ماۋلەن اشىمباەۆ مارتەبەلى مەيمانعا ءىلتيپات ءبىلدىرىپ, ساپار باعدارلاماسىنىڭ اۋقىمدى ەكەنىن تىلگە تيەك ەتتى. سونىڭ اياسىندا ماجارستان پرەزيدەنتى مەملەكەت باسشىسى قاسىم-جومارت توقاەۆپەن بىرگە Digital Bridge – 2025 حالىقارالىق IT-فورۋمىنا قاتىسقانىن ايتا كەتكەن ءجون. سەنات توراعاسى اتاپ وتكەندەي, مۇنداي مازمۇندى ساپار باۋىرلاس ەلدەر ەكىجاقتى ىنتىماقتاستىقتى ودان ءارى نىعايتۋعا مۇددەلى ەكەنىن كورسەتەدى.
سونداي-اق قازاقستان مەن ماجارستان اراسىندا ديپلوماتيالىق قارىم-قاتىناس ورناعان وتىز جىل ىشىندە قوس مەملەكەت اراسىندا سەنىمدى ساياسي ديالوگ, بەرىك ەكونوميكالىق ىنتىماقتاستىق جانە تىعىز مادەني-گۋمانيتارلىق بايلانىس قالىپتاسقانى ءسوز بولدى.
«كەيىنگى جىلدار قازاقستان مەن ماجارستان ىنتىماقتاستىعى ءۇشىن وتە ناتيجەلى بولدى دەۋگە تولىق نەگىز بار. بۇل رەتتە قازاقستان پرەزيدەنتى قاسىم-جومارت توقاەۆتىڭ بىلتىر بۋداپەشتكە جاساعان العاشقى مەملەكەتتىك ساپارىن ايرىقشا اتاپ وتكەن ءجون. سونىڭ قورىتىندىسى بويىنشا ەكى ەلدىڭ ستراتەگيالىق سەرىكتەستىكتى ودان ءارى نىعايتۋعا جانە ورتاق باستامالاردى ىسكە اسىرۋعا بەيىل ەكەنىن كورسەتەتىن بىرلەسكەن مالىمدەمە قابىلداندى. ودان بولەك, ساۋدا-ەكونوميكالىق سالادا بىرقاتار ماڭىزدى كەلىسىمگە قول قويىلدى. ءسىزدىڭ ساپارىڭىز مەملەكەتارالىق ءوزارا ءىس-قيمىل مەن ىنتىماقتاستىققا تىڭ سەرپىن بەرىپ, ەكىجاقتى قاتىناستاردىڭ كۇن ءتارتىبىن جاڭا مازمۇنمەن بايىتا تۇسەدى دەپ سەنەمىز», دەدى م.اشىمباەۆ.
سۇحبات بارىسىندا قازاقستان مەن ماجارستان اراسىنداعى ءوزارا ءىس-قيمىلدى ارتتىرۋدا پارلامەنتارالىق ديالوگ ماڭىزدى ءرول اتقاراتىنى ايتىلدى. وسىعان وراي دوستىق توپتارى مەن پارلامەنتارالىق ۇيىمدار اياسىنداعى ىنتىماقتاستىقتى جانە پارلامەنتارالىق بايلانىستاردى ءارى قاراي جانداندىرۋ تەتىكتەرىنە باسا ءمان بەرىلدى.
ء«بىز قازاقستان پارلامەنتى مەن ماجارستان مەملەكەتتىك جينالىسى اراسىندا قالىپتاسقان دوستىق بايلانىستى جوعارى باعالايمىز جانە ونى ءارى قاراي نىعايتۋعا مۇددەلىمىز. پارلامەنتارالىق ىنتىماقتاستىعىمىز ەۋروپا كەڭەسىنىڭ, ەۋروپاداعى قاۋىپسىزدىك جانە ىنتىماقتاستىق ۇيىمىنىڭ, سونداي-اق پارلامەنتارالىق وداقتىڭ پارلامەنتتىك اسسامبلەيالارى اياسىندا دا كوپجاقتى فورماتتا دامىپ كەلەدى. ماجارستان بايقاۋشى رەتىندە قاتىساتىن تۇركى مەملەكەتتەرىنىڭ پارلامەنتتىك اسسامبلەياسى اياسىنداعى ءوزارا ءىس-قيمىلىمىز دا ەرەكشە ماڭىزعا يە», دەدى سەنات توراعاسى.
سۇحباتتاسۋشىلار Digital Bridge – 2025 حالىقارالىق تەحنولوگيالىق فورۋمىنىڭ كۇن تارتىبىنە – اقپاراتتىق تەحنولوگيالار, تسيفرلاندىرۋ جانە جاساندى ينتەللەكت سالاسىنداعى جاڭا تاسىلدەرگە ەرەكشە نازار اۋدارىپ, الداعى ىنتىماقتاستىقتىڭ, ونىڭ ىشىندە ءبىلىم بەرۋ سالاسىنداعى بىرلەسكەن ءىس-قيمىلدىڭ باسىمدىقتارىن بەلگىلەدى.
سونىمەن قاتار كەزدەسۋدە ساۋدا-ەكونوميكالىق, ينۆەستيتسيالىق ىنتىماقتاستىققا, مادەني-گۋمانيتارلىق بايلانىستاردى ارتتىرۋعا قاتىستى ماسەلەلەر تالقىلانىپ, ءتۇرلى سالادا بىرلەسكەن جوبالاردى ىسكە اسىرۋ بارىسى ءسوز بولدى. تاراپتار اۋىل شارۋاشىلىعى, تاماق ونەركاسىبى, ماشينا جاساۋ, كولىك, ەنەرگەتيكا, ينفراقۇرىلىم باعىتتارىن دامىتۋ جولىنداعى قازاقستان – ماجارستان ينۆەستيتسيالىق قورىنىڭ قىزمەتى جونىندە پىكىر الماستى.
م.اشىمباەۆ رۋحاني ديپلوماتيانى دامىتۋدىڭ ماڭىزىنا توقتالىپ, الەمدىك جانە ءداستۇرلى دىندەر كوشباسشىلارى سەزىنىڭ ماقساتتارىنا قول جەتكىزۋگە قوسقان ەلەۋلى ۇلەسى مەن كورسەتكەن بەلسەندى قولداۋى ءۇشىن ماجار تاراپىنا ريزاشىلىق ءبىلدىردى.
ءوز كەزەگىندە ت.شۋيوك ءبىزدىڭ ەلگە 30 جىل جالعاسىپ كەلە جاتقان جان-جاقتى ىنتىماقتاستىق ءۇشىن العىس ايتىپ, قازاقستان مەن ماجارستاننىڭ كوپتەگەن سالادا مۇددەسى مەن ۇستانىمى ۇقساس ەكەنىن تىلگە تيەك ەتتى. سونداي-اق ول باۋىرلاس ەلدەر اراسىنداعى ىنتىماقتاستىقتى ودان ءارى نىعايتۋعا بەيىل ەكەنىن جەتكىزدى.
