سۋرەت: gov.kz
فورۋمنىڭ نەگىزگى ماقساتى – مەملەكەت باسشىسىنىڭ باستاماسىمەن جۇزەگە اسىرىلىپ جاتقان «ادىلەتتى قازاقستان», «ادال ازامات» قاعيداتتارىن ىلگەرىلەتىپ, مەملەكەتتىك قىزمەتشىلەر اراسىندا زاڭ مەن ءتارتىپتىڭ ورنىعۋىنا ايرىقشا ىقپال ەتۋ. مۇندا, اسىرەسە ادەپ جونىندەگى ۋاكىلدەرگە ەرەكشە جاۋاپكەرشىلىك جۇكتەلەدى.
ءىس-شارانىڭ اشىلۋىندا د.جازىقباي پرەزيدەنتتىڭ جولداۋىندا ايتقان «زاڭ جانە ءتارتىپ» – مەملەكەتىمىزدىڭ مىزعىماس تۇعىرى. قوعامدا وسى قاعيدانى تۇبەگەيلى ورنىقتىرۋ ءۇشىن بارلىق قۇزىرلى ورگاندار اراسىندا ورتاق كوزقاراس پەن ورتاق ۇستانىم بولۋعا ءتيىس» دەگەن ءسوزىن تىلگە تيەك ەتىپ, «زاڭ جانە ءتارتىپ» قاعيداتى مەملەكەتتىك قىزمەتشىلەردەن باستاۋ الۋ كەرەكتىگىن اتاپ ءوتتى.
اگەنتتىك توراعاسىنىڭ ايتۋىنشا, مەملەكەتتىك ورگانداردا جاڭادان پروفيلاكتيكا قىزمەتىن قۇرۋ كوزدەلىپ وتىر. ونىڭ نەگىزگى مىندەتتەرى – جەمقورلىقتىڭ الدىن الۋ جونىندە شارالار قابىلداۋدى قامتاماسىز ەتۋ, مەملەكەتتىك قىزمەتتەردىڭ ساپاسىنا ىشكى باقىلاۋدى جۇزەگە اسىرۋ, ۆەدومستۆولىق باعىنىستى ۇيىمدارىنىڭ قىزمەتىن, ونىڭ ىشىندە كومپلاەنس-قىزمەتتەردىڭ قىزمەتىن ۇيلەستىرۋ.
سونداي-اق ەرەكشە نازار اۋداراتىن ماڭىزدى وزگەرىستەردىڭ ءبىرى – قىزمەتتىك تەرگەپ-تەكسەرۋ راسىمدەرىنىڭ ينستيتۋتسيونالدىق تۇردە قايتا قۇرىلۋى. بۇل رەتتە كادر قىزمەتتەرى وزدەرىنىڭ نەگىزگى مىندەتى – پەرسونالدى دامىتۋ مەن ءتيىمدى كادرلىق ساياساتتى جۇرگىزۋگە باعىتتالسا, قىزمەتتىك تەرگەپ-تەكسەرۋ جۇمىستارىن ۇيىمداستىرۋ جانە جۇرگىزۋ وكىلەتتىگى تولىقتاي پروفيلاكتيكا قىزمەتىنە بەرىلەدى. بۇل وزگەرىستەر جاڭا زاڭ جوباسىندا ناقتى قاراستىرىلىپ, ونى ىسكە اسىرۋ بارىسىندا ادەپ جونىندەگى ۋاكىلدەر جەتەكشىلىك ءرول اتقارادى.
فورۋمدا جاڭارتىلعان انت ءماتىنى دە تالقىلاندى. جاڭارتىلعان انتتىڭ باستى مىندەتى – مەملەكەتتىك قىزمەتشىنى قۇقىقتىق عانا ەمەس, سونداي-اق مورالدىق مىندەتتەر دە جۇكتەلگەن مەملەكەتتىڭ وكىلى رەتىندە ايقىنداۋ.
فورۋمعا قاتىسۋشىلار ادەپ جونىندەگى ۋاكىلدەردىڭ دەربەستىگىن كۇشەيتۋگە, ولارعا جۇكتەلەتىن مىندەتتەردى ءتيىمدى ورىنداۋ تەتىكتەرىنە قاتىستى ويلارىن ورتاعا سالدى. قازىرگى تاڭدا رەسپۋبليكا بويىنشا مەملەكەتتىك ورگانداردا 770 ادەپ جونىندەگى ۋاكىل قىزمەت اتقارادى.
