بۇل قاتارداعى ناۋقان ەمەس

ل.ن.گۋميلەۆ اتىنداعى ەۋرازيا ۇلتتىق ۋنيۆەرسيتەتىندە مەرزىمىنەن بۇرىن پرەزيدەنتتىك سايلاۋ وتكىزۋدى قولداۋ ماقساتىندا «ەل جاستارى ەلباسىن قولدايدى» اتتى تاقىرىپتا دوڭگەلەك ۇستەل ءوتتى. دوڭگەلەك ۇستەلدى ستۋدەنتتىك عىلىمي قوعامنىڭ توراعاسى ايبول ارىنعازينوۆ جۇرگىزىپ وتىردى. باسقوسۋدا الەۋمەتتىك-مادەني دامۋ ءجو­نىن­دەگى پرورەكتور, فيلولوگيا عىلىمدارىنىڭ دوكتورى, پروفەسسور, قر ۇعا مۇشە-كوررەس­پون­دەنتى ديحان قامزابەك ۇلى ءسوز سويلەدى. عالىم ءوز سوزىندە ۋنيۆەرسيتەتتەگى عىلىممەن اينالىساتىن بەلسەندى جاستاردىڭ ۇسىنىسى قولداۋ تاپقانىن جانە بۇگىنگى باسقوسۋ سونىڭ ناتيجەسى ەكەنىن اتاپ ءوتتى. ديحان قامزابەك ۇلى دوڭگەلەك ۇستەل­دىڭ ماڭىزدىلىعىنا توقتالا كەلىپ, تاۋەلسىزدىككە قول جەتكىزۋدەگى جانە قازىرگى زامانداعى قازاقستان مەملەكەتتىلىگىن قالىپتاستىرۋداعى نۇرسۇلتان ءابىش ۇلى نازارباەۆتىڭ ەرەكشە ۇلەسىن جانە ءبىزدىڭ حالقىمىزدىڭ باقىتتى دا باياندى ءومىر ءسۇرۋى ەلباسىنىڭ كورەگەن كوشباسشىلىعى مەن سارابدال ساياساتىنىڭ ناتيجەسى ەكەنىن اتاپ ءوتتى. «نۇرسۇلتان ءابىش ۇلى – تاۋەلسىز قازاقستاندا عانا ەمەس, الەمدىك دەڭگەيدە ءوز ورنى مەن بەدەلى بار دارا تۇلعا», دەي كەلىپ, ەلباسىنىڭ ەرەكشە قاسيەتتەرىنە نازار اۋداردى. سونىمەن قاتار, بۇگىنگى دوڭگەلەك ۇستەل باسىنداعى اڭگىمە ەۇۋ ستۋدەنتتەرىنە عانا ەمەس, قازاقستاندىق جاستارعا دا رۋحاني قۇندىلىق رەتىندە قوسىمشا سەرپىن بەرەتىنىن جەتكىزدى. جاستار باس قوسقان جيىندا جاس عا­لىم­دار كەڭەسىنىڭ ءتورايىمى, سايا­سي عىلىمدار كانديداتى, تۇڭعىش پرە­زي­دەنت قورى سىيلىعىنىڭ يەگەرى ايگەرىم تۇرحانوۆا, ىرگەلى ماتە­ما­تيكا كافەدراسىنىڭ دوتسەنتى, PhD دوكتورى, «دارىن» مەملەكەتتىك جاس­تار سىيلىعىنىڭ لاۋرەاتى اي­نۇر تەمىر­حانوۆا, قازاقستان حالقى اسسام­بلەياسى كافەد­راسىنىڭ دوتسەنتى, PhD دوكتورى حالەل ماسلوۆ, شەتەل تىلدەرىنىڭ تەوريا­سى جانە تاجىريبەسى كافەدراسىنىڭ اعا وقى­تۋشىسى, PhD دوكتورى گۇلجان دوس­جان ءسوز سويلەپ, بولاشاقتى ەل­با­سىمەن بىرگە قۇراتىندىقتارىن مالىمدەدى. باسقوسۋ سوڭىندا ل.ن.گۋميلەۆ اتىنداعى ەۋرازيا ۇلتتىق ۋنيۆەر­سيتەتىنىڭ جاس عالىمدارى مەن بەلسەندى ستۋدەنتتەرى جانە پروفەسسور-وقىتۋشىلار قۇرامى «مەنىڭ تاڭداۋىم – ەلباسى ن.