زايسان اۋدانى قارابۇلاق اۋىلىنداعى اباي اتىنداعى ورتا مەكتەپ شىعىس قازاقستان وبلىسىنداعى بايىرعى وقۋ ورىندارىنىڭ ءبىرى. مەكتەپتىڭ قۇرىلعانىنا 90 جىلدان اسىپ وتىر. وسى ۋاقىت ارالىعىندا مۇندا سان مىڭداعان شاكىرتتەر تاربيەلەنىپ, ولار ەلىمىزدىڭ دامۋىنا ءوز ۇلەستەرىن قوستى. كوپتەگەن عالىمدار مەن اقىن-جازۋشىلار, ونەر وكىلدەرى, ەڭبەك پەن ءوندىرىس, شارۋاشىلىق ۇيىمداستىرۋشىلارى, كاسىپكەرلەر, سپورتشىلار شىقتى.
سولاردىڭ قاتارىندا وتاندىق تەلەديداردا كوپتەگەن قىزىقتى باعدارلامالاردى ومىرگە اكەلگەن بەلگىلى تەلەجۋرناليست, دراماتۋرگ مارقۇم ادىلبەك تاۋاساروۆ, ەلىمىزگە تانىمال تاۋەلسىز جۋرناليست ەرمۇرات باپي, وبلىستا كۇرەستىڭ دامۋىنا كوپ ەڭبەك سىڭىرگەن سپورت جاتتىقتىرۋشىلارى ءجانادىل اتاەۆ پەن ەركىن ۋانباەۆ, ەلىمىزگە تانىمال انشىلەر گۇلجىبەك ايازباەۆا مەن دالەل ءۋاش, ساحنا ساڭىلاعى جۇمابەك قۇنانباەۆ, اۋىل ونەرىنىڭ دامۋىنا ۇلكەن ۇلەس قوسىپ كەلە جاتقان باعدولدا تۇرعانباەۆ, وسكەمەن قالاسىنىڭ اكىمى تەمىربەك قاسىمجانوۆ جانە باسقالار بار.
مەكتەپتە كوپتەگەن بىلىكتى ۇزتازدار جۇمىس ىستەدى. سونىڭ ىشىندە ادەبيەت ءپانىنىڭ مۇعالىمى, وبلىسقا, اۋدانعا اتى بەلگىلى اتاقتى ۇستاز مارقۇم ماكەش اۋكەباەۆ كوپ ەڭبەكپەن مەكتەپتەگى اباي مۇراجايىن قۇرىپ, ونى ۇلى اقىنعا قاتىستى جادىگەرلەرمەن, مۇراعات قۇجاتتارمەن جابدىقتاپ, سوڭىندا ءوشپەستەي ءىز قالدىردى.
بۇل مەكتەپتىڭ ۇلگى ەتۋگە تۇرارلىق داستۇرگە اينالعان جاقسى ءبىر تاجىريبەسى – مەكتەپ پەن ونى بىتىرگەن تۇلەكتەر اراسىنداعى بايلانىستىڭ ورنىقتى جولعا قويىلعاندىعى. مۇندا جىل سايىن مەكتەپ بىتىرگەندەرىنە 20, 30, 40 جىل تولعان تۇلەكتەر جينالىپ, 4-5 كۇن بويى سپورت, ونەر دودالارىن ۇيىمداستىرىپ, ۇشقان ۇيالارىنا دەمەۋشىلىك كومەكتەرىن كورسەتەدى. مىنە, شيرەك عاسىرعا جۋىق ۋاقىتتان بەرى وسى بەرىك ءداستۇر تۇراقتى جالعاسىن تاۋىپ كەلەدى. وتانىمىزدىڭ ءار جەرىندە ەڭبەك ەتىپ جاتقان مەكتەپ تۇلەكتەرىنىڭ ءبىر كىسىدەي باس قوسىپ, ەلگە كەلۋى – اۋىل حالقى, مەكتەپ ۇجىمى ءۇشىن ۇلى مەرەكە.
مەكتەپ كۇنى مەرەكەسى العاش رەت 1991 جىلى اتالىپ ءوتىلىپ, سول جولعى كەزدەسۋگە مەكتەپتى 20 جىل بۇرىن ءبىتىرگەن تۇلەكتەر شاقىرىلعان ەدى. كەزدەسۋگە كەلگەن تۇلەكتەر وزدەرىنىڭ ۇيىمشىلدىقتارى, ومىردەگى تابىستارىمەن جاس ۇرپاققا ۇلگى-ونەگە بولىپ, تۋعان اۋىلدارىنىڭ, مەكتەپتەرىنىڭ مارتەبەسىن ءبىر كوتەرىپ تاستاعان بولاتىن.
