بيىل جەتىساي اۋدانىنىڭ 79,3 مىڭ گەكتار سۋارمالى جەرىنىڭ 43,1 مىڭ گەكتارىنا جەرگىلىكتى جانە تۇرىك, قىتاي ەلدەرىنەن اكەلىنگەن تۇقىمدىق شيت ەگىلگەن بولاتىن. بۇگىندە 41,9 مىڭ گەكتار القاپتان 106 525 توننا «اق التىن» جينالعان. ناۋقانعا 715 تراكتور مەن 897 تراكتور تىركەمەلەرى, 61 وۆح مەن 239 ماقتا تەرىم ماشينالارى جۇمىلدىرىلعان. وتكەن جىلى 41 مىڭ گەكتارعا ماقتا ءشيتىن سەۋىپ, 112 750 توننا اق ۇلپا جيناعان جەتىسايلىق شارۋالار بيىل 119,3 مىڭ توننا ءونىم الۋعا نيەتتى. ءونىم ساپاسىن ارتتىرىپ, اعىن سۋدى ۇنەمدەۋدىڭ ءتيىمدى تەحنولوگياسى سانالاتىن تامشىلاتىپ سۋارۋ ءادىسى اۋدان بويىنشا 5646 گەكتار جەرگە ەنگىزىلسە, ونىڭ 2600 گەكتارى ماقتا داقىلىن وندىرۋشىلەردىڭ ەنشىسىندە.
بۇگىندە اۋدان اۋماعىندا ورنالاسقان ماقتا قابىلداۋشى 7 ماقتا وڭدەۋ زاۋىتتارى مەن 77 ماقتا قابىلداۋ بەكەتتەرىنىڭ 53-ءى جەتىساي اۋدانىندا ورنالاسقان ماقتا وڭدەۋ زاۋىتتارىنا تيەسىلى بولسا, قالعان 24-ءى ماقتارال اۋدانىندا ورنالاسقان ماقتا وڭدەۋ زاۋىتتارىنا تيەسىلى. اۋدان اكىمى سەرىك مامىتوۆ زاۋىت باسشىلارىمەن كەزدەسىپ, شارۋالارعا وتكىزگەن ماقتاتارىنىڭ اقشاسىن ۋاقىتىلى تولەپ, سوزبالاڭعا سالماۋدى, ماقتا قابىلداۋ بەكەتتەرىندەگى تارازىدان الداۋ, زەرتحانالاردا ماقتا ساپاسىن قاساقانا تومەندەتۋ سەكىلدى جاعدايلارعا جول بەرىلمەۋ كەرەكتىگىن, زاڭسىزدىقتار ورىن العان جاعدايدا قۇزىرلى ورگاندار تاراپىنان ءتيىستى شارالار كورىلەتىندىگىن قاتاڭ ەسكەرتتى.
تۇركىستان وبلىسى
