپ تۇر. جالپى, «دامۋ» قورىنىڭ قولداۋى – قارجىلىق قۇرال عانا ەمەس, سونىمەن بىرگە وڭىرلىك ەكونوميكانىڭ دامۋىنا قوسقان ۇلەس. سوندىقتان قور قىزمەتىن شىمكەنت قالاسىنىڭ كاسىپكەرلەرى ءۇشىن ءوسۋ مەن جاڭعىرۋدىڭ, باسەكەگە قابىلەتتىلىكتى ارتتىرۋدىڭ ناقتى مۇمكىندىگى دەپ قابىلدايمىن», دەدى بالاباقشا مەڭگەرۋشىسى ز.وڭعاروۆا.
مەتالل قۇرىلىمدارى سۇرانىسقا يە
«بايتەرەك» ۇلتتىق باسقارۋشى حولدينگىنىڭ ەنشىلەس ۇيىمى «دامۋ» كاسىپكەرلىكتى دامىتۋ قورى» اق كاسىپكەرلەرگە ءۇش نەگىزگى قۇرال ارقىلى مەملەكەتتىك قولداۋ كورسەتەدى. قوردىڭ شىمكەنت قالاسى بويىنشا فيليالىنداعى باعدارلامالاردى ىلگەرىلەتۋ ءبولىمىنىڭ باسشىسى سابىرجان يساقوۆتىڭ ايتۋىنشا, نەگىزگى ءۇش قۇرالعا جەڭىلدەتىلگەن قارجىلاندىرۋ, كەپىل جەتكىلىكسىز بولعان جاعدايدا نەسيەگە كەپىلدىك بەرۋ, پايىزدىق مولشەرلەمەنىڭ ءبىر بولىگىن سۋبسيديالاۋ تەتىكتەرى كىرەدى. بيىل «دامۋ» قورى اۋقىمدى ترانسفورماتسيادان ءوتتى. بۇل رەتتە كاسىپكەرلەرگە بۇرىننان كورسەتىلىپ كەلە جاتقان قولداۋ تۇرلەرى ساقتالىپ قالدى. دەگەنمەن ىشكى قۇرىلىمىندا ءبىراز وزگەرىستەر بولدى. ەندى قوردىڭ جۇمىسى تيىمدىرەك بولا ءتۇستى. ءارى نەسيەنى قاراستىرۋ ۋاقىتى جىلدامىراق جۇرە باستادى. ءبىر سوزبەن ايتقاندا, «دامۋ» قورى قولداۋدىڭ نارىقتىق ەمەس تەتىكتەرىنەن بىرتىندەپ الشاقتاپ ورنىقتى, ۇزاقمەرزىمدى شارالارعا كوشۋگە دەن قويدى.
«بيىل ماۋسىم ايىندا «ورلەۋ» جەڭىلدەتىلگەن نەسيەلەندىرۋ باعدارلاماسى ىسكە قوسىلدى. بۇل قۇرال پايىزدىق مولشەرلەمەنى سۋبسيديالاۋعا ءتيىمدى بالاما بولۋعا ءتيىس. ودان بولەك, كاسىپكەرلەرگە قارجىلاندىرۋدى كىدىرىسسىز الۋعا مۇمكىندىك بەرەدى. باعدارلاما شارتىنا كەلسەك, نەسيە مەرزىمى 10 جىلعا دەيىنگى مەرزىمدى قۇرايدى, بەكىتىلگەن پايىزدىق مولشەرلەمە 12,6 پايىزعا تەڭ. شىمكەنت قالاسىندا وسى باعدارلاما اياسىندا جىل باسىنان بەرى جالپى نەسيە سوماسى 24,6 ملرد تەڭگەنى قۇرايتىن 38 جوبا قولداۋ تاپتى. بيىل مەملەكەت باسشىسى
