بۇل تۋرالى استانادا ءوتىپ جاتقان Digital Bridge 2025 فورۋمىنىڭ كۋلۋارىندا جاساندى ينتەللەكت جانە تسيفرلىق دامۋ ۆيتسە-ءمينيسترىنىڭ مىندەتىن اتقارۋشى روستيسلاۆ كونياشكين مالىمدەدى.
ۆيتسە-ءمينيستردىڭ ايتۋىنشا, eGov Mobile ءموبيلدى قوسىمشاسىندا جاساندى ينتەللەكت نەگىزىندەگى چات-كەڭەسشى جۇمىس ىستەپ تۇر. ول ازاماتتارعا قاجەتتى قىزمەت ءتۇرىن انىقتاۋعا جانە ونى الۋ ءتارتىبىن تۇسىندىرۋگە كومەكتەسەدى.
وكىنىشكە قاراي, كەيدە ازاماتتار ءدال وسى ساتتە قانداي قىزمەتتى الۋ كەرەگىن ناقتى بىلمەي جاتادى. سوندىقتان بۇل كەڭەسشى ەڭ الدىمەن ىزدەۋ فۋنكتسياسىن اتقارىپ, مەملەكەتتىك قىزمەتتى قالاي راسىمدەۋگە بولاتىنىن تۇسىندىرەدى, – دەدى كونياشكين.
سونىمەن قاتار ول تسيفرلاندىرۋدىڭ تاعى ءبىر باعىتى – مەملەكەتتىك ورگانداردىڭ ىشكى پروتسەستەرىن وڭتايلاندىرۋ دەپ اتادى. بىرقاتار قىزمەتتەردە ارتىق قادامدار, سونىڭ ىشىندە كوميسسيا وتىرىستارى مەن قوسىمشا قۇجات تالاپ ەتۋ تاجىريبەسى الىنىپ تاستالماق.
بۇدان بولەك, 1414 بايلانىس ورتالىعىندا پيلوتتىق جوبا ىسكە قوسىلدى: ءار ەلۋىنشى قوڭىراۋدى جاساندى ينتەللەكت وڭدەيدى. جي-اسسيستەنت ازاماتتاردىڭ سۇراقتارىنا جاۋاپ بەرىپ, كەڭەس بەرەدى, سونداي-اق كەيبىر مەملەكەتتىك قىزمەت تۇرلەرىن دە كورسەتە الادى. الداعى ۋاقىتتا بۇل تەحنولوگيانى كەڭىنەن ەنگىزۋ ارقىلى مەملەكەت پەن حالىق اراسىنداعى ءوزارا ارەكەتتەستىكتىڭ ساپاسى مەن قولايلىلىعىن ارتتىرۋ جوسپارلانىپ وتىر.
