ستاتيستيكاعا زەر سالساق, قازاقستانداعى تۇرعىن ءۇي قۇرىلىس جيناق جۇيەسىنە كۇن سايىن 2 500 ادام ءوز جيناقتارىن سەنىپ تاپسىرادى. بۇل – ەلدە ەڭبەك ەتىپ جۇرگەن ءاربىر ءۇشىنشى ازامات قولجەتىمدى شارتتارمەن بولاشاقتا باسپانالى بولۋ ءۇشىن وتباسى بانكىنە جۇگىنەدى دەگەن ءسوز. بانك كۇن سايىن شامامەن 2 500 جاڭا دەپوزيت اشىپ, 190-عا جۋىق نەسيە بەرەدى. بۇل — تۇرعىن ءۇي قۇرىلىس جيناق جۇيەسىنىڭ ءتيىمدى جۇمىسىنىڭ ناتيجەسى. الەۋمەتتىك ماڭىزى جوعارى قۇرال ەلىمىزدە 22 جىلدان بەرى تابىستى قولدانىستا.
كونفەرەنتسيادا ەۋروپا جانە ورتالىق ازيادان كەلگەن جەتەكشى ساراپشىلار تۇرعىن ءۇي سالاسىنداعى ستراتەگيالارمەن, يننوۆاتسيالىق تاجىريبەلەرىمەن ءبولىسىپ, اسىرەسە, ESG مەن «جاسىل» قارجىلاندىرۋدىڭ ماڭىزىن كەڭىنەن تالقىلادى.
كونفەرەنتسيادا ءسوز العان KAZGBC اتقارۋشى ديرەكتورى الەكساندر بەلىي: «الەمدە كليماتتىڭ وزگەرگەنى راس. ءبىز قانداي جاعدايدا دا جاسىل قۇرىلىسپەن اينالىسۋعا ءتيىسپىز. وتباسى بانكتىڭ بۇل باعىتتاعى جارقىن قادامىن ايرىقشا اتاۋعا بولادى. بۇل رەتتە حالىقارالىق ستاندارتتارعا ساي جۇمىس ىستەۋ ماڭىزدى. تەك تابىس تابۋدى كوزدەمەي, ازاماتتارعا ىڭعايلى جاعداي جاساۋىمىز كەرەك. الەۋمەتتىك, ارزان باسپانالار سالىنعاندا, ولارداعى ەنەرگيا ۇنەمدىلىك جاعى دا نازارعا الىنعانى ابزال», دەپ اتاپ ءوتتى.
ال «قازاقستان تۇرعىن ءۇي كومپانياسى» اق باسقارما توراعاسى التاي كۋزديباەۆ, جاسىل عيماراتتاردى دامىتۋدا ورنىقتى ءارى تۇراقتى دامۋ ماقساتى نازارعا الىنۋى قاجەتتىگىن باسا ايتتى. «بارىمىزگە ماڭىزدى تاقىرىپتى تالقىلاۋعا الاڭ ۇسىنعان وتباسى بانككە العىس ايتامىز. ەنەرگوتيىمدى ءۇي تەتىك پەن مەحانيزم عانا ەمەس, بارلىق جاعىنان قولايلى. ءار تۇرعىنعا 30 شارشى مەتر باسپانا قاجەت دەسەك, تۇتاس تۇرعىندارعا 250 ملن شارشى مەتر ءۇي سالۋعا تۋرا كەلەدى. قازىردىڭ وزىندە بىرنەشە اكىمدىكپەن بىرلەسكەن جۇمىس باستالىپ كەتتى. مۇنىڭ ءبارى ESG شەڭبەرىندە جۇرەدى. ەلىمىزدەگى ۇيلەردىڭ 40%-ى 1970 جىلعا دەيىن سالىنعان ۇيلەر. ولاردى بىرتىندەپ جاڭارتۋ ماڭىزدى. بۇل باعىتتا وتباسى بانكپەن تىعىز قارىم-قاتىناس جاساپ وتىرمىز»,- دەيدى ا. كۋزديباەۆ.
وتباسى بانكى باسقارماسى ءتورايىمى ءلاززات يبراگيموۆانىڭ ايتۋىنشا, تۇرعىن ءۇي قۇرىلىس جيناق جۇيەسى 622 538 وتباسىعا جاڭا ۇيگە قونىس اۋدارۋعا مۇمكىندىك بەردى. 3 ميلليوننان استام قازاقستاندىق ءوز جيناقتارىن وتباسى بانكىنە سەنىپ تاپسىرعان. بۇگىندە ازاماتتادىڭ شوتتارىندا 2,5 ترلن تەڭگەدەن استام قاراجات جيناقتالعان. جۇيەنىڭ ەرەكشەلىگى – ونى حالىقتىڭ بارلىق توپتارى پايدالانا الاتىنىندا. قازىرگى تاڭدا ەكونوميكالىق بەلسەندى حالىقتىڭ 30,9% جيناق جۇيەسىنىڭ قاتىسۋشىلارى.
جيىندا جاسىل قۇرىلىستى دامىتۋدىڭ ماڭىزدىلىعى ەرەكشە اتاپ ءوتىلدى. بۇل – قورشاعان ورتاعا زيان كەلتىرمەيتىن, ەنەرگيا تيىمدىلىگىنە, ەكولوگيالىق قاۋىپسىزدىككە نەگىزدەلگەن باعىت ەكەنى باسا ايتىلدى. مۇنداي باستامالار قالالاردىڭ تۇراقتى دامۋىنا, تۇرعىنداردىڭ ءومىر ءسۇرۋ ساپاسىنىڭ ارتۋىنا وڭ ىقپال ەتپەك.
«الماتىداعى كونفەرەنتسيا – ازاماتتاردى قولجەتىمدى باسپانامەن قامتاماسىز ەتۋدە تۇرعىن ءۇي جيناق جۇيەسىنىڭ ماڭىزدى ءرولىن تالقىلاۋ ءۇشىن حالىقارالىق جانە وڭىرلىك ساراپشىلاردى بىرىكتىرۋگە ارنالعان بىرەگەي مۇمكىندىك. ەكى ونجىلدىقتان استام ۋاقىت بويى وتباسى بانك قازاقستاندا «Bauspar» مودەلىن ەنگىزۋ مەن تابىستى دامىتۋدا pioner بولىپ كەلەدى جانە ول تەك وڭىردە عانا ەمەس, حالىقارالىق دەڭگەيدە دە ۇلگى كورسەتىپ وتىر. مەن بۇل شارا وزىق تاجىريبەنى پاش ەتىپ قانا قويماي, تۇرعىن ءۇي قارجىلاندىرۋ جۇيەلەرىن بۇكىل الەمدە نىعايتۋعا ىقپال ەتەتىن جاڭا سەرىكتەستىك بايلانىستار مەن يننوۆاتسيالىق يدەيالاردىڭ دامۋىنا جول اشادى دەپ سەنەمىن», دەدى حالىقارالىق تۇرعىن ءۇي قارجىلاندىرۋ وداعىنىڭ باس حاتشىسى مارك ۆاينريح.