قاسىم-جومارت توقاەۆتىڭ تاپسىرماسىمەن قۇنى 7 ملرد تەڭگەگە دەيىنگى, 7 ملرد تەڭگەدەن جوعارى جوبالارعا ارنالعان ەكى كەپىلدىك قورى ىسكە قوسىلدى. بۇدان بىلاي كاسىپكەردە كەپىل مۇلكى جەتكىلىكسىز بولعان جاعدايدا «دامۋ» قورى 7 ملرد تەڭگەگە دەيىنگى جوبالارعا نەبارى 2 جۇمىس كۇنى ىشىندە كەپىلدىك قويىپ بەرە الادى. وسىنىڭ ءبارى پورتفەلدىك كەپىلدەندىرۋ تەتىگىنىڭ ارقاسىندا ىسكە اسادى. كەپىلدىك نەسيەگە, ليزينگتىك كەلىسىمدەرگە, شارتتاردى ورىنداۋعا بەرىلەدى. بىراق نەسيە سوماسىنىڭ 85 پايىزىن قۇراۋعا ءتيىس جانە 3,5 ملرد تەڭگەدەن اسپايتىن كولەمدە بولۋ كەرەك. شىمكەنت قالاسىندا 2025 جىلدىڭ 9 ايىندا كەپىلدىك بەرۋ باعىتىندا جالپى سوماسى 8,5 ملرد تەڭگەنى قۇرايتىن 90 جوبا قولداۋ تاپتى. ونىڭ ىشىندە ءبىرىنشى كەپىلدىك قورى اياسىندا جالپى قۇنى 5,9 ملرد تەڭگە بولاتىن 52 جوبا ماقۇلداندى. سونىمەن قاتار جىل باسىنان بەرى «دامۋ» قورى سۋبسيديالاۋ قۇرالى ارقىلى جالپى نەسيە پورتفەلى 26,7 ملرد تەڭگەنى قۇرايتىن وڭىردەگى 154 جاڭا جوباعا قولداۋ كورسەتتى. وسى قارجى ارقىلى شاعىن جانە ورتا بيزنەس وكىلدەرى ءوز كاسىبىن دامىتىپ, تابىستى مەكەمەگە اينالدى. قوردىڭ باستى ماقساتى دا سول شاعىن جانە ورتا بيزنەس سۋبەكتىلەرىنە قارجىلاي كومەك بەرىپ, ەلدىڭ تۇتاستاي ەكونوميكالىق ورلەۋىنە ءوز ۇلەسىن قوسۋ», دەدى «دامۋ» قورىنىڭ باعدارلامانى قارجىلاندىرۋ دەپارتامەنتىنىڭ ديرەكتورى الىشەر امانشاەۆ.
ءباسپاسوز تۋرى بارىسىندا باق وكىلدەرى «اق-سۋ كورپوراتسياسىندا» بولدى. سەرىكتەستىك قۇرىلىسقا قاجەتتى ءارتۇرلى مەتالل قۇرىلىمدارىن شىعارادى. 2025 جىلدىڭ باسىندا كومپانيا مەملەكەتتىڭ «بىرىڭعاي كەشەندى باعدارلاماسىنا» قاتىسىپ, جابدىق ساتىپ الۋ مەن اينالىم قاراجاتىن تولىقتىرۋعا ەكىنشى دەڭگەيلى بانك «بانك تسەنتركرەديت» قارجى ۇيىمىنان نەسيە قاراجاتىن العان بولاتىن. نەسيەلىك قارىز اقشانىڭ 18 پايىزدىق جىلدىق ۇستەمەاقىسىنىڭ 10 پايىزىن «دامۋ» قورى سۋبسيديالايدى. سوندىقتان كاسىپورىن ءۇشىن بۇل وندىرىستىك مۇمكىندىكتەردى كەڭەيتۋدەگى ماڭىزدى قادام. سونداي-اق تامىز ايىندا كومپانيا «ورلەۋ» باعدارلاماسى ارقىلى تاعى دا جەڭىلدەتىلگەن قارجىلاندىرۋعا يە بولىپ, 12,6 پايىزبەن اينالىم قاراجاتىن تولىقتىردى. وسىلايشا, ارزان نەسيە ءوندىرىس ورنىن باسەكەلەستىككە توتەپ بەرگىزىپ, سۇرانىسقا ساي جاڭا ونىمدەر شىعارۋىنا سەپتىگىن تيگىزدى.
