كاسىپورىننىڭ اتى ايتىپ تۇرعانىنداي, زاۋىتتا شىعارىلاتىن گازدى بەتون بلوكتارى ەكولوگيالىق تازا ماتەريال بولىپ تابىلادى. ولاردىڭ قۇرامىندا حيميالىق زياندى زاتتار جوق, قۇرىلىستىڭ پايدالانۋ مەرزىمىن ۇزارتۋ ءۇشىن قانداي دا ۋلى قۇراممەن وڭدەۋدى قاجەت ەتپەيدى. ەكوبلوكتار ەكولوگتاردىڭ بارلىق تالاپتارىنا ساي كەلەدى, اينالاعا گاز بەن شاڭ شىعارمايدى, ادام دەنساۋلىعىنا زيان كەلتىرمەيدى. ءوزىنىڭ ەكولوگيالىق تازالىعى جاعىنان تەك اعاشتى عانا الدىنا سالادى, الايدا, اعاشتان ارتىقشىلىعى – ول شىرىمەيدى جانە توزبايدى. قولدانىلاتىن شيكىزات ماتەريالدارىنىڭ ەكولوگيالىق تازالىعى سەرتيفيكاتتارمەن بەكىتىلگەن جانە قاۋىپسىزدىككە كەپىلدىك بەرەدى.
– «ەكوتون-باتىس» زاۋىتىن سالۋ 2007 جىلى باستالدى. زاۋىت ءبىر جىل ىشىندە سالىنىپ, ىسكە قوسىلدى. باستاپقىدا جوبالاۋدا قيىندىق كەزدەستى. سەبەبى, زاۋىت ورنالاستىرىلاتىن عيمارات ون جىل بويى پايدالانىلماعاندىقتان, قايتا جاراقتاندىرۋ جۇمىستارى قوسا جۇرگىزىلدى. دەگەنمەن, وسىنداي قيىندىقتارعا قاراماستان, زاۋىت مەجەلى ۋاقىتىندا پايدالانۋعا بەرىلدى. 2008 جىلى ناۋرىز ايىندا العاشقى ءونىم ءوندىرىلدى. ەكى اي وتكەن سوڭ-اق زاۋىت جوبالىق قۋاتىنا شىقتى. جاڭادان ىسكە قوسىلعان كاسىپورىننىڭ وسىنشا قىسقا مەرزىمدە جوبالىق قۋاتىنا شىعۋى ۇجىمنىڭ ىلگەرى كۇنگە دەگەن سەنىمىن نىعايتتى. بۇل ۇيىمشىل ۇجىمنىڭ العاشقى جەڭىسى بولاتىن. جوعارى تەحنولوگيالىق قوندىرعىلاردى باسقارۋدى يگەرگەن كاسىبي بىلىكتى تەحنولوگتار, ينجەنەرلەر مەن وپەراتورلار جۇمىسىنىڭ جەمىسى ەدى, – دەيدى «ەكوتون-باتىس» جشس ديرەكتورى ناريمان بايمۇقانوۆ.
زاۋىتتا العاشقىدا 600ح250ح100ح400 ميلليمەترلىك ۇيالى بەتون شىعارىلسا, 2009 جىلى تۇتىنۋشىلاردىڭ سۇرانىسىن قاناعاتتاندىرۋ ماقساتىندا قالىڭدىعى 80,120,150,250,350 ميلليمەترلىك ۇيالى بەتون بلوكتارى وندىرىلە باستادى. كاسىپورىندا گەرمانيانىڭ «International GmbH» كومپانياسىنىڭ تەحنولوگياىق قوندىرعىسى ورناتىلعان. 2011 جىلى ۇيالى بەتوننان بەلدىكتەر شىعاراتىن تەحنولوگيالىق جەلىنى ورناتۋ جۇمىستارى باستالدى, بىلتىر ءوندىرىستىڭ جىلدىق قۋاتىن 200 مىڭ تەكشە مەتردەن استام ءونىم وندىرۋگە جەتكىزەتىن بەسىنشى اۆتوكلاۆ ىسكە قوسىلدى.
