فوتو: gov.kz
وقۋ-اعارتۋ مينيسترلىگىنىڭ مالىمەتىنشە, سوڭعى ءبىر جىلدا كوللەدجدەرگە شەفتىك قامقورلىق كورسەتەتىن كاسىپورىندار سانى دا 8 ەسەگە ارتىپ, 4,1 مىڭعا جەتتى. كاسىپورىندار وقۋ ورىندارىنىڭ ماتەريالدىق-تەحنيكالىق بازاسىن نىعايتۋعا, وقۋ باعدارلامالارىن جەتىلدىرۋگە جانە تۇلەكتەردىڭ جۇمىسقا ورنالاسۋىنا بەلسەندى قولداۋ كورسەتىپ كەلەدى.
جۇمىسقا ورنالاسۋ كەپىلدىگى بار ماقساتتى تاپسىرىستار اياسىندا بۇعان دەيىن كاسىپورىندار جىل سايىن شامامەن 10 مىڭ ستۋدەنتتى قابىلداسا, بيىل بۇل كورسەتكىش 13 مىڭعا جەتتى. مۇنداي ءوسىم ەڭبەك نارىعىنىڭ ناقتى سۇرانىسىنا ساي ماماندار دايارلاۋ ءىسىنىڭ ناتيجەلىلىگىن كورسەتەدى.
سونىمەن قاتار ۇلتتىق «Maman» باعدارلاماسى اياسىندا كاسىبي باعدارلاۋ جۇيەسى جاڭارتىلۋدا. جوعارى سىنىپ وقۋشىلارىنا ارنالعان پيلوتتىق جوبا ىسكە قوسىلىپ, ولار جالپى ءبىلىم بەرۋ پاندەرىن مەكتەپتەردە, ال كاسىبي دايارلىقتى كوللەدجدەردە يگەرۋدە. وسىلايشا, 11-سىنىپتى اياقتاعان تۇلەكتەر اتتەستاتپەن بىرگە ورتا تەحنيكالىق ءبىلىم تۋرالى ديپلوم دا الادى. بيىل العاشقى 905 وقۋشى ەڭبەك نارىعىنا كاسىبي بىلىكتىلىكپەن شىقتى.
جاسوسپىرىمدەردىڭ ەرتە كاسىبي باعدارىن قولداۋ ماقساتىندا ءار مەكتەپكە ارنايى پەداگوگ كاسىبي باعدار بەرۋشى لاۋازىمى ەنگىزىلىپ, 825 بەيىندىك سىنىپ اشىلدى. بۇل شارالار وقۋشىلارعا ماماندىقتى سانالى تاڭداۋعا كومەكتەسىپ, ولاردىڭ ەڭبەك نارىعىنا دايارلىعىن كۇشەيتەدى.
