تاعىلىمدى شارانى ۇلىتاۋ وبلىسىنىڭ مادەنيەت, تىلدەردى دامىتۋ جانە ارحيۆ ءىسى باسقارماسىنىڭ قولداۋىمەن ۇلىتاۋ اۋداندىق تاريحي-ولكەتانۋ مۋزەيى ۇيىمداستىردى.
كورمەنىڭ سالتاناتتى اشىلۋ راسىمىندە ۇلىتاۋ وبلىستىق مادەنيەت, تىلدەردى دامىتۋ جانە ارحيۆ ءىسى باسقارما باسشىسى ماعجان تابىلدين, جەزقازعان قالاسى جانە ۇلىتاۋ اۋدانىنىڭ قۇرمەتتى ازاماتى, قوعام قايراتكەرى ساعىندىق قوجامسەيىتوۆ, قازاقستاننىڭ قۇرمەتتى مەتاللۋرگى, ولكەتانۋشى تولەگەن بۇكىروۆ ءسوز سويلەدى. ولار عالىمنىڭ ۇلتتىق تاعامتانۋ عىلىمىن دامىتۋداعى جانە حالىق دەنساۋلىعىن جاقسارتۋداعى ولشەۋسىز ەڭبەگىن تىلگە تيەك ەتتى.
كورمە سەگىز بولىمنەن تۇرادى. ەكسپوزيتسيادا ەل قۇرمەتىنە بولەنگەن اكادەميكتىڭ بالالىق شاعىنداعى سۋرەتتەرى, تاعامتانۋ سالاسىنداعى عىلىمي ەڭبەكتەرى, ماراپاتتارى, تۇتىنعان جەكە زاتتارى, وتباسىلىق مۇرالارى جانە قازاق تاعامتانۋ اكادەمياسىنداعى جۇمىس كابينەتى تولىق جابدىقتارىمەن ۇسىنىلدى. كورمەنى قىزىقتاۋشى قوناقتار بەينەروليك كورىپ, عالىمنىڭ ءومىر جولىنان سىر شەرتەتىن جادىگەرلەرمەن تانىستى.
تاعىلىمدى شارادا «سەنىڭ ءومىر ءسۇرۋىڭنىڭ ساپاسى – ىشكەن اسىڭمەن ولشەنەدى» دەپ ۇلت ساۋلىعىن ومىرلىك مۇرات ەتكەن تۇلعانىڭ دەنساۋلىق ساقتاۋ سالاسىنا سىڭىرگەن ولشەۋسىز ەڭبەگى, ونەگەلى ءومىرى ۇلىقتالدى.
كورمەنى جۇرتشىلىق جەزقازعان قالاسى, عارىشكەرلەر كوشەسى, 26 – دا ورنالاسقان ۇلىتاۋ وبلىستىق مۋزەيىنىڭ كوركەم-كورمە زالىندا قازان ايىنىڭ 7–15 كۇندەرى ارالىعىندا تاماشالاي الادى.
ۇلىتاۋ وبلىسى
