بيىل جالپى مەملەكەتتىك باقىلاۋمەن 184 سۋبەكت قامتىلىپ, 9 ملن تەڭگەدەن استام ايىپپۇل سالىنعان. تەكسەرۋ ءىس-شارالارىنىڭ 92%-ى پروفيلاكتيكالىق سيپاتتا جانە قاشىقتىقتان جۇرگىزىلگەن. تەحنيكالىق رەتتەۋ جانە مەترولوگيا كوميتەتى تۇركىستان وبلىسى بويىنشا دەپارتامەنتىنىڭ باسشىسى اسەت تۋرەباەۆتىڭ مالىمدەۋىنشە, مەملەكەتتىك باقىلاۋ جۇمىستارى تۇراقتى جۇرگىزىلۋدە. دەپارتامەنت تاراپىنان «QazCem» بىرلەستىگىنىڭ ارىزى بويىنشا وزبەكستاندا شىعارىلعان تسەمەنت ونىمىنە بەرىلگەن جالعان «سۇر» سايكەستىك سەرتيفيكاتى ماسەلەسىنە قاتىستى ءتيىستى ءىس-شارالار اتقارىلعان. ناقتىراق ايتقاندا, تەحنيكالىق رەگلامەنت تالاپتارىنا سايكەس كەلمەيتىن وزبەكستاندا شىعارىلعان «CONCH» ماركالى تسەمەنتىنە قاتىستى جەتىساي جانە سارىاعاش اۋداندارىندا جوسپاردان تىس تەكسەرۋلەر جۇرگىزىلدى. ەكى جاعدايدا ءونىمنىڭ جالعان سايكەستىك تۋرالى سەرتيفيكاتىمەن ساتىلىپ جاتقاندىعى انىقتالدى. ناتيجەسىندە, 2 جەكە كاسىپكەرگە جالپى سوماسى 920088 تەڭگە مولشەرىندە اكىمشىلىك ايىپپۇل سالىنىپ, بۇزۋشىلىقتاردى جويۋ تۋرالى نۇسقامالار بەرىلدى جانە 3577 دانا تسەمەنت ءونىمىن اينالىمعا شىعارۋعا تىيىم سالۋ شارالارىن قولدانۋ تۋرالى قاۋلىلار شىعارىلدى. جالعان سايكەستىك سەرتيفيكاتى بويىنشا تاۋاردى جەتكىزۋشىگە قاتىستى شىمكەنت پوليتسياسىنا ءوتىنىش جولدانىپ, قازىرگى تاڭدا قىلمىستىق ءىس قارالىپ جاتىر.
ىشكى نارىقتى ارزان جانە ساپاسىز يمپورتتان قورعاۋ ماسەلەلەرى جونىندەگى احۋالدىق شتابتىڭ ەكىنشى وتىرىسىندا وبلىس اكىمىنىڭ ورىنباسارى تالعات قوزبەكوۆ جاۋاپتى تۇلعالارعا باقىلاۋدى كۇشەيتۋ بويىنشا بىرقاتار تاپسىرما بەردى. شەكارا ماڭىنداعى وتكىزۋ پۋنكتتەرىندە ۆەتەريناريالىق جانە فيتوسانيتاريالىق باقىلاۋدى ۇزدىكسىز جۇرگىزۋدى قامتاماسىز ەتۋدى مىندەتتەدى.