سەرىكتەستىك باسشىسىنىڭ ورىنباسارى داۋرەن تىلەۋباەۆتىڭ ايتۋىنشا, كاسىپورىن 1999 جىلدان بەرى ەلىمىزدىڭ قۇرىلىس ماتەريالدارى نارىعىندا ءونىم ءوندىرىپ كەلەدى. وسى ۋاقىتقا دەيىن سەرىكتەستىك شىعارعان مەتالل قۇرىلىمدارى كليەنتتەر تاراپىنان ۇلكەن سەنىمگە يە بولدى. سول تۇرعىدا كاسىپورىندى شاھارداعى قۇرىلىس ماتەريالدارى سالاسىنداعى جەتەكشى ءوندىرىس ورىندارىنىڭ ءبىرى دەۋگە تولىق نەگىز بار. وسى مەرزىم ارالىعىندا كاسىپورىن ساپالى ءونىم شىعارۋ ارقىلى ءوزىنىڭ برەندتىك اتاۋىن قالىپتاستىرىپ ۇلگەردى. سونىمەن قاتار جاڭا تەحنولوگيالار مەن ونىمدەردى يگەرىپ, دامۋدىڭ قارقىندى جولىنا قادام باسىپ كەلەدى. كومپانيانىڭ نەگىزگى باعىتى – كەز كەلگەن كۇردەلىلىكتەگى مەتالل بۇيىمدارى مەن كونسترۋكتسيالارىن شىعارۋ. جاسالعان ونىمدەردى ساتۋ ىسىمەن دە كاسىپورىننىڭ ءوزى اينالىسادى. ونىمدەر قاتارىندا پروفناستيل, ياعني مەتال جابىنى, مەتالدان جاسالعان چەرەپيتسا, تەگىس تاباق, رابيتسا تورى, باسقا دا ءتۇرلى قوسىمشا بۇيىمدار بار. سونىمەن قاتار كومپانيا كوركەم پلازمالىق مەتالل كەسۋ مەن ەنەرگيا قۇرىلعىلارىن جوندەۋ قىزمەتتەرىن دە قوسا اتقارادى. قىسقاشا ايتقاندا, كومپانيا يدەيادان دايىن ونىمگە دەيىنگى تولىق وندىرىستىك تسيكلدى ءبىر ءوزى جۇزەگە اسىرادى.
«دامۋ» قورىنىڭ «ورلەۋ» باعدارلاماسى ارقىلى 160 ملن تەڭگە نەسيە الدىق. نەسيەنىڭ پايىزدىق مولشەرلەمەسى – 12,6 پايىز. مۇنداي جەڭىلدەتىلگەن نەسيە قاراجاتى بىزگە وتە ءتيىمدى. نارىقتا 25 جىلدان استام ۋاقىت بويى جۇمىس ىستەپ كەلەمىز. قۇرىلىس ماتەريالدارىن, مەتالل قۇرىلىمدارىن شىعارامىز. ول بۇگىنگى تاڭدا قۇرىلىس سالاسىنا وتە كەرەكتى دۇنيە سانالادى. «دامۋدىڭ» قاراجاتىنا مەتال جابىنى مەن سەندۆيچ پانەلدەر شىعاراتىن ستانوكتار ساتىپ الدىق. تاعى ءبىر ۇلكەن قوندىرعىعا تاپسىرىس بەرىپ قويدىق. بىزدەگى ءوندىرىس التى ءتۇرلى باعىتقا نەگىزدەلگەن. مەتال جابىندارىنىڭ قالىڭدىعى مەن تولقىن پىشىنىنە قاراي 6-7 نۇسقاسىن وندىرەمىز. ءاربىر ءتۇرى بولەك-بولەك ستانوكتا جاسالادى. بۇل قوندىرعىلاردى رەسەي مەن قىتايدان الدىردىق. شيكىزات – مەتالدىڭ ءوزى قاراعاندى ءوڭىرى مەن رەسەي ەلىنەن كەلەدى. «دامۋ» قارجىسىنا الىنعان قوندىرعىلاردى ورناتىپ جاتىرمىز. ولار ىسكە قوسىلعان جاعدايدا ءوندىرىس اۋقىمى تاعى دا بىرنەشە ەسە ۇلعايا تۇسەدى. جاڭا ستانوكتاردى كەلەسى جىلدىڭ كوكتەمىنە دەيىن ورناتىپ بىتەمىز دەپ جوسپارلاپ وتىرمىز. قۇرىلىس نارىعىندا سەندۆيچ پانەلدەر وتە جوعارى سۇرانىسقا يە. وسى قۇرىلىمنىڭ كومەگىمەن ءمودۋلدى عيماراتتار سوعۋعا ىڭعايلى ءارى جىلدام قالانادى. سەندۆيچ پانەلدىڭ ەكى جاعى مەتال جابىننان قۇرالسا, ءىشى جىلۋ ۇستاعىش ماتەريالمەن تولىقتىرىلادى. سوندىقتان وسى قۇرىلىممەن عيمارات تۇرعىزىلعاندا قوسىمشا جىلۋ ساقتاعىش ماتەريالمەن