قازىر رەسپۋبليكا اۋماعى بويىنشا راديواكتيۆتى ماتەريالداردى تاسىمالداۋ تارتىبىنە بايلانىستى ماسەلەلەر قولدانىستاعى زاڭنامامەن رەتتەلگەن. راديواكتيۆتى ماتەريالداردى ترانسشەكارالىق تاسىمالداۋ ۋاكىلەتتى مەملەكەتتىك ورگاندار (اتوم ەنەرگياسى جونىندەگى اگەنتتىگىنىڭ اتومدىق قاداعالاۋ جانە باقىلاۋ كوميتەتى, وقم ونەركاسىپ كوميتەتى) بەرەتىن رۇقساتتار (ليتسەنزيالار) نەگىزىندە جۇزەگە اسىرىلادى.
كەلىسىمدى راتيفيكاتسيالاۋ قاجەتتىلىگى راديواكتيۆتى ماتەريالداردى بىرنەشە مەملەكەتتىڭ اۋماقتارىن قامتيتىن حالىقارالىق تاسىمالداۋ كەزىندە تمد-عا مۇشە مەملەكەتتەردىڭ ۋاكىلەتتى ورگاندارىنىڭ ءىس-قيمىلدارىنىڭ كەلىسىمدىلىگىن, رۇقسات قۇجاتتارىن ءوزارا تانۋدى جانە قاۋىپسىزدىكتى قامتاماسىز ەتۋدىڭ بىرىڭعاي تاسىلدەرىن تالاپ ەتۋىمەن نەگىزدەلەدى. ول ترانسشەكارالىق تاسىمالداردى باقىلاۋ تيىمدىلىگىن ارتتىرۋعا, راديواكتيۆتى ماتەريالداردى مەملەكەتتىك شەكارالار ارقىلى وتكىزۋ كەزىندە نەگىزسىز كىدىرىستەردى بولدىرماۋعا, ورىن اۋىستىرۋ مونيتورينگى جۇيەسىن جەتىلدىرۋگە, سونداي-اق راديواكتيۆتى ماتەريالداردىڭ زاڭسىز ورىن اۋىستىرۋىنىڭ جولىن كەسۋگە ىقپال ەتەتىن بولادى.
بۇل قۇجات 2025 جىلعى 26 قىركۇيەكتە عىلىم جانە تەحنولوگيالار جونىندەگى ۇلتتىق كەڭەستىڭ وتىرىسىندا بەلگىلەگەن ساياسات كونتەكستىندە ەرەكشە مانگە يە بولدى. مەملەكەت باسشىسى اتوم ەنەرگەتيكاسى مەن يادرولىق تەحنولوگيالاردى دامىتۋ ەنەرگەتيكالىق قاۋىپسىزدىكتى, عىلىمي-تەحنيكالىق پروگرەستى جانە ەلدىڭ اتومدى بەيبىت ماقساتتا پايدالانۋ سالاسىنداعى حالىقارالىق مىندەتتەمەلەرىن قامتاماسىز ەتۋدىڭ نەگىزگى باعىتتارىنىڭ ءبىرى بولىپ تابىلاتىنىن اتاپ ءوتتى. وسى تۇرعىدا قازاقستان جوعارى حالىقارالىق قاۋىپسىزدىك ستاندارتتارىنا سايكەس كەلەتىن زاماناۋي نورماتيۆتىك-قۇقىقتىق بازانى دايەكتى تۇردە قالىپتاستىرادى, بۇل وسى كەلىسىمدى راتيفيكاتسيالاۋدىڭ قوسىمشا وزەكتىلىگىن بەرەدى.
زاڭ جوباسىن قابىلداۋ تەرىس الەۋمەتتىك-ەكونوميكالىق نەمەسە وزگە دە سالدارعا الىپ كەلمەيدى, مەملەكەتتىك بيۋدجەتتەن قوسىمشا شىعىستاردى تالاپ ەتپەيدى. سونداي-اق زاڭعا قوسىمشا تاۋەلدى نورماتيۆتىك قۇقىقتىق اكتىلەردى قابىلداۋ قاجەتتىگىن نەگىزدەمەيدى.
