ساڭلاقتار الاڭنان كەتتى

ءبىرىنشى بولىپ شىڭعىس ەسەنامانوۆ مالىمدەمە جاسادى. الەۋمەتتىك جەلىدە ول: «دوستار, مەن 16 جىل بويى ەلىمىزدىڭ قۇراماسى ساپىندا ونەر كورسەتتىم. سول ارالىقتا جەڭىس تە, جەڭىلىس تە بولدى. جانكۇيەرلەر ءبىزدى اركەز قولداپ وتىردى. سول ءۇشىن دە بارشاڭىزعا العىس ايتقىم كەلەدى. ماعان ەڭ باستىسى, ۇلتتىق كوماندانىڭ جەيدەسىن كيىپ, الەمنىڭ ءار قيىرىندا وتكەن بايراقتى باسەكەلەردە ءوز ەلىمىزدىڭ ءانۇرانىن شىرقاتۋ ەدى. ول ارمانىما جەتتىم. ەندى قوش ايتىساتىن كەز كەلدى», دەگەن جازبا قالدىردى.

1989 جىلى قاراعاندى قالاسىندا دۇنيەگە كەلگەن شىڭعىس ءبىراز شىڭدى باعىندىردى. سپورتتىق مانسابىن جەرگىلىكتى «تۇلپاردا» باستادى. جەتى جىل بويى سول كوماندانىڭ نامىسىن قورعاپ, التى رەت ەل بىرىنشىلىگىنىڭ كۇمىس جۇلدەگەرى اتاندى, ءبىر رەت قولا مەدال يەلەندى. كۋبوكتىك سايىستا ەكى مارتە باس جۇلدەنى ولجالادى. 2012, 2015 جىلدارى ەلىمىزدىڭ ەڭ ۇزدىك فۋتزالشىسى دەپ تانىلدى. ودان كەيىن سەگىز جىل «قايراتتىڭ» ساپىندا وينادى. الماتىلىقتارمەن بىرگە تالاي ءدۇبىرلى دودادا دارالاندى. ۋەفا كۋبوگى مەن سۋپەركۋبوگىن جەڭىپ الدى. 2009–2015 جىلدار ارالىعىندا ەل قۇراماسىنىڭ ساپىندا جاسىنداي جارقىلدادى. 2016 جىلى ەۋروپا چەمپيوناتىنىڭ قولا جۇلدەگەرى اتاندى. ۇلتتىق كوماندا ساپىندا شىڭعىس بارلىعى 116 كەزدەسۋ وتكىزدى. بۇل – رەكوردتىق كورسەتكىش. سول ويىنداردا 33 رەت مەرگەندىك تانىتتى. ەندى مىنە, 36 جاستاعى امبەباپ فۋتزالشى ءوز ورنىن وكشەلەپ كەلە جاتقان جاستارعا بوساتۋدى ءجون كوردى.

ش.ەسەنامانوۆپەن بىرگە دۋگلاس جۋنيور دا قازاقستان قۇراماسى ساپىنداعى مانسابىن اياقتايتىنىن مالىمدەدى. ونىڭ دا جاسى 36-دا. ۇزاق ۋاقىت چەحيادا ونەر كورسەتكەن برازيليالىق لەگيونەر 2014 جىلى «قايراتتىڭ» جەيدەسىن كيدى. 10 ماۋسىم بويى كلۋبتىڭ تاسقامال قورعاۋشىسى بولدى. 2015 جىلى قازاقستاننىڭ ازاماتتىعىن قابىلادى. فۋتزالدا دۋگلاستىڭ دا باعىندىرماعان بەلەسى جوق. 10 جىل ىشىندە 91 رەت الاڭعا شىققان ول 65 مارتە مەرگەندىك تانىتىپ, جاڭا رەكورد جاسادى. قازىردە جۋنيور ساۋد ارابياسىنىڭ «الا-ۋلا» كلۋبىنىڭ نامىسىن قورعاپ ءجۇر.

كوپ كەشىكپەي لەو مەندونكا ەلىمىزدەن كەتەتىنىن ايتتى. 38 جاستاعى برازيليالىق فۋتزالشى جۇلدىزدى كەزەڭىن «قايراتتا» وتكىزدى. الماتىلىق كوماندانىڭ ساپىندا كوپتەگەن جەتىستىككە قول جەتكىزدى. 2015 جىلدان بەرى مەندوكا حالىقارالىق دودالاردا ەلىمىزدىڭ اتىنان سىنعا تۇسە باستادى. قول جەتكىزگەن تابىستارى تولاعاي. كەيىننەن پورتۋگاليانىڭ «سپورتينگىنە» اۋىستى.

«مەن مۇندا كەلگەن بەتتە الاتاۋ باۋرايىنداعى اسەم شاھار بىردەن وزىنە باۋراپ الدى. جەرگىلىكتى حالىقتىڭ قاراپايىمدىلىعى مەن قوناقجايلىعىنا ءتانتى بولدىم. قازاقستاندى كيماي كەتىپ بارامىن. بارشاڭىزعا مىڭ العىس. سىزدەردىڭ ارقالارىڭىزدا ەل تانيتىن ازاماتقا, الەمدىك دەڭگەيدە مويىندالعان فۋتزالشىعا اينالدىم», دەپ لەو الەۋمەتتىك جەلى ارقىلى ءوزىنىڭ اقجارما كوڭىلىن ءبىلدىردى.