نازارباەۆپەن بىرگە ەكونوميكاسى كۇشتى, ساياسي تۇراقتى قازاقستان!» اتتى ۇندەۋ قابىلدادى. * * * گۇلجان دوسجان, ەۇۋ فيلولوگيا فاكۋلتەتى جاس عا­لىم­دار كەڭەسىنىڭ ءتورايىمى, PhD دوكتورى: – اتا-بابامىز اق نايزانىڭ ۇشىمەن, اق بىلەكتىڭ كۇشىمەن قورعاپ, بىزدەرگە اماناتتاعان بايتاق وتانىمىز – قازاقستاندا الاڭسىز عۇمىر كەشۋدەمىز. وسىنداي ۇلان-عايىر جەردى قورعاۋدا, ونى بىزگە اماناتتاۋدا قانشاما اعا-ۇرپاق ءوز جاندارىن قۇربان ەتتى. اتا-بابامىز اڭساعان ازاتتىق تاڭى اتقانىنا دا شيرەك عاسىرعا جۋىق ۋاقىت ءوتتى. وسى جىلدار ىشىندە الەمنىڭ مىقتى مەملەكەتتەرى ساناساتىن ابىرويلى ەلگە اينالدىق. كوك تۋى جەلبىرەگەن, ءانۇرانى شارىقتاعان, اشىق اسپان استىندا بەرەكە-بىرلىگى جاراسقان تاۋەلسىز قازاقستاندا ءومىر سۇرۋدەمىز. مىنە, وسىنداي جارقىن جەتىستىكتەرگە جەتۋىمىز ەڭ ءبىرىنشى كەزەكتە ەلباسىنىڭ ارقاسى. جەر كولەمى جونىنەن الەمدە توعىزىنشى ورىن الاتىن, استى قىمبات قازىناعا, ءۇستى جالىندى جاستارعا تولى وسىناۋ كەڭ-بايتاق مەملەكەتتى باسقارۋ ەردىڭ ەرىنىڭ عانا قولىنان كەلەتىن ءىس. وزدەرىڭىز بىلەتىندەي, جاقىندا قازاقستان حالقى اسسامبلەياسى مۇشەلەرى پرەزيدەنتتىك سايلاۋدى مەرزىمىنەن بۇرىن وتكىزۋ جونىندە باستاما كوتەردى. مەنىڭشە, بۇل باستاماعا ەل اعالارىمەن قاتار, مىقتى كوشباسشى كەرەك. قۇدايعا شۇكىر, بىزدە ونداي كوشباسشى بار. ول – ءوز ەلىنىڭ تاعدىرى ءۇشىن بارلىق قيىندىققا مويىمايتىن جانە العا زور ماقساتتار قويا بىلەتىن ءبىزدىڭ ارداقتى باسشىمىز – نۇرسۇلتان ءابىش ۇلى نازارباەۆ. مىنا بىزدەر ءبىلىم الىپ جاتقان قارا شاڭىراق – ەلباسىنىڭ يدەياسىنان تۋعان ءبىلىم ورداسى. وسىندا قانشاما ازامات بولاشاققا قادام باستى. مۇندا ءوز ءىسىنىڭ بىلگىر ماماندارى ءدارىس بەرۋدە. مۇنىڭ بارلىعى, تۇپتەپ كەلگەندە, پرەزيدەنتىمىزدىڭ ساليقالى ساياساتىنىڭ ارقاسى. سايلاۋ – ءبىر كۇندىك قاتارداعى ناۋ­قان ەمەس, بۇل ەل تاعدىرى شەشىلەتىن وتە ماڭىزدى وقيعا. بارشا قازاق­ستان­دىقتاردىڭ بولاشاعىن ايقىندايتىن كۇن. سوندىقتان دا, سايلاۋ بەلگىلەنە قالعان جاعدايدا ايتۋلى وقيعادان بارلىعىمىز تىس قالماي, ءبىر جۇدىرىقتاي جۇمىلىپ, ەلباسىمىزعا قولداۋ بىلدىرەيىك. سوندا عانا ءبىزدىڭ قازاقستان اتا-بابامىز ارمانداعان قۋاتتى ەلگە اينالاتىن بولادى. انار تولەۋحانقىزى, «ەگەمەن قازاقستان». استانا.