بۇگىندە ينفەكتسيانىڭ 33 ءتۇرى بويىنشا جاعداي تومەندەگەن. ا ۆيرۋستىق گەپاتيتى — 2,5 ەسە, كوروناۆيرۋس ينفەكتسياسى — 1,6 ەسە, ليامبليوز — 32%, اسكاريدوز — 21%, سالمونەللەز — 7% ازايعان. تۋبەركۋلەزبەن سىرقاتتانعاندار 12,6% , ونىڭ ىشىندە تىنىس الۋ ورگاندارىنىڭ تۋبەركۋلەزىمەن – 11,5% - عا, باكتەريا بولۋمەن-4,14% - عا تومەندەگەنى بايقالعان. سول سەكىلدى قىزىلشا مەن كوكجوتەل بويىنشا سىرقاتتانۋشىلىقتى تومەندەتۋ بويىنشا وڭ ديناميكا بايقالىپتى. ماسەلەن, اعىمداعى جىلدىڭ 8 ايىندا قىزىلشامەن اۋىرعاندار وتكەن جىلدىڭ سايكەس كەزەڭىمەن سالىستىرعاندا 91%-عا تومەندەدى. وكىنىشكە قاراي, اۋرۋدىڭ وسى ءتۇرى بەس جاسقا دەيىنگى بالالار اراسىندا ءالى دە تىركەلەدى. ولاردىڭ 75%-ى ەكپە الماعان. كوكجوتەلگە كەلەتىن بولساق, ونىڭ جيىلىگى وتكەن جىلدىڭ سايكەس كەزەڭىمەن سالىستىرعاندا 8 ەسە ازايعان. ناۋقاستاردىڭ 87%-ىن 5 جاسقا دەيىنگى بالالار قۇرايدى, ولاردىڭ 90%-ى ۆاكتسينا سالدىرماعان. دەنساۋلىق ساقتاۋ مينيسترلىگى سانيتارلىق-ەپيدەميولوگيالىق باقىلاۋ كوميتەتىنىڭ توراعاسى سارحات بەيسەنوۆا ەپيدەميولوگيالىق جاعدايدى تۇراقتاندىرۋ بويىنشا ەپيدەمياعا قارسى ءىس-شارالار جالعاسىپ جاتقانىن ايتتى.
«قىزىلشاعا قارسى 191 مىڭنان استام بالا, كوكجوتەلگە, ديفتەرياعا, سىرەسپەگە قارسى — 235 مىڭنان استام بالا يممۋنداۋمەن قامتىلدى. اعىمداعى جىلدىڭ 8 ايىندا جوسپارلى يممۋنداۋ شەڭبەرىندە: قىزىلشاعا, قىزامىققا جانە پاروتيتكە قارسى — 1 جاستاعى 220 519 بالا جانە 6 جاستاعى 225 734 بالاعا ەكپە سالىندى. كوكجوتەلگە قارسى ەكپەلەردى 1 جاسقا دەيىنگى 200 131 بالا, 1 جاستاعى 216 625 بالا جانە 6 جاستاعى 215 163 بالا الدى. قازىرگى ۋاقىتتا ەپيدەميولوگيالىق جاعدايدى تولىق تۇراقتاندىرۋ ءۇشىن كوزدەلگەن جاستاعى بالالاردى ۆاكتسينالاۋمەن قامتۋ قاجەت. وسىعان بايلانىستى باس مەملەكەتتىك دارىگەر بالالاردىڭ اتا-انالارىنا ۇندەۋ تاستادى. ۆاكتسينالاۋ – بالانى قىزىلشا مەن كوكجوتەل سياقتى جۇقپالى اۋرۋلاردان قورعاۋدىڭ ەڭ سەنىمدى جانە دالەلدەنگەن ءادىسى. ۆاكتسينالاۋ ارقىلى ءبىز قوعامدىق يممۋنيتەتتى قالىپتاستىرا الامىز جانە مەديتسينالىق سەبەپتەرمەن ەكپە سالدىرا المايتىنداردى قورعاي الامىز», دەيدى سارحات بەيسەنوۆا.
قورىتا كەلە ايتار بولساق, ەلدە قولدانىلاتىن ۆاكتسينالار دۇنيەجۇزىلىك دەنساۋلىق ساقتاۋ ۇيىمىنىڭ حالىقارالىق ستاندارتتارى مەن ۇسىنىستارىنا سايكەس كەلەدى. ۆاكتسينالار قولدانىسقا بەرىلمەس بۇرىن قاتاڭ ساپا مەن قاۋىپسىزدىك باقىلاۋىنان وتەدى.
