فوتو: اقوردا
ءمينيستردىڭ ايتۋىنشا, بيىل رەسپۋبليكالىق بيۋدجەتكە 21,6 تريلليون تەڭگە كولەمىندە كىرىس تۇسكەن. ونىڭ 15,2 تريلليون تەڭگەسىن سالىق تۇسىمدەرى قۇرايدى. بۇل – وتكەن جىلمەن سالىستىرعاندا 23,4 پايىز جوعارى. توعىز ايدىڭ قورىتىندىسى بويىنشا بيۋدجەت 101,6 پايىز ورىندالىپ, ونىڭ الەۋمەتتىك باعىتى ساقتالىپ وتىر.
قاسىم-جومارت توقاەۆقا سالىقتىق جانە كەدەندىك اكىمشىلەندىرۋدىڭ تيىمدىلىگىن ارتتىرۋ شارالارى, ارناۋلى مەملەكەتتىك قوردىڭ تۇسىمدەرى تۋرالى مالىمەت بەرىلدى.
«مەملەكەتتىك ساتىپ الۋ تۋرالى» زاڭىن ىسكە اسىرۋعا باسا نازار اۋدارىلدى. جاڭا قۇجات راسىمدەردىڭ مەرزىمىن قىسقارتۋدى, ولاردىڭ اشىقتىعىن قامتاماسىز ەتۋدى جانە وتاندىق تاۋار وندىرۋشىلەردى قولداۋدى كوزدەيدى. قازىرگى ۋاقىتتا قازىناشىلىقتىڭ اقپاراتتىق جۇيەسىندەگى تالداۋ جانە باقىلاۋ ۇدەرىستەرى تولىق اۆتوماتتاندىرىلدى.
مەملەكەت قارجىسىن تسيفرلاندىرۋ اياسىندا Big Data قالىپتاستىرۋعا جانە تولىقتىرۋعا, سونداي-اق سالىق پەن كەدەن سالالارىنا جاساندى ينتەللەكتىنى ەنگىزۋگە ەرەكشە ءمان بەرىلەدى.
پرەزيدەنتكە مەملەكەتتىك ءاۋديتتىڭ ناتيجەلەرى تانىستىرىلدى. بيىلعى 8 ايدا 791 تەكسەرۋ جۇرگىزىلىپ, سوماسى 337,5 ميلليارد تەڭگە بولاتىن قارجىنىڭ زاڭسىز جۇمسالعانى انىقتالدى.
قاسىم-جومارت توقاەۆ مەملەكەتتىك قارجىنىڭ ورنىقتىلىعىن قامتاماسىز ەتۋ بويىنشا جۇيەلى جۇمىستى جالعاستىرۋ مەن بارلىق الەۋمەتتىك مىندەتتەمەنى ورىنداۋ كەرەك ەكەنىنە توقتالدى. سونداي-اق تسيفرلاندىرۋدى ودان ءارى دامىتۋ جانە زاماناۋي باقىلاۋ تەتىكتەرىن ەنگىزۋدىڭ ماڭىزىن اتاپ ءوتتى.