سول ءساتتى باستاما تۇراقتى جالعاسىن تاپتى. ناتيجەسىندە مەكتەپ كۇنى مەرەكەسىنىڭ ماڭىزى مەن قامتيتىن ماسەلەلەرى جىلدان-جىلعا جاڭا قىرىنان ءورىس الىپ, مەكتەپتىڭ ماتەريالدىق-تەحنيكالىق بازاسىن نىعايتۋعا كوپ ۇلەسىن تيگىزىپ كەلەدى. مەكتەپ تۇلەكتەرىنىڭ كومەگىمەن باستاۋىش سىنىپتىڭ 5 كابينەتى, مەكتەپ اسحاناسى جاڭا جيھازبەن جابدىقتالىپ, تەلەديدار, كومپيۋتەر, كىلەم, توڭازىتقىش سياقتى قاجەتتى زاتتارمەن تولىقتىرىلدى. كەيىنگى جىلدارى جىل سايىن ءبىر كابينەت مەكتەپ تۇلەكتەرىنىڭ كۇشىمەن جابدىقتالاتىن بولىپ ءجۇر. ماسەلەن, بىلتىر وزدەرىنىڭ 40 جىلدىق كەزدەسۋلەرىنە كەلگەن وسكەمەن قالاسىنىڭ اكىمى تەمىربەك قاسىمجانوۆ مەكتەپتەگى ينفورماتيكا كابينەتىن كومپيۋتەرلەرمەن تولىق جابدىقتاپ بەردى.
تۇلەكتەر قولداۋىنا يە بولعان مەكتەپتە ءبىلىم بەرۋ ءىسى دە جاقسى جولعا قويىلعان. مەكتەپ وقۋشىلارى سوڭعى ءۇش جىلدا ءپان وليمپياداسى جەڭىمپازدارىنىڭ سانى جونىندە اۋداننىڭ وتىزعا جۋىق مەكتەبىنىڭ اراسىندا ورتا ەسەپپەن العاندا 4-ءشى ورىندى تۇراقتى يەلەنىپ كەلەدى. ماسەلەن, مەكتەپ وقۋشىلارى وبلىستىق ءپان وليمپياداسىندا حيميادان III ورىن, انا تىلىنەن II ورىن, ماتەماتيكادان II ورىندار الىپ اۋدان نامىسىن قورعادى. عىلىمي جوبا قورعاۋ سايىستارىندا ۇنەمى 3-4 وقۋشى جۇلدەلى ورىندارعا يە بولادى. ماسەلەن, وبلىس كولەمىندە 4 وقۋشى II, III ورىندارعا يە بولسا, رەسپۋبليكا كولەمىندە 1 وقۋشى III ورىندى جەڭىپ الدى. وبلىستىق شىعارمالار سايىسىندا 1 وقۋشى I ورىن, 2 وقۋشى III ورىندى يەلەندى.
ءپان مۇعالىمدەرىنىڭ اۋداندىق سايىستارىندا حيميا ءپانى مۇعالىمى ءمۇنيرا جاقسىلىقوۆا 2 جىلدا II, III ورىنداردى جەڭىپ الىپ «جىل مۇعالىمى-2013» قۇرمەتتى اتاعىنا يە بولدى. باستاۋىش سىنىپ مۇعالىمدەرىنىڭ ءپان وليمپياداسىندا ءنازيرا قوراباەۆا ءىى ورىن, باقىتگۇل بايتوقانوۆا ءىىى ورىن, ءشايزا ساعىمباەۆا ءىى ورىن, فيزيكا ءپانى مۇعالىمى گاۋحار باتتالوۆا ءىى ورىن, وبلىستىق ءتىل ماماندارىنىڭ سايىسىندا اعىلشىن ءتىلى ءپانى مۇعالىمى ايگۇل ادان ءىى ورىندى, شاعىن ورتالىق تاربيەشىسى ايمان الىمباەۆا ءىىى ورىندى جەڭىپ الدى.
2009 جىلى اباي ورتا مەكتەبى وبلىستىق «ەڭ ۇزدىك اۋلا» سايىسىندا II ورىن الدى. 2010 جىلى مەكتەپ ۇجىمى اۋدان مەكتەپتەرى اراسىندا وتكەن كوركەمونەرپازدار سايىسىندا باس جۇلدەنى, 2011 جىلى I ورىندى جەڭىپ الدى.
