سۋرەت: qazaquni.kz
ءبىر اقيقات, ۋلى كولمەن كورشى اقتاۋ قالاسىنىڭ, مۇنايلى اۋدانى مەن تۇپقاراعان اۋدانىنىڭ كەيبىر اۋىلدارىنىڭ تۇرعىندارى ونىڭ زاردابىن ءبىر كىسىدەي تارتىپ-اق كەلەدى. دالاسى جەلدى ماڭعىستاۋدا كولدەن ۇشقان شاڭ-توزاڭ, سول توڭىرەككە جايىلعان مال ەتى مەن ءسۇتى حالىق دەنساۋلىعىنا ايتارلىقتاي زيان.
قوشقار اتا تۋرالى دابىل قاعىلعالى دا ءبىراز جىل, جەرگىلىكتى اكىمدىكتىڭ «جاسالىپ جاتىر, تۇمشالانىپ جاتىر, مۇنشالىقتى قارجى ءبولىندى» دەپ داۋرىقتىرعانىنا دا كوپ بولدى. ماسەلە سيىرقۇيىمشاقتانىپ سوزىلىپ كەتتى. راديواكتيۆتى قالدىقتى قالاي تۇمشالاۋدى بىلمەي, ءبىر جىلى تاسپەن, ءبىر جىلى قۇممەن بىتەپ, كەلەسى جىلى قالدىق سۋدى ايداپ, سودان سوڭ بۇتا ەگىپ, سان امال قولدانىلدى. زاماناۋي عىلىمي جەتىستىكتەردى پايدالانا وتىرىپ زارارسىزداندىرۋعا ساۋاتىمىز جەتپەي مە, الدە قاراجات جەتپەي مە؟ بۇعان دەيىنگى بولىنگەن ميللياردتاعان قاراجات قايدا كەتتى نەمەسە قالاي يگەرىلدى؟ سۇراق كوپ, جاۋاپ جوق. دۇرىسى, قۇنت پەن نيەت, جاناشىرلىق جەتىسپەيدى. مۇنايىن قۇبىرلاپ سورعان ماڭعىستاۋدىڭ مۇڭىن تىڭدايتىن, جاسىن سۇرتەتىن ءبىر جان جوق.
كۇنى كەشە ماڭعىستاۋدا «قوشقار اتا» قالدىق قويماسىن قالپىنا كەلتىرۋ جۇمىسى قايتا باستالدى. الداعى ۋاقىتتا «قوشقار اتا» اۋماعىنا 640 گا جەرگە 1 ملن ءتۇپ سەكسەۋىل كوشەتى وتىرعىزىلادى, زاماناۋي سۋارۋ جۇيەسى ورناتىلىپ, قويما اۋماعىن تەمىرمەن قورشاۋ جۇمىسى قولعا الىنادى.
«جوبا مەملەكەت باسشىسى قاسىم-جومارت توقاەۆتىڭ تاپسىرماسى اياسىندا ىسكە اسىرىلىپ جاتىر. 2024 جىلعى زەرتتەۋ ناتيجەسىندە قويما اۋماعىندا راديواكتيۆتى لاستانۋ شەكتى دەڭگەيدەن اسپايتىنى انىقتالىپ, بيولوگيالىق رەكۋلتيۆاتسيا جۇمىسى ۇسىنىلعان بولاتىن. وسى نەگىزدە «2025–2026 جىلدارعا ارنالعان جاسىل قورعاۋ ايماعىن قۇرۋ جوباسى» ازىرلەندى. جوبا ءوڭىر ەكولوگياسىن جاقسارتۋعا, حالىق دەنساۋلىعىنا اسەر ەتەتىن فاكتورلاردى ازايتۋعا, سونداي-اق قالدىق قويماسىنىڭ ۇزاقمەرزىمدى ەكولوگيالىق قاۋىپسىزدىگىن قامتاماسىز ەتۋگە باعىتتالعان. قوشقار اتا قالدىق قويماسى – حالىق اراسىندا كوپتەن بەرى الاڭداۋشىلىق تۋعىزىپ كەلە جاتقان ماسەلە. بۇگىنگى باستالعان جۇمىس – ەكولوگيانى ساۋىقتىرۋعا باعىتتالعان ماڭىزدى قادام. بۇل ءىستى جۇيەلى ءارى اشىق تۇردە جۇزەگە اسىرۋعا مۇددەلىمىز. 2026 جىلدىڭ اياعىنا دەيىن اياقتالۋى قاجەت», دەگەن ماڭعىستاۋ وبلىسىنىڭ اكىمى نۇرداۋلەت قيلىباي باستامانىڭ ءوڭىر ءۇشىن ستراتەگيالىق ماڭىزعا يە ەكەنىن اتاپ ايتتى.
ۋلى كول باسىندا اكىمگە جوبانىڭ جۇزەگە اسىرىلۋ بارىسى مەن الداعى جوسپارلار تانىستىرىلدى. قوشقار اتاعا قاتىستى بۇل جولعى باستاماعا ماڭعىستاۋلىقتار ۇلكەن ءۇمىت ارتىپ وتىر.
ماڭعىستاۋ وبلىسى
