4-قازاننان 5-قازانعا قاراعان ءتۇنى اقش-تىڭ نەۆادا شتاتى, لاس-ۆەگاس قالاسىندا UFC ۇيىمىنىڭ كەزەكتى ءتۋرنيرى – UFC 320 وتەدى. تۋرنير اياسىندا بارلىعى 14 جەكپە-جەك جوسپارلانعان. ونىڭ بەسەۋى – باستى كارد.
كەزدەسۋلەر قازاقستان ۋاقىتىمەن 03:00-دە باستالادى. نەگىزگى جەكپە-جەكتەر 05:00-دە, ال باستى كارد 07:00-دە وتەدى.
اتالعان تۋرنيردە قازاقستاندىق جارتىلاي ورتا سالماقتاعى سپورتشى نيكولاي ۆەرەتەننيكوۆ (13-6) UFC-دەگى ءتورتىنشى جەكپە-جەگىن وتكىزەدى. ونىڭ قارسىلاسى – 32 جاستاعى امەريكالىق سپورتشى پۋناحەلە سوريانو (11-4).
ۆەرەتەننيكوۆ UFC-دە 1 جەڭىس جانە 2 جەڭىلىس ناتيجەسىن تىركەگەن. سوڭعى كەزدەسۋىندە ول جەڭىسكە جەتتى. سوريانونىڭ كورسەتكىشى – 5 جەڭىس, 4 جەڭىلىس, قازىرگى ۋاقىتتا ول ەكى كەزدەسۋدە قاتارىنان جەڭىسكە جەتىپ وتىر. بۇل جەكپە-جەك ۆەرەتەننيكوۆ ءۇشىن ۇيىمداعى كەلىسىمشارت بويىنشا سوڭعى ايقاس بولماق.
سپورتشىلار وكتاگونعا ءۇشىنشى بولىپ شىعادى. جەكپە-جەك قازاقستان ۋاقىتىمەن شامامەن 03:40-تەن كەيىن باستالادى.
باستى جەكپە-جەكتە جارتىلاي اۋىر سالماقتاعى رەسەيلىك چەمپيون ماگومەد انكالاەۆ (20-1-1-1) پەن بۇرىنعى بەلبەۋ يەگەرى, برازيليالىق الەكس پەرەيرا (12-3) اراسىنداعى قارىمتا كەزدەسۋ وتەدى.