2010 جىلى مەكتەپ جانىنان تاۋەلسىزدىكتىڭ 20 جىلدىعىنا ارنالعان اۋماعى 1 گەكتار بولاتىن بوتانيكالىق باق ۇيىمداستىرىلدى. ول باققا وسكەمەن قالاسىنان اعاشتىڭ 24 ءتۇرى اكەلىنىپ وتىرعىزىلدى. بۇگىنگى كۇنى باقتىڭ اۋماعى 1,5 گەكتارعا دەيىن ءوستى.
2011 جىلى مەكتەپ جانىنان اۋماعى 60 شارشى مەتر بولاتىن جىلىجاي سالىندى. وندا قىزاناق, قيار, گۇلدەردىڭ ءارتۇرى وسىرىلۋدە. جىلىجاي ءونىمىن وقۋشىلار مەكتەپ اسحاناسىندا پايدالانادى. سونىمەن قاتار, مەكتەپ جانىنداعى تاجىريبە الاڭىندا ءتۇرلى باقشا ونىمدەرى وقۋشىلاردىڭ كۇشىمەن ءوسىرىلىپ, ونىڭ ونىمدەرى مەكتەپ اسحاناسىنا وتكىزىلەدى. جىل سايىن مەكتەپتىڭ قوسالقى شارۋاشىلىعىندا كارتوپ, ورامجاپىراق, ءسابىز, قىزىلشا ءوسىرىلىپ, وقۋشىلاردى تەگىن تاماقتاندىرۋعا جۇمسالادى.
2012 جىلى اۋداندا كوگالداندىرۋ كوركەيتۋ جۇمىستارىنا ارنالعان وبىلىستىق سەمينار ءوتتى. سەمينارعا قاتىسقان وبلىس اۋداندارىنىڭ ءبىلىم بولىمدەرىنىڭ باسشىلارى اباي مەكتەبىنىڭ جىلىجايىن, بوتانيكالىق باعىن كورىپ, تاجىريبە الماستى.
2013 جىلى اباي ورتا مەكتەبى اۋداندىق «ەڭ ۇزدىك اۋلا» سايىسىندا باس جۇلدەنى جەڭىپ الدى. 2014 جىلى 8-9 سىنىپ وقۋشىلارى سىرتقى باقىلاۋ كەزىندە 59 پايىز ءبىلىم ساپاسىن كورسەتتى. ال مەكتەپ تۇلەكتەرى ۇبت-دان 81,7 بالل الىپ, اۋدان بويىنشا 4-ورىنعا شىقتى. 2014 جىلى مەكتەپتە تەحنولوگيا جانە دەنە تاربيەسى ءپانى مۇعالىمدەرىنىڭ اۋداندىق سەمينارى وتكىزىلدى.
2014 جىلى 7 قاراشا كۇنى مەكتەپ ۇجىمى مەكتەپتىڭ قۇرىلعانىنا 90 جىل تولۋىن اتاپ ءوتتى. بۇل مەرەكەگە رەسپۋبليكامىزدىڭ تۇكپىر-تۇكپىرىنەن وسى مەكتەپتى بىتىرگەن تۇلەكتەر مەن قىزمەت ىستەگەن ۇستازدار شاقىرىلدى. مەكتەپ تۇلەكتەرى ءوز التىن ۇيالارىنا مۋزىكالىق اپپاراتۋرا, مۇزداتقىش, ءتۇرلى-ءتۇستى پرينتەر, اكۆاريۋم, كوپتەگەن كىتاپتار, اقىن ابايدىڭ ءبيۋستىن, شاحمات, دويبى تاقتايشالارىن, 20 بالاعا ارنالعان قۇنى 360000 تەڭگە تۇراتىن كۇرەس فورمالارىن جانە اقشالاي 379000 تەڭگەنى تارتۋ ەتتى. كەلگەن قاراجاتقا ۇجىم مۇشەلەرىنىڭ شەشىمى بويىنشا قاجەتتى قۇرال-جابدىقتار الىندى.
بيىل اباي اتىنداعى ورتا مەكتەپتە تاريح ءپانى, ءوزىن-ءوزى تانۋ ءپانى مۇعالىمدەرىنىڭ جانە ۇلى ابايدىڭ تۋعانىنا 170 جىل تولۋىنا ارنالعان اۋداندىق سەمينارلار وتكىزىلدى. ول سەمينارعا قاتىسقان اۋىل وكرۋگ اكىمدەرى مەن مەكتەپ ديرەكتورلارى مۇعالىمدەردىڭ وتكىزگەن اشىق ساباقتارىنا, تاربيە ساعاتتارىنا, دوڭگەلەك ۇستەل باسىنداعى اتا-انالارمەن وتكىزگەن سۇحباتتارىنا قاتىسىپ جوعارى باعا بەردى.
سۇڭعات ءالىپباي, «ەگەمەن قازاقستان».
شىعىس قازاقستان وبلىسى.
