ارداگەرلەر ورتالىعىنىڭ جالپى اۋماعى 5 مىڭ شارشى مەتردەن اسادى. مۇندا زەينەتكەرلەردىڭ بوس ۋاقىتىن ءتيىمدى وتكىزۋىنە بارلىق جاعداي جاسالعان. عيماراتتىڭ اۋلاسى اباتتاندىرىلىپ, ارنايى دەمالىس الاڭشالارى سالىندى. باۋ-باقشا جانىنان تەررەنكۋر ورناتىلىپ, سكانديناۆيالىق سەرۋەندەۋ جولى قاراستىرىلعان. جاڭا ورتالىق ءبىر اۋىسىمدا 200 ادامدى قابىلداي الادى.
قازىنالى قاريالاردىڭ يگىلىگىنە بەرىلگەن عيماراتتىڭ اشىلۋ سالتاناتىنا وبلىس اكىمى نۇرالحان كوشەروۆ قاتىسىپ, كوپشىلىكتى ايتۋلى مەرەكەمەن قۇتتىقتادى. قارتتار كۇنىنە وراي مەرەكەلىك داستارقان جايىلىپ, ارداگەرلەر مەن زەينەتكەرلەرگە كونتسەرتتىك باعدارلاما ۇسىنىلدى. ماراپاتتار تاپسىرىلدى.
ايتا كەتەيىك, وبلىستا 200 مىڭنان اسا زەينەتكەر بار, 100 جاستان اسقان 51 قاريا تۇرادى. قاريالاردىڭ ءومىر ءسۇرۋ ساپاسىن جاقسارتۋ ءۇشىن وڭىردە 21 «بەلسەندى ۇزاق ءومىر ءسۇرۋ» ورتالىعى جۇمىس ىستەيدى. ول مەكەمەلەردە 10 مىڭنان استام زەينەتكەر تىنىعىپ, ۋاقىتتارىن ءتيىمدى وتكىزىپ ءجۇر. جىل سايىن 8 مىڭعا جۋىق قاريا وبلىستىق بيۋدجەت ەسەبىنەن دەمالىس ورىندارىندا دەمالىپ, دەنساۋلىعىن تۇزەيدى.