قاپتاپ اۋرە بولمايسىز. ءبىر عانا قۇرىلىممەن ەكى جۇمىس بىردەي اتقارىلادى. ونىڭ قۇرىلىستاعى ءارى ەكونوميكالىق تيىمدىلىگى جوعارى بولعاندىقتان كوپتەگەن كومپانيا عيمارات سالۋدا وسى ادىسكە كوشىپ جاتىر. سولاردىڭ سۇرانىسىن قاناعاتتاندىرۋ ماقساتىندا سەندۆيچ پانەل ءوندىرىسىن قولعا الۋدى ۇيعاردىق. «دامۋدىڭ» كومەگىنە ارقا سۇيەپ, ءتيىستى ستانوكتار ساتىپ الدىق. قازىر مونتاجداۋ, ورناتۋ جۇمىستارىنا كىرىسىپ جاتىرمىز. وتكەن جىلى دا قوردان نەسيە قاراجاتىنا قول جەتكىزگەن ەدىك. وعان دا سىرتقى قورشاۋعا ارنالعان سىمدى تور شىعاراتىن ستانوك ساتىپ اكەلدىك. ونىمدەرىمىز ەلىمىزدىڭ نارىعىنا شىعارىلادى. شىمكەنتتە بىرنەشە فيرمالىق دۇكەنىمىز بار. بىراق نەگىزىنەن جاسالعان دۇنيەنىڭ كوپ بولىگى تاپسىرىس ارقىلى مەردىگەر كومپانيالارعا ساتىلادى. كورشىلەس وزبەكستان ەلىنە دە ونىمدەرىمىزدىڭ ازعانتاي بولىگىن جونەلتىپ كوردىك. ءوندىرىس اۋقىمى كەڭەيگەن جاعدايدا باسقا دا شەتەل نارىقتارىن يگەرسەك دەگەن ويىمىز بار. كاسىپورىندا جۇزگە جۋىق ادام جۇمىس ىستەيدى. ولاردىڭ اراسىندا سلەسار, توكار, دانەكەرلەۋشى سەكىلدى ەڭ قاجەتتى ماماندىق يەلەرى دە بار. سونىمەن قاتار شاھارداعى كاسىپتىك-تەحنيكالىق كوللەدجدەرمەن دە جاقسى بايلانىستامىز. ارناۋلى وقۋ ورنىنىڭ ستۋدەنتتەرى وسى جەرگە كەلىپ, وندىرىستىك ءىس-تاجىريبەدەن ءوتىپ تۇرادى. ءبىزدىڭ قىزمەتكەرلەر بولاشاق ماماندارعا ستانوكتا قالاي جۇمىس ىستەۋ كەرەكتىگىن, تەحنيكالىق قاۋىپسىزدىكتى ساقتاۋدىڭ ماڭىزدىلىعىن ۇيرەتەدى. جاستار وسىنداي كاسىپورىنداردا شىڭدالعانى دۇرىس», دەدى د.تىلەۋباەۆ.
مەديتسينالىق قۇرال-جابدىقتاردىڭ قالىپتى ءوندىرىسى
«دامۋ» قورىنىڭ وكىلى الىشەر امانشاەۆتىڭ ايتۋىنشا, بيىل قارجى ينستيتۋتى رەسپۋبليكا كولەمىندە 750 ملرد تەڭگە جەڭىلدەتىلگەن نەسيە تاراتۋعا ءتيىس. رەيتينگ بويىنشا قوردان قاراجات الىپ كاسىبىن دوڭگەلەتكەن وڭىرلەر اراسىندا شىمكەنت الماتى مەن استانا قالالارىنان كەيىنگى ورىندا تۇر. سونداي-اق قوردىڭ «ورلەۋ» باعدارلاماسى بويىنشا 7 ەكىنشى دەڭگەيلى بانك نەسيە بەرەدى. «دامۋ» نەگىزىنەن دەنساۋلىق, ءبىلىم, ءوندىرىس, كولىك-لوگيستيكا, اۋىل شارۋاشىلىعى, قايتا وڭدەۋ, تاماقتانۋ, قوناقۇي سالالارىنداعى بيزنەس يدەيالار مەن باستامالارعا باسىمدىق بەرەدى. سونىمەن قاتار «دامۋ» قورى ۇلتتىق دامۋ ينستيتۋتى بولعاندىقتان, ەلىمىزدىڭ بارلىق وڭىرلەرىندەگى شاعىن جانە ورتا بيزنەستىڭ قارقىندى دامۋىنا جاردەمدەسەدى. بۇل ەكونوميكاعا ايتارلىقتاي سەرپىن بەرەدى. ايتالىق, شىمكەنت قالاسىندا 2010–2024 جىلدار ارالىعىندا مەملەكەتتىك قولداۋ العان كاسىپكەرلەردىڭ قاتىسۋىمەن 11,7 مىڭ جاڭا جۇمىس ورنى اشىلعان. ولار بيۋدجەتكە 359,7 ملرد تەڭگە سالىق تولەگەن. قور قىزمەتى كۇشەيگەن سايىن ەكونوميكاعا تيگىزەر پايداسى دا ارتا بەرەدى.
