بۇل بىرىنشىلىكتىڭ تۇساۋى 1952 جىل كەسىلدى. سودان بەرى 27 جارىستىڭ جالاۋى جەلبىرەدى. دەنى قىتاي قۇراماسىنىڭ جارقىن جەڭىسمەن اياقتالدى. ولار 327,5 (135 التىن+84 كۇمىس+108,5 قولا) رەت جەڭىس تۇعىرىنا كوتەرىلدى. ەكىنشى, ءۇشىنشى ورىنداردا جاپونيا (18+24+71,5) مەن وڭتۇستىك كورەيا (14+28+53). ودان كەيىنگى ساتىلارعا سولتۇستىك كورەيا (7+19+27), گونكونگ (5+11+37,5), ءۇندىستان (2,5+4+10), تايپەي (2+9+23), سينگاپۋر (1+7+9), مالايزيا (0+0+1), ۆەتنام (0+0+1) جايعاستى.
سوڭعى ازيا چەمپيوناتى ءبىر جىل بۇرىن الماتىدا ۇيىمداستىرىلدى. جارىستىڭ ەرلەر مەن ايەلدەردىڭ جەكەلەگەن سايىسىندا توماكادزۋ حاريموتو (جاپونيا) مەن كۋم كيم ەن (سولتۇستىك كورەيا) وزدى. فينالدا ولار لين شيدۋن (قىتاي) مەن ميۆا حاريموتونى (جاپونيا) ۇتتى. جۇپتىق جارىستا ليم چون حۋن/ان دجە حەن (وڭتۇستىك كورەيا) مەن ساتسۋكي ودو/ساكۋرا ەكويدىڭ (جاپونيا) ەكپىنىنە ەشكىم شىدامادى. ارالاس جۇپتاردىڭ تارتىسىندا لي شي دونگ پەن كۋاي مەننىڭ (قىتاي) مەرەيى ۇستەم بولدى. كوماندالىق باسەكەدە قىتايدىڭ ويىنشىلارى وزدى. فينالدا ولار تايپەيدى تىزە بۇكتىردى.
ەلىمىزدىڭ سپورتشىلارى سارى قۇرلىقتىڭ باستى دوداسىندا جۇلدە الىپ كورگەن ەمەس. سول ولقىلىقتىڭ ورنىن تولتىرۋ ماقساتىندا ءۇندى ەلىندەگى جارىسقا كيريلل گەراسيمەنكو, الان قۇرمانعاليەۆ, ايدوس كەنجەعۇلوۆ, ەسكەندىر حاركي, سانجار جۇبانوۆ, زاۋرەش اقاشەۆا, سارۆينوز مىرقادىروۆا, انەل باقىت, جانەركە كوشكىمباەۆا, البينا جاقسىلىقوۆا سىندى ويىنشىلارىمىز اتتاندى.