قازىر زاۋىت ىرعاقتى جۇمىس ءىستەپ تۇر. جەرگىلىكتى قۇرىلىس كومپانيالارى باسقا وڭىرلەردەن قۇم بلوكتار, ۇلۋتاس, كىرپىش جانە باسقا ماتەريال جەتكىزگەنشە, ۋاقىتتان دا, تاسىمالداۋدان دا ۇتىپ, «ەكوتون-باتىس» جشس-نىڭ قابىرعالىق بلوكتارىن پايدالانۋدى قولاي كورەدى. زاۋىتتىڭ ۇيالى بەتون بۇيىمدارى ءوزىنىڭ تاماشا تەحنيكالىق سيپاتتامالارى ارقاسىندا قۇرىلىسشىلار اراسىندا اناعۇرلىم بەرىك سەنىمگە يە بولۋدا. سەرىكتەستىك ونىمدەرىنىڭ جىلۋ ۇستاعىش, وتقا توزىمدىلىك, جەڭىل دە ونىمدىلىگىنە بايلانىستى سيليكات كىرپىشتەن توعىزدان استام ارتىقشىلىعى بار. گازدى بەتون بلوكتارى جەڭىل دە ۇلكەن, سوندىقتان قابىرعالاردى تەز ارادا قالاۋعا بولادى. ال كىرپىشكە قاراعاندا ەرىتىندى 5-7 ەسە از جۇمسالسا, قالاۋ شاپشاڭدىعى 3-4 ەسە ارتادى.
زاۋىت ونىمدەرى 2010 جىلى «قازاقستاننىڭ ۇزدىك تاۋارى» قالالىق كونكۋرسىندا «تۇرعىندار ءۇشىن ۇزدىك تاۋار» نوميناتسياسى بويىنشا ءبىرىنشى ورىندى جەڭىپ السا, سول جىلى وسى اتتاس رەسپۋبليكالىق كونكۋرس-كورمەدە «تۇرعىندار ءۇشىن ۇزدىك تاۋار» نوميناتسياسى بويىنشا ءۇشىنشى ورىنعا يە بولدى. 2011 جىلى كاسىپورىن ءونىمدەرى پرەزيدەنتتىڭ «التىن ساپا» سىيلىعىنىڭ كونكۋرسىنا قاتىستى. سول جىلى كاسىپورىنعا «ءمىنسىز» ساپا بەلگىسى بەرىلدى.
كاسىپورىن ونىمدەرى نەگىزىنەن وبلىسقا جانە باتىس قازاقستان ءوڭىرىنە شىعارىلادى. سونداي-اق, وڭتۇستىك قازاقستانعا دا وتكىزىلەدى. وتكەن جىلى رەسەيدىڭ شەكارالاس ورنالاسقان ورىنبور, ور قالالارىنا زاۋىت ونىمدەرىنىڭ العاشقى توبى جونەلتىلدى. سەرىكتەستىك ونىمدەرىنىڭ ساپالىلىعىنىڭ ارقاسىندا گازدى بلوك قابىرعالىق ماتەريالدارىنا شەتەلدىك تۇتىنۋشىلار قىزىعۋشىلىق تانىتتى. ناتيجەسىندە ورىنبور وبلىسىندا سەرىكتەستىكتىڭ وكىلدىگى اشىلدى.
«ەكوتون-باتىس» جشس قۇرىلىس ماتەريالدارى نارىعىنا قادام باسقانىنا ونشا كوپ ۋاقىت بولا قويعان جوق. سوعان قاراماستان, سەرىكتەستىكتىڭ گازدى بەتون شىعاراتىن زاۋىتىنىڭ ونىمدەرى تۇتىنۋشىلاردىڭ سۇرانىسىنا يە بولىپ وتىر. سوندىقتان دا بۇل زاۋىت وڭىردەگى وزىندىك جۇمىس ىرعاعى قالىپتاسقان كاسىپورىنداردىڭ قاتارىنا جاتادى.
ساتىبالدى ءساۋىرباي, «ەگەمەن قازاقستان».
اقتوبە وبلىسى.
