وتاندىق ونەر مۋزەيى دايىنداعان «قازاقستان ونەرىنىڭ جاۋھارلارى» كورمەسى مەملەكەتتىك ترەتياكوۆ گالەرەياسىندا 7 قازاندا اشىلماقشى. ەلىمىزدەن اتتانعان ەكسپوزيتسياعا حح عاسىردىڭ بىرنەشە بۋىنىنىڭ 60-تان استام كەسكىندەمە جانە ءمۇسىن شىعارماسى ەنگەن.
ۇلتتىق بەينەلەۋ ونەرى مەكتەبىنىڭ قالىپتاسۋى قازاق كەسكىندەمەسىنىڭ اتاسى ءابىلحان قاستەەۆ ەسىمىمەن بايلانىستى. ونىڭ كارتينالارى وتكەن عاسىردىڭ باسىنداعى كوشپەلى ءومىر وزگەرىستەرىنىڭ شەجىرەسى ىسپەتتى. 1930–1940 جىلدارى كاسىبي مەكتەپتىڭ دامۋىنا كورشىلەس ەلدەردىڭ ءار ايماعىنان كەلگەن سۋرەتشىلەر ىقپال ەتسە, 1950 جىلدارى سۋرەت ونەرىنىڭ نەگىزىن الماتى كوركەمسۋرەت ۋچيليششەسىنىڭ تۇلەكتەرى قالادى. ايشا عالىمباەۆا, گۇلفايرۋس يسمايلوۆا, مولداحمەت كەنباەۆ, سابىر مامبەەۆ, قاناپيا تەلجانوۆ, كامىل شاياحمەتوۆ تۋىندىلارى ۇلتتىق تاقىرىپقا ءىز سالۋىمەن ەرەكشەلەندى.
بۇلاردىڭ اراسىندا ايشا عالىمباەۆا قازاق ناتيۋرمورتى جانرىن قالىپتاستىردى. گۇلفايرۋس يسمايلوۆا وعان ايرىقشا دەكوراتيۆتىك رەڭك بەردى. قاناپيا تەلجانوۆ پەن سابىر مامبەەۆ كوشپەلى مادەنيەتتى رومانتيكالىق تۇرعىدا بەينەلەپ, ادام مەن تابيعاتتىڭ ماڭگىلىك بىرلىگىن كورسەتتى. سونداي-اق سەرگەي كالمىكوۆ زامانىنىڭ الدىنا شىعىپ, وزىندىك ەستەتيكالىق بەينەلەر جۇيەسىن جاسادى.
«الپىسىنشى جىلعىلار» بۋىنىنىڭ ايتۋلى وكىلدەرى ساليحيتدين ايتباەۆ, توقبولات توعىسباەۆ, شايماردان ساريەۆ – كەسكىندەمەگە سيمۆوليكا مەن تۇستىك-پلاستيكالىق ەكسپەريمەنتتەر اكەلىپ, جاڭا كوركەمدىك ورنەككە قۇلاش ۇردى.
1970–1980 جىلدارى شىعارماشىلىقتىڭ دارالىق قىرىنا باسىمدىق بەرىلدى. كاميل مۋللاشەۆ «جەر مەن ۋاقىت. قازاقستان» تريپتيحىندە رەسپۋبليكانىڭ تىڭ, عارىشتىق جانە يندۋستريالىق بەينەسىن سومدادى. ەربولات تولەپباەۆ كەسكىندەمەگە تەرەڭ فيلوسوفيالىق سيپات دارىتتى. اماندوس اقاناەۆ كوشپەلى وركەنيەتتىڭ كيەلى نىشاندارىنا جاڭا ءمان بەردى.
1990 جىلدارى ونەردىڭ فيلوسوفيالىق مازمۇنى كۇشەيدى. باقىت باپيشەۆتىڭ ەڭبەكتەرىندە ارحايكالىق ءداستۇر ءابسوليۋتتىڭ مەتافوراسىنا اينالسا, مارات بەكەەۆتىڭ پولوتنولارىندا كونە تۇركى الەمىنەن تامىر تارتاتىن ادام مەن عالام تۋرالى ميف كورىنىس تاپتى.
بۇعان قوسا, كورەرمەندەردى تولەگەن دوسماعامبەتوۆ, ەركىن مەرگەنوۆ, ولگا پروكوفەۆا, ەسكەن سەرگەباەۆ سىندى ەلىمىزدىڭ ايگىلى مۇسىنشىلەرىنىڭ تۋىندىلارىمەن دە تانىستىرادى. بۇل ەڭبەكتەر قازاقستاندىق ءمۇسىن ونەرى شەبەرلەرىنىڭ شىعارماشىلىق ىزدەنىس باعىتتارى مەن باستى قىزىعۋشىلىقتارىن ايقىن كورسەتەدى.
