جاقىندا قمدب قاجىلىق ميسسياسىنىڭ وكىلدەرى ساۋد ارابياسى قاجىلىق مينيسترلىگىنىڭ لاۋازىمدى قىزمەتكەرلەرىمەن كەزدەسىپ, قاجىلىق ساپارىنا قاتىستى تۋىنداعان كەيبىر ماسەلەلەر توڭىرەگىندە كەلىسسوزدەر ءجۇرگىزدى.
قازاقستاندىق دەلەگاتسيا بۇعان دەيىن قاجىلىققا بايلانىستى (ۇشۋ كەستەسىنىڭ قولايسىزدىعى, قاجىلىق ساپارىنىڭ 30 كۇنگە سوزىلۋى, تىكەلەي رەيستىڭ بولماۋ سەبەبىنەن حالىقارالىق اۋەجايلاردا 16 ساعاتقا دەيىن كۇتۋ, بيلەت باعاسىنىڭ كوتەرىلۋى, ت.ب.) توڭىرەگىندە تۋىنداعان ماسەلەلەردى وتانداستارىمىزدىڭ پايداسىنا شەشۋگە قول جەتكىزدى. بيىل قاجىلىق ساپارى 2015 جىلدىڭ 11 قىركۇيەگىنەن باستالادى. باستى جاڭالىق – تۇڭعىش رەت استانا, الماتى, شىمكەنت قالالارىنان جيددا باعىتى بويىنشا تىكەلەي رەيستىڭ اشىلۋى. بۇل – قازاقستان قاجىلارى ءۇشىن مول ءمۇمكىندىك, ۇلكەن جەڭىلدىك. جيددا قالاسىنا تىكەلەي رەيستىڭ بولماۋىنا بايلانىستى قازاقستان قاجىلارى تۇركيانىڭ, بىرىككەن اراب امىرلىكتەرى اۋەجايلارىنىڭ قوناق ۇيلەرىندە نەمەسە كۇتۋ زالىندا ۇزاق ۋاقىت ءوز رەيستەرىن كۇتەتىن. ورتا جولدا يحرامدى (ەر كىسىلەردىڭ قاجىلىق كەزىندە كيەتىن تىگىسى جوق ەكى اق ماتا) كيۋدە دە قولايسىز جاعدايلارعا تاپ بولاتىن. ساۋديا بيلىگىنىڭ قاجىلىق ەرەجەلەرىنە وزگەرىستەر ەنگىزۋى ناتيجەسىندە قازاقستان قاجىلارى ءۇشىن تىكەلەي رەيستەردىڭ كەستەسى بەكىتىلدى. قاجىلاردى تاسىمالداۋ جۇمىسىن ساۋد ارابياسى كورولدىگى مەن قازاقستان رەسپۋبليكاسى ينۆەستيتسيالار جانە دامۋ مينيسترلىگىنىڭ ازاماتتىق اۆياتسيا كوميتەتى اراسىندا قابىلدانعان مەموراندۋم بويىنشا بەلگىلەنگەن ارنايى اۋە كومپانيالارى جۇزەگە اسىرادى. بۇعان دەيىن جەرلەستەرىمىز ترانزيتتىك رەيستەرمەن ءبىر كۇنگە جۋىق ۋاقىتىن, دالىرەك ايتقاندا, 14-16 ساعاتىن جولعا شىعىنداسا, ەندى 6 ساعاتتىڭ كولەمىندە قاسيەتتى قالاعا بارۋعا مۇمكىندىك الدى. يگى باستاما ەڭ اۋەلى ۋاقىت پەن قارجىنى ۇنەمدەۋگە وڭ ىقپال ەتەدى. ەندى بەسىنشى پارىزىن وتەۋشى ازاماتتار قازاقستاننان يحرام كيىمىن كيىپ, تىكەلەي مەككە قالاسىنا باعىت الادى. جۋىردا اقپارات قۇرالدارىندا تالقىلانعان قاجىلىق ساپارىنىڭ 30 كۇنگە دەيىن ۇزاق مەرزىمگە سوزىلۋ ماسەلەسى دە ساۋد ارابياسىندا وتكەن كەلىسسوزدەر ناتيجەسىندە 17-22 كۇن مەرزىمگە ۋاعدالاسىلدى. وسىعان وراي, قاجىلىق شىعىندارى دا ازايماق. بۇگىنگى تاڭدا قاجىلىققا باراتىن ازاماتتاردىڭ تاڭداۋى بويىنشا, ماتەريالدىق ءمۇمكىندىكتەرىنە وراي ولارعا ءارتۇرلى دەڭگەيدەگى ستاندارت پاكەتتەر ۇسىنىلعان. قاجىلىق فيرمالاردىڭ ۇسىنعان ستاندارت پاكەتتەگى ءبىر ادامعا جۇمسالاتىن شىعىن 3200-3900 دوللاردى قۇرايدى. ءتىپتى, 2900 دوللار كولەمىندەگى ەكونومپاكەتتەر دە قاراستىرىلعان. قمدب قاجىلىق ميسسياسى فيرمالاردان باعانى سەبەپسىز كوتەرمەۋدى ەسكەرتەدى ءارى بۇل ماسەلەنى قاداعالايدى. قمدب وسى ەسكەرتۋلەردى ورىنداماعان فيرمالاردى قاجىلىق كۆوتا بەرۋ قۇقىعىنان ايىرىپ, ولارعا قاتىستى شارالار قابىلدايتىنىن دا مالىمدەيدى. ءدىني باسقارما قاجىلارعا قولايلى جاعداي جاساۋعا ارقاشان مۇددەلى. قاجىلىق – قۇلشىلىق ەتۋ دەگەن ءسوز. قاجىلىق ساپارىن تۋريزممەن نەمەسە تابىس تابۋ كوزىمەن بايلانىستىرۋعا بولمايدى. الايدا, قاجىلىق تالاپتارى مەن ەرەجەلەرىن قاتاڭ ساقتاۋدى دا ۇمىتپاۋىمىز كەرەك. كوپتەگەن مۇسىلمان ەلدەرىندە قاجىلىق ساپارىن سول مەملەكەتتىڭ رەسمي ءمۇفتياتى, ياعني ءدىني باسقارماسى ۇيىمداستىرادى. مۇنداي جۇيە تۇركيادا بۇرىننان قالىپتاسقان. قازاقستان مۇسىلماندارى ءدىني باسقارماسى ەلىمىزدەگى ورتا جانە شاعىن كاسىپكەرلىكتى دامىتۋعا ۇلەس قوسۋ ماقساتىندا قاجىلىق ساپارىنىڭ ۇيىمداستىرۋ جۇمىستارىن 20 قاجىلىق فيرمالاردىڭ قۇقىعىنا بەرگەن. ءدىني باسقارمانىڭ ۇستانىمى – اشىق نارىق جۇيەسىن ودان ءارى دامىتۋ, قاجىلىقتىڭ ۇيىمداستىرۋ جۇمىستارىن بەلگىلى ءبىر قۇرىلىمنىڭ جەكەمەنشىگىنە اينالدىرماۋ, قاجىلارعا كورسەتىلەتىن قىزمەت ساپاسىن جوعارى دەڭگەيگە جەتكىزۋ, قاجىلىق ماۋسىمىندا ءادىل ءارى اشىق جۇمىس جۇرگىزۋ جۇيەسىن قالىپتاستىرۋ. ءمۇفتيات وسى مۇددەلەر تۇرعىسىنان تالاپ قويادى جانە ونىڭ جۇزەگە اسۋىن باقىلايدى. قمدب قاجىلىق ميسسياسىنىڭ نەگىزگى مىندەتى – قاجىلىق ماۋسىمىندا اتقارىلاتىن ءدىني راسىمدەردى, قۇلشىلىق ەتۋ تارتىپتەرىن ءتۇسىندىرۋ, ءدىني ساۋاتتاندىرۋ جۇمىستارىن جۇرگىزۋ, قاجىلارعا قولايلى جاعداي جاساۋ شارالارىن ۇيلەستىرۋ.
«ەگەمەن-اقپارات».
