اڭگىمە وزەگى – ۇلت جوسپارى

اقتوبە كولىك, كوممۋنيكاتسيا جانە جاڭا تەحنولوگيالار كوللەدجىندە «100 ناقتى قادام» – ۇلت جوسپارىن جۇزەگە اسىرۋ ماسەلەلەرى تۋرالى» دوڭگەلەك ۇستەل ءوتتى. وعان وبلىستىق ءبىلىم باسقارماسىنىڭ, تەحنيكالىق جانە كاسىبي ءبىلىم بەرۋ, مەكتەپتەر مەن ينتەرناتتار, ءبىلىم سالاسى ورتالىقتارىنىڭ باسشىلارى مەن وكىلدەرى قاتىستى.   دوڭگەلەك ۇستەلدە ءبىلىم جانە عىلىم ۆيتسە-ءمينيسترى ەسەنعازى يمانعاليەۆ «100 ناقتى قادام» ۇلت جوسپارىن جۇزەگە اسىرۋدىڭ نەگىزگى باعىتتارىن تاراتا بايانداپ, ۇلتتىق كوميسسيانىڭ وسى ماسەلەگە قاتىستى اتقاراتىن اۋقىمدى ىستەرىنە تەرەڭىرەك توقتالدى. ول ۇلت جوسپارىن جۇزەگە اسىرۋ ءۇشىن ۇلتتىق كوميسسيا قۇرعان بەس جۇمىس توبىندا وتاندىق جانە شەتەلدىك ساراپشىلار جۇمىس ىستەيتىنىن, ەڭ باستى ەكى ماقسات ول – ەلىمىزدى 2050 جىلدارى الەمدەگى دامىعان وتىز ەلدىڭ قاتارىنا قوسىلۋعا اتسالىسۋ ءارى ىنتىماقتاستىق جانە دامۋ ەلدەرى ۇيىمىنىڭ ستاندارتتارىن جۇزەگە اسىرۋ بولىپ تابىلاتىنىن جەتكىزدى. سونداي-اق, ءار قادامدى جۇزەگە اسىرۋ ءۇشىن قانداي جۇمىستار جاسالاتىنىن دايەكتى دالەلدەدى, وسى باعىتتا الدا تۇرعان اۋقىمدى مىندەتتەردى سارالاي تالدادى, ونى ۇلتتىق كوميسسيانىڭ العا قويعان تالاپتارىمەن تۇسىندىرە اڭگىمەلەدى. شارا بارىسىندا ءسوز العان اقتوبە پوليتەحنيكالىق كوللەدجىنىڭ ديرەكتورى قاسىمبەك الدياروۆ, اقتوبە قۇرىلىس جانە بيزنەس كوللەدجىنىڭ قىزمەتكەرى قامالحان قۋان ءوز كاسىپتىك وقۋ ورىندارىنداعى جاڭاشا جۇمىس ىستەۋگە باعىتتالعان ءساتتى قادامداردى بايانداي كەلىپ, قول جەتكەن تابىستار مەن اتقارىلار اۋقىمدى ىستەردى دە اينالىپ وتپەدى. جالپى, ۇلت جوس­پارىن اڭگىمە وزەگىنە اينالدىرعان جيىنعا قاتىسۋشىلار 12 جىلدىق ءبىلىم بەرۋدى كەزەڭ-كەزەڭمەن ەنگىزۋ, فۋنكتسيالىق ساۋاتتىلىقتى دامىتۋ ءۇشىن مەكتەپتەگى وقىتۋ ستاندارتتارىن جاڭارتۋ, جوعارى سىنىپتاردا وتباسىلىق قارجىلاندىرۋدى ەنگىزۋ, تابىستى مەكتەپتەردى ىنتالاندىرۋ جۇيەسىن قۇرۋ, ەكونوميكانىڭ التى نەگىزگى سالاسى ءۇشىن بىلىكتى كادرلاردى دايارلاۋ, ءبىلىم بەرۋ جۇيەسىندە – جوعارى سىنىپتار مەن جوو-لاردا اعىلشىن تىلىندە وقىتۋعا كەزەڭ-كەزەڭمەن كوشۋدى جۇزەگە اسىرۋ بويىنشا بىرقاتار پىكىرلەر مەن ۇسىنىستارىن ورتاعا سالدى. ساتىبالدى ءساۋىرباي, «ەگەمەن قازاقستان». اقتوبە وبلىسى.