قازاق زاعيپتار قوعامىنىڭ مۇشەسى, وتىز جىلدان استام قوعامنىڭ وقۋ-وندىرىستىك كاسىپورنىندا ەسەلى ەڭبەك ەتكەن ءدىلداش امەنوۆا بۇرىنعى كوكشەتاۋ وبلىسى كراسنوارمەەتس اۋدانىنا قاراستى شوق جۇلدىزداي شاعىن عانا كوزاشار اۋىلىندا كوپبالالى وتباسىندا دۇنيەگە كەلگەن. اكەسى قابدوش ناۋرىزباي ۇلى – ەكىنشى دۇنيەجۇزىلىك سوعىس ارداگەرى. سوعىس اياقتالعاننان كەيىن اۋىل شارۋاشىلىعىن قالپىنا كەلتىرۋ باعىتىندا قيساپسىز ەڭبەك ەتكەن. كەيىنگى ۇرپاعىن دا ادال ەڭبەككە باۋلىعان. ءوزىنىڭ ەڭبەكقورلىعىمەن ونەگە بولعان. اناسى دا باۋىر ەتى بالالارىن تاربيەلەۋمەن بىرگە ساتۋشى بولىپ جۇمىس ىستەگەن. وتباسىنداعى جەتى بالانىڭ كەنجەسى – ءدىلداش قابدوشقىزى.
مەكتەپتە وقىپ جۇرگەن كەزىندە قاتار قۇربىنىڭ الدى بولدى. وقۋ وزاتى. اۋىلداعى سەگىزجىلدىق مەكتەپتى اياقتاعان سوڭ وبلىس ورتالىعىنداعى ساۋدا تەحنيكۋمىنا وقۋعا تۇسەدى. بولاشاق تاۋارتانۋشى. تاعدىردىڭ جولى بۇرالاڭ. ءبارى ءبىز ويلاعانداي بولا بەرمەيدى. 1984 جىلى قاپەلىمدە جول اپاتىنا ۇشىراعان.
– قوس جانارىم ەشتەڭە كورمەي قالدى, – دەيدى ءدىلداش قابدوشقىزى, – بالامىن عوي, تىم قاتتى قورىققان دا جوق شىعارمىن. جول اپاتى كەزىندە كوزىمە قان قۇيىلىپتى, سونىڭ اسەرى. ءبىر جاقسىسى, ول كەزدە قارا ورمانداي قالىڭ ەلدىڭ قايماعى بۇزىلماي تۇرعان ۋاقىتى. كەشەگى سىنىپتاستارىم كۇن سايىن كەلىپ, كوڭىلىمدى اۋلايدى, اڭگىمە-دۇكەن قۇرامىز. سول ساتتە ءبىرىنشى توپتاعى مۇگەدەك ەكەنىمدى دە ۇمىتىپ كەتەمىن. مەنىڭ جارىق دۇنيەدەن اق ساۋلە ىزدەگەن جانارىم جانىمداعى جاناشىر قۇربىلارىم ءتارىزدى.
ەڭبەك جولىن 1988 جىلى كوكشەتاۋ قالاسىنداعى قازاق زاعيپتار قوعامىنىڭ مۇشەسى بولعاننان كەيىن باستادى. وقۋ-وندىرىستىك كاسىپورنىنىڭ قۋىرشاق اربا تسەحىنا جۇمىسشى رەتىندە قابىلداندى. كاسىپورىن تسەحتارىندا ماتراس, جاستىق تىگىلەتىن, كارتون تسەحىندا قوراپتار جينالاتىن. ايتەۋىر جۇمىس قايناپ جاتتى. تاڭەرتەڭنەن كەشكە دەيىن باس كوتەرمەي ەڭبەك ەتەتىن. سويتە ءجۇرىپ ءوزى سەكىلدى زاعيپ جاندارمەن بىرگە كونتسەرتتىك باعدارلامالار قاراپ, كوڭىل كوتەرەتىن. 2005 جىلى تۇرمىسقا شىقتى. ومىرگە ۇلى كەلدى. ول قازىر قازاق-بريتان ۋنيۆەرسيتەتىنىڭ ستۋدەنتى. ءومىرىنىڭ جالعاسى, كوزىنىڭ قاراسى.
ەلگەزەك جان ەلىمىزدىڭ جەڭىل ونەركاسىبىن دامىتۋعا قوسقان ۇلەسى ءۇشىن سان مارتە العىسحاتتارمەن ماراپاتتالدى. تاعدىردىڭ سالعان ىسىنە توتەپ بەرە ءجۇرىپ, كوڭىلى قالاعان ونەرىن دە ەش ۇمىتقان ەمەس. قولى قالت ەتكەندە ادەمى داۋسىمەن تامىلجىتىپ ءان شىرقايدى. جانىنا جىگەر بەرەتىن دە وسى ونەر. جانارى كورمەگەنمەن, قىزىلدى-جاسىلدى بوياۋى كوپ عۇمىر اتتى الەمدى جان جۇرەگىمەن سەزىنەدى. 2024 جىلعى قاراشادا زاعيپتار قوعامىنىڭ مۇشەلەرى اراسىندا وتكەن رەسپۋبليكالىق «اباي الەمى» بايقاۋىنا قاتىسىپ, وبلىس نامىسىن قورعادى.
تىرشىلىكتە پەندەنىڭ اياعىنا تۇساۋ سالعىسى كەلگەن تاعدىردىڭ تار قامىتىن ادام بويىنداعى ادالدىق پەن ومىرگە دەگەن قۇشتارلىق جەڭەدى ەكەن. ءدىلداش قابدوشقىزىنىڭ ءومىر تۋرالى ونەگەسىنە قانىعا وتىرىپ ءبىز وسىنى ۇعىندىق.
كوكشەتاۋ
