سۋرەت: instagram.com/mfa_kz/
ك.لانداۋمەن وتكەن كەزدەسۋدە تاراپتار قازاقستان مەن اقش اراسىنداعى ەكىجاقتى قارىم-قاتىناستاردىڭ قازىرگى احۋالى مەن دامۋ بولاشاعىن تالقىلادى. ەكى مەملەكەت اراسىنداعى ارىپتەستىكتىڭ ءوزارا سەنىم مەن مۇددەگە نەگىزدەلگەن تۇراقتى وڭ سەرپىنگە يە ەكەنى اتالىپ ءوتتى.
م.نۇرتىلەۋ قازاقستان مەن اقش اراسىنداعى كەڭەيتىلگەن ستراتەگيالىق ارىپتەستىك جايىنا توقتالا وتىرىپ, ەلىمىزدىڭ ورتالىق ازياداعى ەڭ ءىرى ەكونوميكا جانە ەۋرازيالىق حاب رەتىندە ايماقتاعى اقش-تىڭ ەكونوميكالىق قاتىسۋىن قامتاماسىز ەتۋدە ماڭىزدى ءرول اتقاراتىنىن اتاپ ءوتتى.
توگو كورولدىگىنىڭ سىرتقى ىستەر, ايماقتىق ينتەگراتسيا جانە شەتەلدەگى توگولەز ازاماتتارىنىڭ ىستەرى جونىندەگى ءمينيسترى روبەرت ديۋسسەمەن وتكەن كەزدەسۋدە ەكىجاقتى قاتىناستاردىڭ دايەكتى تۇردە دامىپ كەلە جاتقانى اتالىپ ءوتتى. كەزدەسۋ قورىتىندىسى بويىنشا ديپلوماتيالىق جانە قىزمەتتىك پاسپورت يەلەرىن ۆيزالىق تالاپتاردان بوساتۋ تۋرالى كەلىسىمگە قول قويىلدى.
اۋستريا رەسپۋبليكاسىنىڭ ەۋروپالىق جانە حالىقارالىق ىستەر جونىندەگى فەدەرالدى ءمينيسترى بەاتا ماينل-رايزينگەرمەن ساياسي, ەكونوميكالىق جانە مادەني-گۋمانيتارلىق سالالارداعى قازاق-اۋستريالىق ىنتىماقتاستىقتىڭ جاي-كۇيى مەن كەلەشەگى تالقىلاندى. ۇكىمەتارالىق كوميسسيا مەن ىسكەرلىك كەڭەس اياسىنداعى ءوزارا ءىس-قيمىلدى جانداندىرۋدىڭ جانە ەكىجاقتى ديالوگتى كۇشەيتۋدىڭ ماڭىزدىلىعى اتالىپ ءوتتى.
ومان سۇلتاناتىنىڭ سىرتقى ىستەر ءمينيسترى بادر ءال-بۋسايديمەن وتكەن كەزدەسۋدە ساۋدا-ەكونوميكالىق جانە ينۆەستيتسيالىق سالالارداعى ارىپتەستىكتى تەرەڭدەتۋ ماسەلەلەرىنە باسا نازار اۋدارىلدى. تاراپتار تۇراقتى دامۋ مەن جاھاندىق قاۋىپسىزدىكتى قامتاماسىز ەتۋ ءۇشىن حالىقارالىق ۇيىمدار شەڭبەرىندە ءىس-قيمىلدى ۇيلەستىرۋدىڭ ماڭىزدىلىعىن جەتكىزدى.
ارمەنيا رەسپۋبليكاسىنىڭ سىرتقى ىستەر ءمينيسترى ارارات ميرزويانمەن وتكەن كەلىسسوزدەر بارىسىندا ەكىجاقتى جانە كوپجاقتى ىنتىماقتاستىقتىڭ وزەكتى ماسەلەلەرى قارالدى. ارمەنيا پرەمەر-ءمينيسترىنىڭ ءبىزدىڭ ەلگە الداعى رەسمي ساپارىنا دايىندىق ماسەلەسىنە ەرەكشە نازار اۋدارىلدى.
بەلارۋس رەسپۋبليكاسىنىڭ سىرتقى ىستەر ءمينيسترى ماكسيم رىجەنكوۆپەن كەزدەسۋدە ساياسي ديالوگتىڭ دايەكتى دامۋى مەن ساۋدا-ەكونوميكالىق ىنتىماقتاستىقتى كەڭەيتۋ ماسەلەلەرى تالقىلاندى. قوس تاراپ گۋمانيتارلىق بايلانىستار مەن وڭىرارالىق ىنتىماقتاستىقتى ودان ءارى دامىتۋعا ءوزارا مۇددەلىلىك ءبىلدىردى.
كيپر رەسپۋبليكاسىنىڭ سىرتقى ىستەر ءمينيسترى كونستانتينوس كومبوسپەن كەزدەسۋ بارىسىندا ءوزارا ساپارلاردىڭ قورىتىندىلارى تالقىلانىپ, كولىك, ەنەرگەتيكا, اۋىل شارۋاشىلىعى جانە تسيفرلاندىرۋ سالالارىنداعى ىنتىماقتاستىقتىڭ جاڭا باعىتتارى بەلگىلەندى. قازاقستان كيپردىڭ ەۋروپالىق وداق كەڭەسىنە الداعى توراعالىعى اياسىندا ءوزارا ءىس-قيمىل جاساۋعا دايىن ەكەنىن ءبىلدىردى.
كەزدەسۋلەر قورىتىندىسى بويىنشا بارلىق ارىپتەس تاراپىنان ءوزارا سەنىمنىڭ جوعارى دەڭگەيى مەن ءوزارا ءتيىمدى ىنتىماقتاستىقتى ودان ءارى نىعايتۋعا دايىندىق راستالدى.
