قالالىق پوليتسيا دەپارتامەنتىنىڭ ءباسپاسوز قىزمەتىنىڭ مالىمەتىنشە, قۇقىقتىق ءتارتىپ پەن قاۋىپسىزدىكتى قامتاماسىز ەتۋ ءۇشىن كەشەندى شارالار قابىلدانعان. قوعامدىق ءتارتىپتى كۇزەتۋگە 2,5 مىڭنان استام قىزمەتكەر تارتىلادى. نەگىزگى مىندەتتەرى – جانكۇيەرلەر مەن ويىنعا قاتىسۋشىلاردىڭ قاۋىپسىزدىگىن ساقتاۋ, سونداي-اق جول قوزعالىسىن رەتتەۋ.
«قىمباتتى الماتىلىقتار, قادىرلى قوناقتار! ەرتەڭ قالامىزدا «قايرات – رەال مادريد» اراسىنداعى حالىقارالىق فۋتبول ماتچى ءوتىپ, ۇلكەن وقيعانىڭ ورداسىنا اينالادى. ءبىز الەمنىڭ تۇكپىر-تۇكپىرىنەن كەلگەن جانكۇيەرلەردى كورگەنىمىزگە قۋانىشتىمىز. بۇل ءبىز ءۇشىن سپورت مەرەكەسى عانا ەمەس, الماتىنىڭ شىنايى كەلبەتىن – قوناقجايلىعىن, قۇرمەتىن جانە جوعارى مادەنيەتىن كورسەتۋگە ۇلكەن مۇمكىندىك», — دەدى الماتى قالالىق پد جەرگىلىكتى پوليتسيا قىزمەتى باسقارماسى باستىعىنىڭ ورىنباسارى تيمۋر نوعايباەۆ.
قۇقىق قورعاۋ وكىلى ماتچ كۇنى قوزعالىسقا ءىشىنارا شەكتەۋلەر ەنگىزىلەتىنىن اتاپ ءوتتى. بيلىك تۇرعىنداردان مارشرۋتتارىن الدىن الا جوسپارلاۋدى, ۋاقىتشا ءىس-شاراعا تۇسىنىستىكپەن قاراۋدى جانە كوشەدە, كولىكتە ءارى ستاديوندا ءتارتىپتى قاتاڭ ساقتاۋدى سۇرايدى.
«كوماندانى قولداڭىزدار, بىراق مادەنيەتتى تۇردە. قالامىزدى تازا ۇستايىق, ءبىر-بىرىمىزگە جانە قوناقتارعا قۇرمەتپەن قارايىق. سول ارقىلى الماتى مەن بۇكىل ەلىمىزدىڭ يميدجىنە ۇلەس قوسامىز», — دەدى ول.
الماتىلىق «قايراتتىڭ» قارسىلاسى – مادريدتىك «رەالدىڭ» فۋتبولشىلارى الماتىعا كەلدى. ولاردىڭ ساپارى فۋتبول جانكۇيەرلەرى ءۇشىن ۇلكەن وقيعا بولدى: اۋەجايدا اتى اڭىزعا اينالعان ويىنشىلاردى ءوز كوزىمەن كورۋگە اسىققان جانكۇيەر مەن ءجۋرناليستىڭ قاراسى قالىڭ.
