ونىڭ ايتۋىنشا, ءورىستى ونەرىمىز بەن ۇلتتىق مۇرامىزدىڭ ۇرپاقتان ۇرپاققا جالعاسۋى ون ساۋساعىنان ونەر تامعان شەبەرلەردىڭ ەڭبەگىمەن تىكەلەي بايلانىستى. سونىڭ ىشىندە مۋزىكالىق اسپاپ شەبەرلەرى – ۇلتتىق مۇرانى ساقتاۋشى ءارى زەرتتەۋشى رەتىندە تانىلىپ, جاڭا اسپاپ ۇلگىلەرىن جاساۋعا, اكۋستيكا مەن مۋزىكالىق ارحەولوگيانىڭ دامۋىنا زور ۇلەس قوسقان.
«وتكەن عاسىرلاردا شەبەرحانالار مەن زەرتحانالاردا كونە اسپاپتار قالپىنا كەلتىرىلىپ, ءتىپتى دومبىرا جاسايتىن فابريكالار جۇمىس ىستەگەن. وكىنىشكە قاراي, وتپەلى كەزەڭدە بۇل ءوندىرىس وشاقتارى جابىلىپ قالدى», – دەدى سەناتور.
دارحان قىدىرالىنىڭ سوزىنشە, مەملەكەت باسشىسىنىڭ تاپسىرماسىمەن دومبىرا كۇنى ەنگىزىلگەننەن كەيىن ۇلتتىق اسپاپقا دەگەن قۇرمەت ارتا ءتۇستى. كەرەمەت كۇيشىلەر مەن ايگىلى انشىلەر ءتۇرلى ماراپاتتارعا يە بولىپ جاتسا دا, سول اسپاپتاردى جاساۋشى شەبەرلەر مەملەكەت نازارىنان تىس قالىپ كەلەدى.
سەناتور مىسال رەتىندە «قازاقتىڭ ءستراديۆاريى» اتانعان قامار قاسىموۆتىڭ ەسىمى كوپ ۇمىت قالعانىن ايتتى. سونداي-اق نۇرعيسا تىلەنديەۆ پەن سەكەن تۇرىسبەكوۆتىڭ دومبىرالارىن جاساعان اعايىندى رومانەنكولاردىڭ, ۇلتتىق اسپاپتاردى قايتا جاڭعىرتقان بولات سارىباەۆتىڭ ەڭبەگىن كوپشىلىك بىلە بەرمەيتىنىن اتاپ ءوتتى.
«سوڭعى 30 جىلدا شەبەردىڭ قوعامداعى ورنى ەنتۋزياستىڭ رولىنە الماستى. كوپشىلىگى جەكە شەبەرحانالاردا تازا ىقىلاس پەن كاسىبي ار-نامىسقا سۇيەنىپ ەڭبەك ەتەدى. جولاۋشى تۇردىعۇلوۆ, ناربەك وحانوۆ, قانات قازاقباەۆ, سۇلتان مۇساەۆ, مەيىربەك ءدىلمانوۆ, ەردوس راحىمبەك جانە وزگە دە ونداعان شەبەردىڭم اڭداي تەرى – ۇلتتىق مۋزىكا يندۋسترياسىنىڭ كوزگە كورىنبەيتىن, بىراق شەشۋشى ىرگەتاسى», – دەدى سەناتور.
دارحان قىدىرالى قازىرگى تاڭدا حالىق ارتىستەرى مەن ونەر مايتالماندارى قولدانىپ جۇرگەن اسپاپتاردىڭ ءبارى دە شەبەرلەردىڭ قولتاڭباسى ەكەنىن, الايدا ولاردىڭ ەڭبەگى ەلەنبەي كەلە جاتقانىن جەتكىزدى.
«شەبەرلىك – تەك اعاش وڭدەۋ ەمەس, ول عىلىمي-ەكسپەريمەنتتىك پروتسەسس. شەبەرلەر كونە ۇلگىلەردى جاڭعىرتىپ, رەكونسترۋكتسيانى عىلىمي دالدىكپەن, مودەرنيزاتسيانى ونەر تالعامىمەن ۇيلەستىرىپ كەلەدى», – دەدى ول.
سەناتور وقۋ ورىندارىنداعى دومبىرا ساپاسىنا قاتىستى ماسەلەنى دە كوتەردى. ونىڭ ايتۋىنشا, كەي تەندەرلەردە كورشى ەلدەردە جاسالعان ساپاسىز دومبىرالار وتكىزىلىپ, ۇلتتىق اسپاپتىڭ بەدەلىنە نۇقسان كەلتىرىپ وتىر.
«وكىنىشكە قاراي, ۇلتتىق اسپابىمىزعا بالىق اۋلايتىن ارزانقول ءجىپ تاعىلىپ, بابادان جەتكەن داستۇردەن قول ءۇزىپ قالا جازدادىق. بۇگىنگى بۋىن شەبەرلىككە ەرەكشە ىقىلاس تانىتىپ وتىر. ءداستۇرلى ىشەكتەردى قايتا جانداندىرۋ ۇدەرىسى قارقىن الدى. بۇل – وتپەلى قىزىعۋشىلىق ەمەس, تۇراقتى ءۇردىس», – دەدى سەناتور.
دارحان قىدىرالى مۋزىكالىق اسپاپ شەبەرلەرىنىڭ ۇلتتىق ونەردىڭ تىرەگى, ۇلتتىق دىبىستىڭ ساقشىلارى ەكەنىن اتاپ ءوتىپ, ۇكىمەتكە مىناداي ۇسىنىستارىن جەتكىزدى:
- «مۋزىكالىق اسپاپ شەبەرى, ۇستا» سياقتى ۇلتتىق كاسىبي مارتەبە ەنگىزۋ;
- شەبەرحانا-زەرتحانالاردى جاڭعىرتۋ, زەرتتەۋ ورتالىعىن اشۋ;
- ۇلتتىق رەگيستر, اكۋستيكالىق پاسپورت, ستاندارتتاۋ مەن سەرتيفيكاتتاۋ جۇيەسىن ەنگىزۋ;
- ارنايى مۋزىكالىق اسپاپ شەبەرى ماماندىعىن اشۋ;
- ۇستاز بەن شاكىرت شەبەرلەردى گرانتتىق قولداۋ;
- ۇزاق مەرزىمدى كەلىسىمشارتتار جاساۋ;
- سالىق جەڭىلدىكتەرىن قاراستىرۋ;
- ارنايى ۆەدومستۆولىق ماراپات ەنگىزۋ;
- قامار قاسىموۆ اتىنداعى رەسپۋبليكالىق مۋزىكالىق شەبەرلەر كونكۋرسىن وتكىزۋ;
- شەبەرلەردىڭ ەڭبەگىن اقپاراتتىق تۇرعىدا كەڭىنەن ناسيحاتتاۋ.