قور قاراجاتىنا ءوندىرىسىن دامىتقان كاسىپورىننىڭ ءبىرى – «QMP Qazmedpribor» جشس. باق وكىلدەرى ءباسپاسوز تۋرى اياسىندا وسى ءبىر ماڭىزدى كاسىپورىننىڭ جۇمىسىمەن جاقىنىراق تانىستى. سەرىكتەستىك مەديتسينالىق جابدىقتار مەن جيھازدار وندىرەدى, ونى تاپسىرىس بەرۋشىگە دەر كەزىندە جەتكىزىپ بەرۋمەن اينالىسادى. 2012 جىلى قۇرىلعان كومپانيا مەملەكەتتىك, جەكە مەديتسينالىق ۇيىمداردىڭ سەنىمدى سەرىكتەسىنە اينالىپ ۇلگەردى. كاسىپورىن قىزمەتىنىڭ نەگىزگى باعىتتارى – حيرۋرگيالىق, ورتوپەديالىق قۇرال-جابدىقتار شىعارۋ. ودان بولەك, دياگنوستيكالىق جابدىقتار مەن مەديتسينالىق جيھازدار وندىرەدى. سونداي-اق ءبىر كەزدەرى جەدەل جاردەم كولىكتەرىن دە جابدىقتادى. ءونىم اسسورتيمەنتىندە دەفيبريللياتور, ستەريليزاتور, پۋلسوكسيمەتر, ماسساج ۇستەلدەرى, باسقا دا زاماناۋي مەديتسينالىق اپپارات پەن قۇرال-جابدىقتار بار. بارلىق ونىمدەر حالىقارالىق ساپا ستاندارتتارىنا ساي كەلەدى, قاتاڭ باقىلاۋدان وتەدى. 2025 جىلعى تامىزدا كومپانيا «دامۋ» قورىنىڭ «ورلەۋ» جەڭىلدەتىلگەن نەسيەلەندىرۋ باعدارلاماسى اياسىندا «بانك تسەنتركرەديت» قارجى ۇيىمىنان نەسيە الدى. كومپانيا وكىلدەرىنىڭ ايتۋىنشا, قارجىلاندىرۋدىڭ بۇل ءتۇرى كاسىپورىنعا قولجەتىمدى ءارى ءتيىمدى.
«مەديتسينالىق اپپاراتتىڭ كوپتەگەن ءتۇرىن وندىرەمىز. ولاردىڭ ءبارى دە مەديتسينا سالاسىنا قاجەتتى زاماناۋي قوندىرعىلار مەن قۇرال-جابدىقتار. قازىردە 6-12 ارنالى ەكگ اپپاراتىن جاساۋعا كىرىستىك. ول بۇگىندە ەڭ وزىق مەديتسينالىق قۇرالدىڭ ءبىرى بوپ سانالادى. وزىمىزدە بىلىكتى كادرلار جەتكىلىكتى. ماماندار ءار ەكى جىل سايىن شەتەلدە تاجىريبەدەن ءوتىپ تۇرادى. ايتالىق, جاقىندا بىرقاتار قىزمەتكەرىمىز بارسەلونا قالاسىندا تاجىريبە جيناپ قايتتى. سونىمەن بىرگە ءتۇرلى حالىقارالىق كورمەلەرگە قاتىسىپ تۇرامىز. مەديتسينالىق بۇيىمدار وندىرىسىندە باسەكە وتە جوعارى. سول ورايدا ءوز ورنىمىزدى جوعالتپاۋعا تىرىسامىز. وتاندىق ءوندىرىس ورنى رەتىندەگى ءبىر ەرەكشەلىگىمىز, قويعان اپپاراتىمىز ىستەن شىقسا ءبىر اپتا ىشىندە ينجەنەرلەردى جىبەرىپ, ءوزىمىز جوندەپ بەرەمىز. شەتەلدىك قوندىرعىلاردا ءبارى كەرىسىنشە. ءبىر بۇزىلسا جوندەلمەي تۇرىپ قالۋى مۇمكىن. ويتكەنى سەرۆيستىك قىزمەت ناقتى جولعا قويىلماعان. 2023 جىلى ەلىمىزدە 650-گە جۋىق فەلدشەرلىك-امبۋلاتوريالىق پۋنكتتەر سالىندى. سولاردىڭ كوپشىلىگىن بەس ءتۇرلى مەديتسينالىق قۇرالمەن جابدىقتاۋعا قاتىستىق», دەدى كومپانيانىڭ اتقارۋشى ديرەكتورى اسەل تۇرعانبەك.
