- سۋ سپورتى تۇرلەرىنەن ءۇندىستاننىڭ احمەداباد قالاشىعىندا شىمىلدىعى تۇرىلگەن ازيا چەمپيوناتىن ەلىمىزدىڭ قۇراماسى ءساتتى باستادى. جارىستىڭ العاشقى كۇنى قورجىنىمىزعا ءۇش مەدال ءتۇستى. 100 مەترگە باتتەرفلياي ادىسىمەن جۇزۋدە ماكسيم سكازوبتسوۆ كۇمىس السا, ءدال سول قاشىقتىققا باتتەرفلياي ادىسىمەن جۇزگەن سوفيا سپودارەنكو قولاعا قول جەتكىزدى. 50 مەترگە شالقالاي جۇزۋدە سوفيا ابۋباكىروۆا ەكىنشى ورىنعا يە بولدى.
- «استانا» كلۋبىنىڭ ۆەلوشاباندوزى, گەرمانيالىق ماكس كانتەر ءبىر اپتا ىشىندە ەكى بىردەي ءدۇبىرلى دودادا دارالاندى. العاشىندا بەلگياداعى «وملۋپ ۆان حەت حۋتلاندتا» ەكىنشى ورىن السا, كۇنى كەشە فرانتسياداعى «پاريج-شونيدە» دە ءدال سول ناتيجەنى قايتالادى. وسىعان دەيىن كانتەر قارت قۇرلىقتىڭ تاس جولدارىندا وتكەن «المەريا كلاسسيگىندە» كۇمىسپەن كۇپتەلىپ, «فامەنن اردەنن كلاسسيگىندە» باس جۇلدەنى ولجالاعان ەدى.
- فۋتزالدان «قايرات» كلۋبىنىڭ باسىنان باعى تايا باستاعان سىندى. ەلىمىز تاريحىنداعى ەڭ اتاقتى كوماندا ىشكى چەمپيوناتتىڭ ءتورتىنشى تۋرىندا «سەمەيدەن» 4:10 ەسەبىمەن ويسىراي ۇتىلدى. الماتىلىقتار اراسىنان اتيرسون وليۆەيرا مەن كايو رۋيز ەكى گولدان سوقتى. سەمەيلىكتەر ساپىندا پەدرو ەنريكە حەت-تريك جاساسا, اندەرسون الۆەس پەن مارسەلو دۋبل اۆتورى اتاندى. سونداي-اق نۇرسۇلتان پيالى, رينات تورەعازين, ەرجان كارمەنوۆ ءبىر-ءبىر رەتتەن نىسانانى ءدال كوزدەدى. وسى كەزدەسۋدىڭ 32-مينۋتىندا «قايراتتىڭ» ويىنشىسى الۆەس رومۋلونىڭ ويىننان قۋىلعانىن دا ايتا كەتكەن ءجون.
- تۇركىستاندا ترياتلوننان ازيانىڭ اشىق كۋبوگى اياقتالدى. جەرلەستەرىمىز اراسىنان دارىن قونىسباەۆ ءساتتى ونەر كورسەتىپ, كۇمىس مەدالدى يەلەندى. باس جۇلدەنى رەسەي سپورتشىسى دەنيس كولوبرودوۆ ولجالاسا, ونىڭ وتانداسى رومان مينەەۆ قولا جۇلدەنى قورجىنعا سالدى.
- قۇرلىقتىڭ حوككەي ليگاسىندا (قحل) كۇش سىناسىپ جۇرگەن «بارىس» ۆلاديۆوستوكتىڭ «ادميرالىن» قابىلدادى. ءبىرىنشى كەزەڭدە ەسەپ اشىلعان جوق. ۇزىلىستەن كەيىن استانالىقتار ەكى مارتە مەرگەندىك تانىتتى. گولداردى ۆسەۆولود لوگۆين مەن اڭسار شايحمەددەنوۆ سوقتى. ءۇشىنشى كەزەڭدە مەيسون مورەللي ماتچتىڭ سوڭعى نۇكتەسىن قويدى – 3:0. كەيىنگى ەكى ويىنداعى جەڭىسىنەن كەيىن «بارىس» 11 ۇپايمەن شىعىس كونفەرەنتسياسىنىڭ جارىس كەستەسىندە التىنشى ورىندا تۇر.
- 11-12 قازاندا اقتاۋدا دزيۋدودان «Asian Open» ءتۋرنيرى ۇيىمداستىرىلادى. وعان 200-دەن اسا بالۋان قاتىسادى. باق سىناۋشىلاردىڭ قاتارىندا دانيار شامشاەۆ (81 كگ), ديدار حامزا (90 كگ), ەراسىل قاجىباەۆ (+100 كگ), باسقا دا قۇرلىقتىڭ دەڭگەيدەگى دودالاردا وزدەرىن مويىنداتقان ساقا سپورتشىلار بار.
