جارىس جولىنا شىققاندار اراسىندا جاس بالا دا, ەگدە تارتقان قاريالار دا, كاسىپقويلار مەن اۋەسقوي سپورتشىلار دا كەزدەستى.
ايەلدەر اراسىنداعى مارافوندا اناستاسيا دەركاچتىڭ مەرەيى ۇستەم بولدى. جەلدەي جۇيتكىپ كەلە جاتقان رەسەيلىك جەلاياق تۋرا مارەگە جاقىنداعاندا ءسۇرىنىپ قۇلادى. جانىندا تۇرعان ۆولونتەر وعان كومەك بەرۋگە ارەكەت جاسادى. بىراق اناستاسيا ونى ماڭىنا جاقىنداتپادى. سەبەبى ونداي ساتتە سپورتشىعا باسقا بىرەۋ كومەك كورسەتەتىن بولسا, وندا ول جارىستان شەتتەتىلەدى. ءسويتتى دە ءوزى ورنىنان تۇرىپ, مارە سىزىعىن قيىپ ءوتتى. دەركاچتىڭ ۋاقىتى – 2 ساعات 41 مينۋت 24 سەكۋند. بۇل – «الماتى مارافونىنىڭ» جاڭا رەكوردى. كۇمىس جۇلدەنى جەڭىمپازدىڭ وتانداسى ەلەنا تولستىح جەڭىپ السا, وزبەكستاننىڭ وكىلى ەكاتەرينا تۋنگۋسكوۆا قولا مەدالدى يەلەندى.
ەرلەردىڭ جارىسىندا ۆيتالي شافار شاشاسىنا شاق جۇقتىرمادى. ۋكراينالىق مارافونشى 42 شاقىرىم 195 مەترلىك قاشىقتىقتى 2 ساعات 19 مينۋت 38 سەكۋندتا جۇگىرىپ ءوتتى. ەكىنشى, ءۇشىنشى ورىن كورشىلەس مەملەكەتتەردەن كەلگەن سپورتشىلارعا بۇيىردى. جۇلدەلەردىڭ يەگەرلەرى – قىرعىزستاندىق يليا تياپكين مەن وزبەكستاندىق اندرەي پەتروۆ.
جارتىلاي مارافوندا (21 شاقىرىم 97,5 مەتر) ەرلەر اراسىندا نۇرسۇلتان كەنەشبەكوۆ (قىرعىزستان) قارسىلاس شىداتپاسا, ايەلدەردىڭ باسەكەسىندە اينۇسقا كاليدىڭ (قىرعىزستان) باعى جاندى. 10 شاقىرىمدىق سايىستا نوديربەك مۋتاليپوۆ (وزبەكستان) پەن جاننا ماماجانوۆا (قازاقستان) جەڭىمپاز اتاندى.
