بيىل ۇستازدار كۇنى مەرەكەسى ماڭعىستاۋلىقتارعا جاعىمدى جاڭالىقپەن باستالدى. ماڭعىستاۋلىقتار كەڭىنەن تانيتىن ازامات, بەلگىلى ۇستاز قۋانتقان ۆانوۆ مەملەكەت باسشىسىنىڭ قولىنان «قازاقستاننىڭ ەڭبەك سىڭىرگەن ۇستازى» قۇرمەتتى اتاعىن الدى.
1974 جىلى گۋرەۆ پەداگوگيكالىق ينستيتۋتىن ماتەماتيكا ءپانىنىڭ مۇعالىمى ماماندىعى بويىنشا ۇزدىك بىتىرگەن مامان 1974 جىلدان 2004 جىلعا دەيىنگى ارالىقتا ماڭعىستاۋ وبلىسىنداعى ە.ايشۋاق ۇلى اتىنداعى ورتا مەكتەپتە ماتەماتيكا پانىنەن ساباق بەردى.
ونىڭ ماتەماتيكا ساباعىندا قولدانۋ ءۇشىن ويلاپ تاپقان «دەمونستراتسيالىق تاقتا», «بەساسپاپ تسيركۋل» اتتى قۇرالدارى 1990 جىلى بۇكىلوداقتىق ونەرتاپقىشتار كونكۋرسىنىڭ قۇرمەت گراموتاسىنا يە بولدى. ول ماتەماتيكانى وقىتۋدا قولدانىلاتىن دونەتسكىلىك پەداگوگ ۆ.شاتالوۆ ادىستەمەسىن زەردەلەۋمەن اينالىسىپ, ونى جەتىلدىرۋ ارقىلى «وزگەرمەلى سۇيەنىش جازبا», «باعالاۋدىڭ ەكىلىك جۇيەسى» سياقتى وزىندىك ادىستەمەسىن ويلاپ شىعاردى. 1988–1990 جىلدارى ماڭعىستاۋ وبلىسىندا ونىڭ ماتەماتيكانى وقىتۋ ادىستەمەسى بويىنشا قۇرىلعان وزات تاجىريبە مەكتەبى جۇمىس ىستەپ, وزات ۇستازدىڭ تاجىريبەسى اقتوبەدە وتكەن ۇستازدار سلەتىندە قولداۋ تاپتى. سونداي-اق پاۆلودار وبلىسىندا وتكەن رەسپۋبليكالىق پەداگوگيكالىق وقۋدا جۇلدەگەر اتاندى.
تاجىريبەلى مۇعالىم ەگەمەن ەلىمىزدەگى ورتا مەكتەپتىڭ العاشقى ماتەماتيكا وقۋلىقتارىنىڭ اۆتورى. ونىڭ «ماتەماتيكا-5» وقۋلىعىنىڭ العاشقى باسىلىمى 1993 جىلى, «ماتەماتيكا-6» وقۋلىعى 1994 جىلى جارىق كوردى. بۇل وقۋلىقتار 1993 جىلدان 2000 جىلعا دەيىن رەسپۋبليكا مەكتەپتەرىندە جانە كەيبىر شەتەلدەگى قازاق مەكتەپتەرىندە قولدانىلدى. ال 1985–2000 جىلدارى ماڭعىستاۋ وبلىستىق مۇعالىمدەر ءبىلىمىن جەتىلدىرۋ ينستيتۋتىنىڭ تۇراقتى لەكتورى بولىپ, رەسپۋبليكامىزدىڭ بىرنەشە وبلىسىندا ءوزىنىڭ تاجىريبەسى مەن وقۋلىقتارى بويىنشا ارناۋلى كۋرس وتكىزدى.
«جىگىتكە جەتى ونەر دە از» دەگەندەي, ماتەماتيكانىڭ مايىن ىشكەن قۋانتقان رزا ۇلى كەيىنگى كەزدە دىبىستانۋ سالاسىمەن, ءالىپبي ءتۇزۋ ماسەلەلەرىمەن اينالىسىپ ءجۇر. بۇل ورايداعى ەڭبەكتەرى مەرزىمدى ءباسپاسوز بەن بىرنەشە رەسپۋبليكالىق, حالىقارالىق كونفەرەنتسيالار جيناعىندا جارىق كورگەن. جاقىندا ونىڭ تىلگە قاتىستى ەڭبەكتەرى «ەملەمىزدەگى قايشىلىقتار جانە فونەتيكالىق ءالىپبيدىڭ ارتىقشىلىعى» دەگەن اتاۋمەن جەكە كىتاپ بولىپ شىقتى.
تاعى ءبىر ايرىقشا ونەرى – سازگەر ءارى ءانشى. باياننىڭ قۇلاعىندا ويناپ, الۋان ءاندى شىرقايتىن قۋانتقان رزا ۇلىنىڭ بالالار مەن ۇلكەندەرگە ارنالعان كوپتەگەن ءانى بار. ماڭعىستاۋ وبلىسىنىڭ بىرنەشە مەكتەبى ونىڭ ء«بىز – جاس ۇلان», «قاينارى ءبىلىمنىڭ» اندەرىن مەكتەپ ءانۇرانى رەتىندە پايدالانىپ جۇرسە, «جاس ۇلاندار جىرى» وبلىس جاس ۇلاندارىنىڭ, ال «ۇستازدار ءانى» وبلىس ۇستازدارىنىڭ گيمنى بولىپ سانالادى. ونىڭ اندەرى بويىنشا ماڭعىستاۋ وبلىسىندا ەكى رەت ارنايى شىعارماشىلىق كەش وتكىزىلسە, ء«ان لەبىز» دەگەن اتپەن 30 شاقتى جەكە تۋىندىلارى توپتاستىرىلعان ءان جيناعى جارىق كوردى.
بۇگىندە ماڭعىستاۋ وبلىسىنىڭ بىرنەشە مەكتەبىندە ق.ۆانوۆ اتىنداعى كابينەت اشىلىپ, مۇنايلى اۋدانىندا ءبىراز جىلدان بەرى ونىڭ اتىنداعى وقۋشىلار وليمپياداسى ءوتىپ كەلەدى. ال تۇپقاراعان اۋدانىندا ق.ۆانوۆ اتىنداعى مۇعالىمدەر وليمپياداسى وتكىزىلەدى.
«ادام جۇمىستى ماراپات ءۇشىن ىستەمەيدى, بىراق ەڭبەگىڭ ءۇشىن ماراپات الىپ جاتساڭ, ول كوڭىلىڭدى كوتەرەدى, جاڭا جۇمىسقا شابىتتاندىرادى, بەرىلگەن اتاققا ساي بولعىڭ كەلەدى. بۇرىن جاساعان ازعانتاي ەڭبەگىمىزدى ۇمىتپاي ەلەپ-ەسكەرىپ, جوعارى ماراپات بەرگەن ەل باسشىلىعىنا ىرزالىعىم شەكسىز, راحمەت ايتامىن!», دەيدى ۇلاعاتتى ۇستاز اعىنان اقتارىلىپ.
ماڭعىستاۋ وبلىسى
