سۋرەت «ەگەمەن قازاقستاننىڭ» ارحيۆىنەن الىندى
ترانسكاسپي ءدالىزىنىڭ تىنىسى
«بىلتىر ءبىزدىڭ تەرريتوريامىز ارقىلى جۇك تاسىمالداۋ كولەمى 1 ملرد توننادان استى. سونىمەن قاتار ەلىمىزدىڭ ترانزيتتىك الەۋەتىن ارتتىرۋعا ءالى دە زور مۇمكىندىك بار. «سولتۇستىك – وڭتۇستىك» كولىك ءدالىزى پارسى شىعاناعى مەن وڭتۇستىك ازيا ەلدەرىنىڭ نارىعىنا تىكەلەي جول اشادى. ال «شىعىس – باتىس» ءدالىزى مەن قىتايدىڭ ء«بىر بەلدەۋ, ءبىر جول» جاھاندىق باستاماسى قازاقستاننىڭ ەۋرازياداعى نەگىزگى قۇرلىق جولى رەتىندەگى ءرولىن كۇشەيتە تۇسەدى», دەگەن ەدى پرەزيدەنت بيىلعى جولداۋىندا.
«قازاقستان تەمىر جولى» ۇلتتىق كومپانياسىنىڭ وندىرىستىك پروتسەستەر جونىندەگى باسقارۋشى ديرەكتورى باۋىرجان پازىلبەك ۇلىنىڭ سوزىنشە, جوبانى جۇزەگە اسىرۋ بارىسىندا 1,6 ملن-عا جۋىق تەمىرجول شپالى, 113,3 مىڭ توننا رەلس پەن ءتۇرلى ەلەكتر جابدىعى ءوندىرىلدى. 260-تان استام نىسان – كوپىر, سۋ وتكىزگىش قۇبىر مەن جول وتكەلدەرى سالىندى. قۇرىلىسقا 456 تەحنيكا, 1,5 مىڭنان استام قۇرىلىسشى, 7 مىڭعا جۋىق شاعىن جانە ورتا بيزنەس وكىلدەرى تارتىلدى.
ء«بىز تەك جاڭا جولدار سالىپ قويعان جوقپىز, سونىمەن قاتار ەل كومپانيالارىنا ۇلكەن مۇمكىندىك اشتىق. ولار بۇرىن-سوڭدى بولماعان كولەمدە تاپسىرىس ورىنداپ, ەرەكشە تاجىريبە جينادى. قازىر ءبىزدىڭ زاۋىتتار رەلس پەن شپال شىعارۋدى, ەلەكتر جابدىقتارىن ءوندىرۋدى تولىق جولعا قويدى. جەرگىلىكتى كاسىپورىنداردىڭ الەۋەتى ءوسىپ, بىلىكتى ماماندار قاتارى ارتتى. مۇنداي جوبالار وتاندىق ەكونوميكانىڭ مىقتى تىرەگىنە اينالادى», دەدى ول.
ايتۋىنشا, جاڭا جولداردىڭ پايدالانۋعا بەرىلۋى وسى ۋچاسكەنىڭ وتكىزۋ قابىلەتىن 5 ەسە ارتتىرادى.
«بۇرىن تاۋلىگىنە 12 جۇپ پويىز وتسە, ەندى 60 جۇپ پويىزعا دەيىن قابىلداپ, جىبەرە الامىز. بۇل – ەكسپورت كولەمىنىڭ ۇلعايۋىنا, قىتاي مەن ەۋروپا اراسىنداعى ترانزيتتىك تاسىمالداردىڭ وسۋىنە تىكەلەي ىقپال ەتەتىن قادام. ءبىز بۇل جوبانى ەلدىڭ ەكونوميكاسىن جاڭا دەڭگەيگە شىعاراتىن ستراتەگيالىق باستاما دەپ سانايمىز», دەدى باۋىرجان پازىلبەك ۇلى.
ستراتەگيالىق ءمانى جوعارى
كولىك ۆيتسە-ءمينيسترى جانىبەك تايجانوۆتىڭ ايتۋىنشا, بۇل ۋچاسكە ەلىمىزدى قىتايمەن دوستىق شەكارالىق بەكەتى ارقىلى بايلانىستىراتىندىقتان ترانزيتتىك جانە ەكسپورتتىق الەۋەتتى ارتتىرا تۇسەدى. ەكىنشىدەن, قوسىمشا جولدار جەتكىزۋ مەرزىمىن قىسقارتادى.
سۋرەتتى تۇسىرگەن – ەرلان ومار, «EQ»
«ۇشىنشىدەن, جوبا حالىقارالىق كولىك دالىزدەرىن دامىتۋعا ۇلەس قوسادى. قىتاي, ورتالىق ازيا, رەسەي, ەۋروپا, پارسى شىعاناعى ەلدەرىن بايلانىستىرادى. سايكەسىنشە, ەلىمىزدىڭ ايماقتىق حاب رەتىندەگى مارتەبەسىن بەكىتەدى. تورتىنشىدەن, ترانزيت كولەمىنىڭ ارتۋى ۆاليۋتالىق ءتۇسىمدى ۇلعايتادى, قوسىمشا ينفراقۇرىلىم قۇرىلىسىنا سەرپىن بەرەدى, ايماقتاردا جاڭا جۇمىس ورىندارى اشىلادى. بەسىنشىدەن, ستراتەگيالىق تەمىرجول تورابىن باقىلاۋدا ۇستاۋ جاھاندىق لوگيستيكالىق تىزبەكتەگى سەنىمدى سەرىكتەس رەتىندەگى ءرولىن كۇشەيتەدى», دەدى جانىبەك تايجانوۆ.
قورعاس باعىتى دا – باستى نازاردا
وسى جوبانىڭ ارقاسىندا قورعاس باعىتىنىڭ دا ماڭىزى ارتىپ وتىر. «تەمىرجول جوندەۋ» جشس باس ديرەكتورى ايبەك تەرەكباەۆتىڭ ايتۋىنشا, قازىر بۇل جەلى تاۋلىگىنە 16–18 جۇپ پويىزعا قىزمەت كورسەتىپ وتىر.
«الايدا بيىلدىڭ وزىندە 25-كە جۋىق ءوتىنىم ءتۇستى. سول سەبەپتى وتكىزۋ مۇمكىندىگىن ارتتىرۋ – ۋاقىت تالابى. ماسەلەنى شەشۋ ءۇشىن ۇزىندىعى 297 شاقىرىم بولاتىن اۋقىمدى جاڭعىرتۋ جوباسىن جۇزەگە اسىرىپ جاتىرمىز. جوبا اياسىندا جاڭا توراپتار سالىنىپ جاتىر ءارى اۆتوماتتى بۇعات جۇيەسى ەنگىزىلەدى. بۇل پويىزداردىڭ قوزعالىسىن ءتيىمدى باسقارۋعا, قاۋىپسىزدىكتى ارتتىرۋعا, تاسىمال ۋاقىتىن قىسقارتۋعا مۇمكىندىك بەرەدى», دەيدى كومپانيا باسشىسى. ونىڭ ايتۋىنشا, قورعاس باعىتىن كەڭەيتۋ ەلىمىزدى جاھاندىق تاسىمال جۇيەسىنە ەنگىزەدى. سەبەبى بۇل تار وتكەلدى شەشۋ قىتاي – ەۋروپا باعىتى بويىنشا ترانزيت كولەمىن ارتتىرىپ, ەلىمىزدىڭ نەگىزگى كولىك دالىزدەرىندەگى شەكتەۋلەردى جويادى.
