سۋرەتتى تۇسىرگەن – ەسەنجول يسابەك
«ەۋروپالىق قايتا جاڭارتۋ جانە دامۋ بانكى (ەقدب) ارقىلى نەسيە ۇسىنۋ ەسەبىنەن اككۋمۋلياتورلىق باتارەيالارمەن جۇرەتىن ءارى ەنەرگيا قۋاتىن بارىنشا ۇنەمدەيتىن 25 جاڭا ترامۆاي ساتىپ الۋ جوسپارلانىپ وتىر. جوبانىڭ جالپى قۇنى – 8 ملرد تەڭگە. قاراجاتتىڭ 7 ملرد تەڭگەسىن بانك بەرسە, تاعى 1 ملرد تەڭگەسى وبلىستىق بيۋدجەتتەن قاراستىرىلعان. ۆاگونداردى ساتىپ الۋعا ارنالعان كونكۋرس ەقدب الاڭىندا قارالۋ ساتىسىندا. قازىردە 4 قاتىسۋشىدان ۇسىنىستار قابىلداندى. كونكۋرس قورىتىندىسى شىعارىلعان سوڭ جەڭىمپازبەن ترامۆايلاردى جەتكىزۋ مەرزىمدەرى ايقىندالاتىن شارت جاسالادى», دەپ حابارلادى وبلىس اكىمىنىڭ ءباسپاسوز قىزمەتى.
الداعى جىلدارى ترامۆاي ۆاگوندارى كەزەڭ-كەزەڭىمەن جاڭارتىلىپ, ءتيىستى قارجىلاندىرۋمەن قامتاماسىز ەتىلگەن جاعدايدا «دوستىق» شاعىن اۋدانىنا ترامۆاي جەلىسىن ۇزارتۋ كوزدەلگەن. «دوستىققا» ترامۆاي جەلىلەرىن سالۋ جوباسى مەملەكەتتىك ساراپتامانىڭ وڭ قورىتىندىسىنا يە بولعان. قۇرىلىستىڭ جالپى قۇنى – 2,1 ملرد تەڭگە. بارلىعى جونىمەن بولسا, جوبانى ىسكە اسىرۋ كەلەر جىلى باستالادى. شاعىن اۋدانداعى بولجامدى جولاۋشىلار اعىنى كۇنىنە 5000 ادامدى قۇرايدى.
كاسىپورىندا بۇگىندە شامامەن 500 ادام ەڭبەك ەتەدى. ورتاشا ەڭبەكاقى 350 مىڭ تەڭگەنى قۇرايدى, ونى كوتەرۋ ماسەلەسى قارجىلىق مۇمكىندىك شەگىندە قاراستىرىلىپ جاتىر.
«ترامۆاي پاركىنەن كۇن سايىن 83 ۆاگون جولعا شىعادى. سوڭعى رەت پارك 2017–2019 جىلدارى جاڭارتىلىپ, بەلارۋستە شىعارىلعان 23 ۆاگون ساتىپ الىندى. جالپى, پارك جاعدايى قاناعاتتانارلىق: ۆاگوندارعا جۇيەلى تۇردە اعىمداعى, كۇردەلى جوندەۋ جۇرگىزىلەدى, دەپو قاجەتتى جابدىقتارمەن تولىق قامتاماسىز ەتىلگەن. شامامەن 30 ترامۆاي جۇرگىزۋشىسى, سونداي-اق ەلەكتر سلەسارلار مەن جوندەۋشىلەر سياقتى جۇمىسشى ماماندىقتارعا تاپشىلىق بار», دەيدى د.ماحمۋدوۆ اتىنداعى «پاۆلودار قالاسىنىڭ ترامۆاي باسقارماسى» اق باسقارما توراعاسى مۋسليم ماحمۋدوۆ.
ترامۆاي باسقارماسى كوشە قيىلىستارىنداعى ترامۆاي جولدارىنىڭ وتكەلدەرىنە دە نازار اۋدارىپ كەلەدى. بيىل جەتى وتكەلدى جاڭارتۋ جوسپارلانسا, سونىڭ بەسەۋى قازىرگى كۇنى پايدالانۋعا بەرىلگەن.
2016 جىلدان مۇندا جولاقىنى ەلەكتروندىق تولەۋ جۇيەسى ەنگىزىلگەن. كاسىپورىن باسشىلىعىنىڭ ايتۋىنشا, قولدانىستاعى 100 تەڭگەلىك تاريف پاركتىڭ شىعىندارىن جابۋعا جەتكىلىكسىز. ەكونوميكالىق تۇرعىدان العاندا, ناقتى تاريف شامامەن 300-320 تەڭگەنى قۇراۋى كەرەك. بىراق بۇل جولاۋشىلاردىڭ قالتاسىنا سالماق سالادى. سوندىقتان پارك كۇتىمى مەن ەڭبەكاقى تولەۋ, وزگە دە شىعىستارعا بيۋدجەتتەن سۋبسيديا تولەنەدى.
پاۆلودار
