قالدىقتى كادەگە جاراتادى

نەگىزى, بۇل «جاسىل» جوبا ءدوڭ تاۋ-كەن بايىتۋ كومبيناتىندا 2023 جىلدان باس­تال­عان ەكەن. سول كەزەڭدە ءون­دىرىس ورنىندا شلامدى گراۆي­تا­تسيالىق ادىسپەن بايىتاتىن بىرەگەي فابريكا ىسكە قوسىل­عان. سونىڭ ناتيجەسىندە قۇرامىندا كەمىندە 48,5% حروم بار تاۋارلىق كونتسەنترات الىنادى. دەگەنمەن وسى وڭدەۋدەن كەيىن دە قالدىق قۇ­را­مىندا حروم قالادى ەكەن. كۇنى كەشە جۇمىسىن باستاعان فلوتاتسيالىق ۋچاسكە سونى قايتا وڭدەپ, باعالى مەتالدى ءبولىپ الادى.

فلوتاتسيا ءادىسى نەگىزىنەن ءتۇستى جانە قىمبات مەتالداردى بايىتۋدا قول­دانىلادى. ال حروم ونەركاسىبىندە مۇنداي ءتاسىل – سيرەك ءارى تىڭ شەشىم. بۇل تەحنولوگيا ۋلتراجۇقا بولشەكتەردەن دە حرومدى ءبولىپ الۋعا جول اشتى. بۇعان دەيىن مۇنداي قالدىقتار وڭدەۋگە جا­رام­سىز سانالىپ كەلگەن ەدى.

ء«دوڭ تاۋ-كەن بايىتۋ كومبيناتى ماڭىندا 14 جارىم ميلليون توننا شلام جينالعان. جوبا اياسىندا جىلىنا 1,7 ميلليون توننا قالدىقتى وڭدەۋ جوس­پارلانعان. شامامەن جىلىنا 500 مىڭ توننا كونتسەنترات الامىز. فلوتاتسيا ءادىسى قارا مەتاللۋرگيادا, سونىڭ ىشىندە حروم كەنىن بايىتۋدا العاش رەت قولدانىلىپ وتىر. دايىن ءونىمدى فەرروقورىتپا زاۋىتتارىنا جىبەرەمىز. قال­عان قوقىس ارنايى ورىنعا جيناقتالادى», دەيدى شلامدى قالدىقتاردى با­يىتۋ تسەحىنىڭ اعا شەبەرى نۇرلان جانايدار.

وبلىس اكىمىنىڭ ورىنباسارى ابزال ابدىكارىموۆتىڭ ايتۋىنشا, قازىر ءىرى كوم­­پانيالاردىڭ الدىندا ەكو­­لو­گيالىق ستاندارت­­­­تاردى ساق­­تاۋ, قورشاعان ورتاعا اسەردى ازاي­تۋعا قاتىس­تى ءتۇرلى تالاپتار قويىلىپ جاتىر.

«قازحروم» كومپانياسى وسى تالاپتاردى ورىنداپ كەلەدى. سونىڭ ايعاعى – بۇگىن جۇمىسىن باستاعان فلو­تاتسيا ۋچاسكەسى. قور­شاعان ورتانى قورعاۋعا باعىت­تالعان ماڭىزدى جوبا ىسكە قوسىلدى. سونىمەن قاتار كومپانيا قۇرال-جابدىقتاردى جاڭعىرتۋعا, ءوندىرىس كولەمىن ارتتىرۋعا قوماقتى قارجى سالىپ كەلەدى. ءدوڭ تاۋ-كەن بايى­تۋ كومبيناتى راستاۋلى قور كولەمى بويىنشا دۇنيەجۇزىندە ەكىنشى ورىن الادى. بۇل – اقتوبە وبلىسىنداعى ەڭ ءىرى كاسىپورىن­نىڭ ءبىرى. مۇندا 8 مىڭ­نان استام ادام جۇمىس ىس­تەيدى. جاڭا ءوندىرىس ورنىنىڭ جۇمىسىنا ساتتىلىك تىلەيمىز», دەدى جوبانىڭ اشىلۋ راسىمىندە وبلىس اكىمىنىڭ ورىنباسارى.

جالپى, كەندى وڭدەپ, كادەگە جاراتۋ جوباسى 2018 جىلى دايارلانا باستاعان ەكەن. بۇعان سالا ماماندارى مەن عالىمدار جۇمىلدىرىلعان. وندىرىسكە ەنگىزبەس بۇرىن بىرنەشە رەت سىناق جۇمىسى جۇرگىزىلگەن. بۇل ءادىستىڭ بىرەگەيلىگىن دالەل­دەيتىن ەكى پاتەنت الىنعان كورى­نەدى. ءبىرىنشى كەزەڭدە 2023 جىلى شلامدى گراۆيتاتسيالىق ادىسپەن بايىتاتىن فابريكا جۇمىسىن باستاسا, ەكىنشى كەزەڭدە فلوتاتسيا ۋچاسكەسى ىسكە قوسىلىپ جاتىر.