ءىس-شاراعا قازاقستان پرەزيدەنتىنىڭ كەڭەسشىسى اسەل جاناسوۆا, قازاقستاننىڭ حالىق ءارتىسى ديماش قۇدايبەرگەن, تۋريزم جانە سپورت ۆيتسە-ءمينيسترى باۋىرجان راپيكوۆ, «Kazakh Tourism» ۇك» اق باسقارما توراعاسىنىڭ مىندەتىن اتقارۋشى دانيەل سەرجان ۇلى, «Qazaqstan» رترك» اق باسقارما توراعاسى ەرنۇر بۋراحان, «Hunan TV» ارناسىنىڭ «كوكجيەك داۋىسى» جوباسىنىڭ اتقارۋشى پروديۋسەرى ۆان چين, جوبانىڭ پروديۋسەرى ءارى باس رەجيسسەرى لۋو سينسين قاتىستى.
اسەل جاناسوۆا حالىقارالىق جوبا قازاقستان مەن قىتاي اراسىنداعى ىنتىماقتاستىق تاريحىنىڭ جاڭا پاراعىن اشاتىنىن ايتتى. سونىمەن قاتار تۋريزم سالاسىندا دا ەرەكشە ماڭىزعا يە ەكەندىگىن اتاپ ءوتتى. سپيكەرلەر وسى ەڭبەگى ءۇشىن ديماشقا العىس ءبىلدىردى.
ءبىر ايعا جۋىققا سوزىلعان جوبا ءتۇسىرىلىمى تۇركىستان, ماڭعىستاۋ, الماتى, اقمولا وبلىستارىندا, سونداي-اق الماتى مەن استانا قالالارىندا وتكەن. ۇلى جىبەك جولىنىڭ بويىنداعى تۇركىستاننان باستالعان جوبا, كاسپي تەڭىزى جاعاسى مەن تابيعاتتىڭ تىلسىم سىرىن ساقتاعان بوزجىرادا جالعاسىن تاۋىپ, الماتى ءوڭىرىنىڭ ءىنجۋ-مارجاندارى – قايىڭدى كولىن, دۇنيەجۇزىلىك UNWTO تۋريستىك ۇيىمى الەمدەگى ۇزدىك تۋريستىك اۋىلداردىڭ ءبىرى دەپ تانىعان ساتى اۋىلىن, قاپشاعاي سۋ قويماسىن, اقمولا وبلىسىنداعى كوبەيتۇز كولى مەن ششۋچينسك – بۋراباي كۋرورتتىق ايماعىن ايگىلەدى. اقتىق كەزەڭ ەلوردادا ۇيىمداستىرىلىپتى. بايقاۋعا ەلىمىزبەن قاتار, قىتاي, قىرعىزستان, يتاليا, مالايزيا, سەربيا ونەرپازدارى قاتىسىپ, سىنعا تۇسكەن. ورىنداۋشىلار شىعارماشىلىق ساپارمەن ەلىمىزدى ارالاپ, تۋريستىك ورىندارمەن كەڭىنەن تانىستى. قاتىسۋشىلاردىڭ ونەرىن ارنايى شاقىرىلعان حالىقارالىق قازىلار مەن كورەرمەندەر باعالادى. ەكى مارتە «گرەممي» سىيلىعىنىڭ لاۋرەاتى, امەريكالىق ونەر يەسى ۋولتەر افاناسەۆ جوبا اياسىندا تۇركىستاندا بولدى.
– شىعارماشىلىعىممەن تانىس جاندار بىلەدى, ونەردە قولعا العان ىستەرىم ەشقاشان كوممەرتسيالىق ماقساتتى كوزدەمەگەن. مۇندا دا سولاي. ەڭ باستىسى, اتا-بابادان قالعان ەلدى, جەردى, ونىڭ مادەنيەتى مەن قۇندىلىعىن وسكەلەڭ ۇرپاققا ميراس ەتۋ. مۇمكىندىك تۋىپ تۇرعاندا, ەلىمىزدىڭ مادەنيەتى مەن ءتۋريزمنىڭ وركەندەۋىنە از دا بولسا ۇلەسىمىزدى قوسساق دەگەن نيەتتەن تۋعان ءىس ەدى بۇل. وسى جوبا اياسىندا حالىقارالىق دەڭگەيدە تانىمال بولاتىن ءبىر جاس ونەرپازدىڭ جۇلدىزىن جاعۋدى دا ماقسات ەتتىك. تالانتىنا, ادامگەرشىلىگىنە قاراپ, ەلىمىزدەن 25 جاستاعى نۇرجاستى تاڭداپ الدىق. ءوز باسىم اۋەلى تالانتتان بۇرىن ادامگەرشىلىكتى جوعارى باعالايمىن. نۇرجاسقا تاڭداۋىمىز وسى تۇرعىدان ءتۇستى.
بايقاۋ ەرەجەسىنە كەلسەك, قازاقستان تاراپىنان مەن, قىتاي تاراپىنان تانىمال ءانشى ارىپتەستەرىم بولدى. ەڭ جوعارى كورسەتكىش 100 بالمەن ەسەپتەلدى. سونىمەن قاتار 100 كورەرمەننىڭ ارقايسىسى ءوزى ۇناتقان انشىگە داۋىس بەردى. جەڭىمپازدى وسىلايشا انىقتاپ وتىردىق. قالعانىنا ەفيردەن تاماشالاعاندا كورەرمەن باعاسىن بەرەدى, – دەدى ديماش قۇدايبەرگەن.
مۇنداي حالىقارالىق جوبادا ەلىمىزدىڭ ەڭ تاڭداۋلى جەرلەرىن كورسەتۋ ۇلتتىق ۇستىنىمىزدى شەتەلدىك تۋريستىك نارىقتا ىلگەرىلەتۋگە جاڭا مۇمكىندىكتەر اشادى.
– 22 كۇن ىشىندە قازاقستاننىڭ ءارتۇرلى مەملەكەتتىك قۇرىلىمدارىنىڭ جان-جاقتى قولداۋىنىڭ ارقاسىندا ءتۇسىرىلىم توبىمىز مىڭداعان شاقىرىمدى ارتتا قالدىرىپ, كورىكتى جەرلەرگە تابان تىرەدى. ءبىز باعا جەتپەس كادرلاردى تاسپالاپ, قوناقجاي ەل تورىنەن جۇرەككە جەتەر مۋزىكالىق ءىز قالدىردىق», دەدى «Hunan TV» ارناسىنىڭ «Voice Beyond Horizon» باعدارلاماسىنىڭ پروديۋسەرى جانە باس رەجيسسەرى لۋو سينسين.
جوبا تۋريزم جانە سپورت, مادەنيەت جانە اقپارات مينيسترلىكتەرى, «Kazakh Tourism» ۇلتتىق كومپانياسى, «جولاۋشىلار تاسىمالى» اق مەن جەرگىلىكتى اتقارۋشى ورگانداردىڭ قولداۋىمەن جۇزەگە استى. وتاندىق «Qazaqstan» جانە قىتاي ارناسىنان كەلەر جىلى جارىققا شىعادى. كورسەتىلىمى 210 ميلليوننان استام اۋديتورياعا جەتەتىن «Hunan TV» تەلەارناسى مەن «Mango TV» تسيفرلىق پلاتفورماسىندا جوسپارلانعان.
