جاس بالا پارا بەرۋدى بىلمەي وسسە, شىركىن!..

جامبىل وبلىسىنداعى سىبايلاس جەمقورلىق قىلمىس جاساعانداردىڭ 10 پايىزى ءبىلىم سالاسىنا قاتىستى بولىپ وتىر. سىبايلاس جەمقورلىققا سالىنۋ جاعىنان ءبىلىم بەرۋ مەن دەنساۋلىق ساقتاۋ سالالارى توپ باسىندا تۇر. بۇل ەكەۋى دە ەل دامۋىنىڭ اسا ماڭىزدى سالالارى بولىپ تابىلادى. سەبەبى, دەنى ساۋ, ءبىلىمدى ۇرپاق – ەل بولاشاعى. وسىعان وراي مەملەكەتتىك قىز­مەت ىستەرى جانە سىبايلاس جەم­قور­لىققا قارسى ءىس-قيمىل اگەنتتىگىنىڭ جامبىل وبلىسى بويىنشا دەپارتامەنتىنىڭ باسشىلارى جاقىندا دەنساۋلىق ساقتاۋ جانە ءبىلىم بەرۋ مەكە­مەلەرىنىڭ باسشىلارىمەن كەزدەسۋ وتكىزدى. ستاتيستيكالىق دەرەكتەرگە سۇيەن­سەك, وتكەن جىلى 147 سىبايلاس جەمقورلىق قىلمىستارى بويىنشا ءىس قوزعالعان. تارتىپتىك قۇقىق بۇزۋشىلىقتار كورسەتكىشى دە 196 دەرەكپەن 2013 جىلدىڭ دەڭگەيىندە قالىپ وتىر. ونىڭ ىشىندە, ءبىلىم سالاسى بويىنشا 2013 جىلى – 30, ال, 2014 جىلى 46 قۇقىق بۇزۋشىلىق ورىن العان. ياعني, جالپى ورىن العان سىبايلاس جەمقورلىق قۇقىق بۇزۋشىلىقتىڭ جىلدىق كورسەتكىشىنىڭ 23 پايىزى مەكتەپتەر مەن بالاباقشالاردىڭ ەنشىسىندە. سىبايلاس جەمقورلىق قىلمىس جاساعانداردىڭ 10 پايىزى ءبىلىم سالاسىنا تيەسىلى. «بۇل ءبىر جاعىنان كوڭىلگە جا­عىمسىز بولسا, ەكىنشى جاعىنان بۇدان «ۇستازداردىڭ بەدەلى نەگە تومەندەدى؟» دەگەن سۇراققا جاۋاپ تابىلادى. جاسوسپىرىمدەردىڭ تاربيەسىندە وتباسىلىق تاربيەنىڭ ورنى ەرەكشە. وكىنىشكە وراي, ادامزاتتىڭ سانا-سەزىمى تازا جانە ادال ەڭبەكتەن گورى, وڭاي جولمەن ناپاقا تابۋدىڭ جولىنا اۋىپ بارا جاتقانداي. وتباسى تاربيەسىنىڭ وزىندە ءبىلىم الۋعا, جۇمىسقا ورنا­لاسۋعا قاتىستى اڭگىمەلەر جەمقورلىق كورىنىستەرىنىڭ اياسىندا ءوربيتىنى جاسىرىن ەمەس. سوندىقتان, تاراز قالاسى مەن اۋداندارداعى ءبىلىم بەرۋ مەكەمەلەرىندەگى اتا-انا­لار كوميتەتتەرىنىڭ جۇمىسى دا نا­زارعا الىناتىن بولادى. ءار ۇيدە كەمىن­دە ءبىر وقۋشى بار. وتبا­سى تاربيەسىندە ولاردىڭ بويىندا جەم­قورلىقتى قابىلداماۋ قاسيە­تىن قالىپتاستىرۋ قاجەت. سوندا عانا قوعام ساۋاتتى, ال ۇستاز­­­داردىڭ مەرەيى ۇستەم بولارى انىق» دەيدى بۇل جونىندە مەم­لەكەتتىك قىزمەت ىستەرى جانە سىبايلاس جەمقورلىق­قا قارسى ءىس-قيمىل اگەنت­تىگىنىڭ جام­بىل وبلىسى بويىنشا دەپار­تامەنتى­نىڭ باسشىسى ماقسات قوجاباەۆ. دەنساۋلىق ساقتاۋ مەكەمە­لە­رىنە كەلەر بولساق, اق حالاتتى ابزال جانداردىڭ ءاربىر زاڭسىز ارەكەت­تەرى ادام ساۋلىعىنا كەرى اسەر ەتە­تىنىن ۇمىتپاۋىمىز كەرەك. سىر­قات ادامعا اقشا ەمەس, دەنساۋ­لىق قىمبات. وسى ورايدا, بارلىق دەنساۋلىق ساقتاۋ مەكەمە­لەرى تاراپىنان حالىقتى ولار­دىڭ قۇقىقتارى تۋرالى اقپارات­تاندىرۋ, سىبايلاس جەمقور­لىققا قارسى ناسيحاتتاۋ جۇمىستارى كەڭىنەن جۇرگىزىلۋى ءتيىس. بىلايشا ايتقاندا, سىبايلاس جەمقورلىقپەن كۇرەسۋ ءاربىر ازاماتتىڭ ازاماتتىق بورىشى. ورالحان ءداۋىت, «ەگەمەن قازاقستان». جامبىل وبلىسى.