مەملەكەت باسشىسى ماجارستان پرەزيدەنتىنىڭ قازاقستانعا العاشقى رەسمي ساپارىن ەكى ەل قارىم-قاتىناسىنىڭ جاڭا بەلەسى دەپ قابىلدايتىنىن ايتتى.
سونىمەن قاتار استانادا وتكەن Digital Bridge 2025 حالىقارالىق فورۋمىنا ارنايى كەلىپ قاتىسقانى جانە جاساندى ينتەللەكت جونىندە وي-پىكىرىن بولىسكەنى ءۇشىن تاماش شۋيوكقا شىنايى ريزاشىلىعىن ءبىلدىردى.
– ءبىز – تامىرى ءبىر اعايىن جۇرتپىز. ماجارستان – قازاقستاننىڭ تاۋەلسىزدىگىن العاش مويىنداعان ەلدىڭ ءبىرى. سونداي-اق بىزبەن ستراتەگيالىق ارىپتەستىك ورناتقان ەۋروپا وداعىنداعى تۇڭعىش مەملەكەت. قازاقستان ەگەمەن ەل رەتىندەگى العاشقى ەلشىلىگىن بۋداپەشت قالاسىندا اشقان بولاتىن. بۇگىندە ەلدەرىمىز اراسىنداعى ساياسي ديالوگ جوعارى دەڭگەيدە ءجۇرىپ جاتىر. مەملەكەتتەرىمىز بارلىق سالادا اشىق ءارى ءوزارا سەنىمگە نەگىزدەلگەن بايلانىس ورناتتى. ساۋدا-ەكونوميكا جانە ينۆەستيتسيا سالاسىنداعى ىنتىماقتاستىق نىعايىپ كەلەدى. ەكى ەلدىڭ قارىم-قاتىناسىنا ارقاۋ بولعان شارتتىق-قۇقىقتىق نەگىز قالىپتاستى. حالىقارالىق ۇيىمدار اياسىنداعى ىقپالداستىق كەڭەيدى. بىلتىر قاراشادا بۋداپەشتكە جاساعان مەملەكەتتىك ساپارىمنىڭ قورىتىندىلارى – وسىنىڭ ايقىن دالەلى. مىزعىماس دوستىق پەن ءوزارا قولداۋعا نەگىزدەلگەن سەرىكتەستىگىمىز الداعى ۋاقىتتا دا تابىستى بولادى دەپ سەنەمىن. وسى وڭ ۇردىسكە ماجارستان پرەزيدەنتىنىڭ قوسقان ەلەۋلى ۇلەسىن وتە جوعارى باعالايمىن. سوندىقتان بۇگىن جوعارى مارتەبەلى پرەزيدەنت تاماش شۋيوكتى ءى دارەجەلى «دوستىق» وردەنىمەن ماراپاتتاۋ مەن ءۇشىن ۇلكەن مارتەبە بولدى, – دەدى قازاقستان پرەزيدەنتى.
قاسىم-جومارت توقاەۆ تاماش شۋيوكپەن كەڭەيتىلگەن قۇرامدا مازمۇندى كەلىسسوزدەر جۇرگىزىپ, ىقپالداستىقتى كۇشەيتۋدىڭ جاڭا باعىتتارى تۋرالى اڭگىمەلەسكەنىن جەتكىزدى.
تاراپتار ساۋدا-ەكونوميكا سالاسىنداعى بايلانىستى دامىتا ءتۇسۋ قاجەت ەكەنىنە باسا نازار اۋدارعان.
– بىلتىر ەكى ەلدىڭ الىس-بەرىسى 200 ميلليون دوللار شاماسىندا بولدى. كەلەشەكتە ونى 1 ميلليارد دوللارعا دەيىن جەتكىزۋدى كوزدەپ وتىرمىز. ماجارستان سوڭعى 20 جىلدا ەلىمىزدىڭ ەكونوميكاسىنا 385 ميلليون دوللاردان استام ينۆەستيتسيا سالدى. MOL كومپانياسى قازاقستاننىڭ گاز سالاسىندا تابىستى جۇمىس ىستەپ جاتىر. كۇن تاربىندە تاعى دا باسقا اۋقىمدى جوبالار بار. ەلىمىزدە UBM Group, Gedeon Richter, Globalia سياقتى الپاۋىت كومپانيالار دا جۇمىس جۇرگىزۋدە. قازىرگى تاڭدا 20 ورتاق جوبانى جۇزەگە اسىرىپ جاتىرمىز. ءبىز ينۆەستيتسيالىق قارىم-قاتىناستارىمىزدى ودان ءارى كەڭەيتۋگە مۇددەلىمىز. وسى رەتتە, ەنەرگەتيكا, اتوم ونەركاسىبى, اۋىل شارۋاشىلىعى سياقتى ءتۇرلى باعىتتاعى ىقپالداستىعىمىزدى ارتتىرۋعا ۋاعدالاستىق, – دەدى قاسىم-جومارت توقاەۆ.
مەملەكەت باسشىسىنىڭ ايتۋىنشا, كەلىسسوزدەر بارىسىندا حالىقارالىق كولىك دالىزدەرىن, لوگيستيكا ينفراقۇرىلىمىن دامىتۋدىڭ ماڭىزىنا ءمان بەرىلگەن.
– بيىل شىمكەنتتەن بۋداپەشتكە تىكەلەي اۋە قاتىناسى اشىلدى. ەندى ەكى ەل استانالارى اراسىنداعى اۋە قاتىناسىن قايتا ورناتۋ مۇمكىندىگىن قاراستىرامىز دەپ كەلىستىك. كەلىسسوز اياسىندا جاساندى ينتەللەكتىنى جانە تسيفرلىق تەحنولوگيانى ەكونوميكاعا جاپپاي ەنگىزۋدىڭ ماڭىزدىلىعىنا باسا ءمان بەردىك. وسىعان وراي, بىرلەسە جۇمىس ىستەۋگە دايىن ەكەنىمىزدى جەتكىزدىك. وعان قوسا قارجى سالاسىنا قاتىستى تىڭ جوبالاردى جۇزەگە اسىرۋعا ۋاعدالاستىق. جالپى, قازاقستاندا جۇمىس ىستەۋگە نيەتتى ماجار كومپانيالارى ءۇشىن قولايلى جاعداي جاساۋعا دايىن ەكەنىمىزدى جەتكىزدىم. ەكى ەلدىڭ ەكونوميكالىق ىنتىماقتاستىق جونىندەگى ۇكىمەتارالىق كوميسسياسى جانە ىسكەرلىك كەڭەسى وسى ماسەلەگە باسا ءمان بەرۋى قاجەت دەپ سانايمىن, – دەدى مەملەكەت باسشىسى.
