ادام تۇسىنبەيتىن ءجايت

كوپتەن بەرى رەسەيدىڭ كراسنودار ولكەسى گۋلكەۆيچ اۋدانىنىڭ تۇرعىن­دارى اراسىندا جەرگىلىكتى پوليتسيا بولىمشەسىنىڭ شاتىرىندا ادامنىڭ ءمايىتى بار دەگەن قاۋەسەت تاراپ جۇرگەن بولاتىن. جەرگىلىكتى تۇرعىندار سەرگەي زەمتسوۆ پەن ۆيكتور مارتىنوۆ ماسەلەنىڭ ءمان-جايىن انىقتاۋ ءۇشىن اۋدان بيلىگىنەن وسى جونىندە قانداي دا ءبىر تۇسىنىك بەرۋلەرىن سۇراعان. الايدا, جەرگىلىكتى بيلىك پەن پوليتسيادان جاۋاپ قايتپاعان سوڭ, بەلسەندى ازاماتتار رەسەي ىشكى ىستەر ءمينيسترى ۆلاديمير كولوكولتسەۆتىڭ اتىنا حات جازعان. وسىدان كەيىن ىشكى ىستەر مينيس­ترلىگىنىڭ كۋبان وبلىسى بويىنشا باس باسقارماسى اتالمىش وقيعانى تەكسەرۋگە كىرىسكەن. سودان بىرنەشە كۇننەن سوڭ سەرگەي زەمتسوۆقا پوليتسيا بولىمشەسىنىڭ شاتىرىنان ادامنىڭ ءمايىتى تابىلعانىن رەسمي تۇردە راستاعان حات كەلدى. «قازىر بەلگىلى بولعانداي, شاتىردان تابىلعان ادام 38-40 جىل بۇرىن كوز جۇمعان ەكەن. ونىڭ قالاي قايتىس بولعانى, كىم ەكەنى ازىرگە انىقتالعان جوق», – دەپ مالىمدەدى ولكەلىك تەرگەۋ باسقارماسى باسشىسىنىڭ اعا كومەكشىسى ناتاليا سمياتسكايا. رەسەي فەدەراتسياسى تەرگەۋ كوميتە­تىنىڭ وڭىرلىك تەرگەۋ باسقارماسى اتالمىش دەرەك بويىنشا «كىسى ءولتىرۋ» بابىنا سايكەس قىلمىستىق ءىس قوزعادى. قۇقىق قورعاۋشىلار ونىڭ قالاي ولگەنىن, وسى كۇنگە دەيىن مۇردەسى نەلىكتەن تابىل­ماعانىن انىقتاۋعا تىرىسۋدا. ايدار ورىسباەۆ.