اقمولا وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ مالىمەتىنشە, بيىل بەس ماڭىزدى نىسان پايدالانۋعا بەرىلمەكشى. ولار كوكشەتاۋداعى كۇل ءۇيىندىسى, اۆتوماتتاندىرىلعان مونيتورينگ جۇيەسى جانە تەحنولوگيالىق پروتسەستەردى باسقارۋ جۇيەسى, سونداي-اق, اقكولدە ءتورت تۇرعىن ۇيگە ارنالعان قازاندىق جانە ەرەيمەنتاۋداعى №5 قازاندىقتىڭ رەزەرۆتىك جەلىسى. ناتيجەسىندە 8 مىڭنان استام ابونەنت ساپالى جىلۋمەن قامتىلادى.
بۇدان بولەك, وبلىستا اقكول, ەگىندىكول, شورتاندى اۋداندارىندا جانە قىزىلجار اۋىلىندا ءتورت بلوك-ءمودۋلدى قازاندىقتى ورناتۋ جوسپارلانعان. ونىڭ ەكەۋى پايدالانۋعا بەرىلدى, قالعان ەكەۋى ءتورتىنشى توقسانىندا اياقتالادى. قازاندىق اگرەگاتتارىن جىل سايىن جاڭارتۋ باعدارلاماسى دا ورىندالدى. وڭىردە 90 كوممۋنالدىق قازاندىق جۇمىس ىستەيدى, وندا شامامەن 300 بۋ قازاندىعى بار. بيىل 59 جابدىقتى اۋىستىرۋ جوسپارلانسا, ولاردىڭ بارلىعى دەرلىك ورناتىلدى, تەك ارشالى اۋدانىنداعى ءۇش قازاندىق جاقىن ۋاقىتتا ىسكە قوسىلادى.
سونىمەن قاتار, ارشالى, استراحان, ەگىندىكول, ەرەيمەنتاۋ جانە جارقايىڭ اۋداندارىندا ۇزىندىعى 9,7 شاقىرىم جىلۋ جەلىلەرىن جوندەۋ جۇمىستارى دا اياقتالدى. بۇل جۇمىستار تولىق كولەمىندە ورىندالدى. كوكشەتاۋ, ستەپنوگورسك جانە اتباسار قالالارىندا جالپى ۇزىندىعى 17,2 شاقىرىم جىلۋ جەلىلەرىن قايتا قۇرۋ جۇمىستارى جالعاسۋدا. قازىرگى تاڭدا كوكشەتاۋدا ساين جانە پوتانين كوشەلەرىندە بۇل جۇمىس تولىق اياقتالدى, اتباساردا 1 شاقىرىمنان استام ۋچاسكەدە جوندەۋ جۇرگىزىلدى, ستەپنوگورسكىدە ماگيسترالدىق جەلىلەردىڭ 15 شاقىرىمنان استامى جاڭارتىلىپ, جوندەلدى.
مامانداردىڭ ەسەبىنشە, اتقارىلعان جۇمىستار جىلۋ جەلىلەرىنىڭ توزۋىن 39 پايىزدان 37 پايىزعا دەيىن تومەندەتۋگە مۇمكىندىك بەرەدى. ەنەرگەتيكا جانە تۇرعىن ءۇي-كوممۋنالدىق شارۋاشىلىعى اتاپ وتكەنىندەي, جىلۋ بەرۋ ماۋسىمىنا دايىندىق بارىسىنا تۇراقتى تۇردە مونيتورينگ جۇرگىزىلۋدە. قابىلدانعان بۇل شارالار جىلىتۋ كەزەڭىنىڭ ويداعىداي وتۋىنە يگى ىقپالىن تيگىزەرى ءسوزسىز.
اقمولا وبلىسى.
