كىتاپتىڭ ءبىرىنشى ءبولىمى «الاشتىڭ ابىرويىن اسقاقتاتقاندار» دەپ اتالادى. قازاق بالۋاندارى اراسىنان تۇڭعىش وليمپيادا چەمپيونى اتانعان داڭقتى بالۋان جاقسىلىق ۇشكەمپىروۆتىڭ ادامي بولمىسى, ازاماتتىق كوركەم مىنەزى تۋرالى باياندايدى. قازاق سپورتىنا ولشەۋسىز ۇلەس قوسقان بالۋاندى جاڭا قىرىنان بايىپتايدى.
2000 جىلدارى ەلىمىزدە اۋىر اتلەتيكا سپورتى قۇلدىراۋعا ۇشىرادى. جاھاندىق دودالاردا دىتتەگەن ناتيجەگە جەتە المادىق. وسى تۇستا, فەدەراتسيا تىزگىنىن قايرات تۇرلىحانوۆ ۇستاپ, شەتەلدەن بىلىكتى باپكەرلەردى تارتىپ, جۇيەلى جۇمىس جۇرگىزدى. ءۇش دۇركىن وليمپيادا چەمپيونى اتانعان تۇرىك اۋىر اتلەتتەرى نايىم سۇلەيمەنوعلى مەن حاليل مۋتلۋ سىندى ساڭلاقتاردى تۇلەتكەن ەنۆەر تۇركەلەري باپكەردى ەلگە شاقىردى. بىلگىر باسشىنىڭ بۇل بايلامى بەكەر بولعان جوق, اۋىر اتلەتيكانىڭ ابىرويىن اسىردى. ءبىزدىڭ تولاعايلارىمىز دا الەمنىڭ ۇزدىكتەرى اتانىپ, جاھان نازارىنا ىلىكتى. قالامگەر اۋىر اتلەتيكانى ورگە سۇيرەگەن قايرات بولات ۇلىنىڭ قايراتكەرلىگىن تەرەڭدەي سۋرەتتەيدى.
كىتاپتا ەركىن كۇرەستەن الەمدىك دەڭگەيدەگى جوعارى دارەجەلى تورەشى, قازاقستاننىڭ ەڭبەك سىڭىرگەن جاتتىقتىرۋشىسى ءتۇسىپحان سايحانوۆتىڭ ساليقالى عۇمىرىنداعى ساۋلەلى ساتتەرىن ساعىنىشپەن باياندايدى. سامبو كۇرەسىنەن قازاق جاستارى اراسىندا تۇڭعىش كسرو سپورت شەبەرى مارات يماشەۆ نەبارى 29 جاسىندا كوز جۇمدى. تارباعاتاي توپىراعىندا تۋعان تارلاننىڭ وتىزعا جەتەر-جەتپەس عۇمىرىندا ەڭسەرگەن اسۋىن اۆتور جان-جاقتى باياندايدى.
«الدىڭعى تولقىن اعالار» دەپ اتالعان ەكىنشى بولىمدە پۋبليتسيست, باسپاگەر ىرىم كەنەنباەۆتىڭ قازاق باسپاسوزىنە قوسقان جاقسىلىعى تۋرالى ايتادى. بىلىكتى پەداگوگ, كسرو مەملەكەتتىك سىيلىعىنىڭ لاۋرەاتى قانيپا بىتىباەۆانىڭ بولمىسى, وقۋ-اعارتۋ سالاسىنا قوسقان ولشەۋسىز ۇلەسىنە دە وسى كىتاپتا جوعارى باعا بەرىلەدى.
جازۋشى, ساتيريك, كوسەمسوزشى كوپەن امىربەك جوعارى وقۋ ورنىندا وقىپ ءجۇرىپ ەركىن كۇرەستەن سپورت شەبەرى اتاعىن العانىن كوپشىلىك بىلە بەرمەيدى. اۆتور كۋرستاسى كوپەننىڭ قازاق رۋحانياتىنا سىڭىرگەن ەڭبەگىن سپورتتاعى جەتىستىگىمەن دە قاتار وربىتە سۋرەتتەيدى. سونداي-اق اۆتور كىتابىندا قازاق پۋبليتسيستيكاسىنىڭ كورنەكتى وكىلى, تالانتتى جازۋشى مارات قابانباەۆتىڭ كوپشىلىككە بەيمالىم قىرىنا, تاعدىر-تالايىنا توقتالادى. «كوزدەن كەتسە دە, كوڭىلدە ورنىعىپ قالاتىن اياۋلى ازاماتتاردىڭ الدىنداعى قۇرمەتىم بولسىن دەگەن نيەتپەن وسى كىتاپتى جارىققا شىعاردىم», دەيدى و.ەلۋباي.
