جاڭا پاتەرلەر

توتەنشە جاعدايعا قاتىستى مىندەتتەمە ورىندالدى اقمولا وبلىسىنىڭ اكىمى سەرگەي كۋلاگين اتباسار قالا­سىنداعى سۋ تاسقىنىنان زارداپ شەككەن تۇرعىنداردى جاڭا قونىستارىمەن قۇتتىقتادى زامانالىق ساۋلەتتەگى جانە بارلىق قولايلىلىقتار قا­راس­تىرىلعان كوپقاباتتى 45 ءپا­تەر­لىك ءۇيدىڭ كىلتتەرىن تاپسىرۋ ۇمىتىلماس اسەردەگى سالتاناتقا اينالدى. شاشۋ شاشىلىپ, قالا كوكجيەگىندە اسەم ءان اۋەزى قالىقتادى. وسىنداعى بارلىق 45 پاتەردىڭ وتباسىندا كەڭ مول داستارقان جايىلىپ, ىزگى تىلەكتەر ايتىلدى. اسىرەسە, اكىمدى سۋرەتكە تۇسۋگە سۇيرەلەگەن بالالاردىڭ قۋانىشىندا شەك جوق. ءبىز 2 بولمەلىك پاتەردىڭ كىلتىنە يە بولعان جاس انا گۇلنار توسەنوۆانىڭ بوساعاسىنا قۇتتى بولسىن ايتتىق. گۇلناردىڭ وتباسى وزەن جيەگىنە جاقىن ءارى ساماننان تۇرعىزىلعان ءۇيدى ۇزاق جىلدار قونىس ەتكەن. كۇتپەگەن اپاتتان زاماتتا زارداپ شەككەندەر دە سولار بولىپتى. العاشىندا جاتاقحانانىڭ ۇياداي بولمەسىنەن ۋاقىتشا ورىن تيگەندە كادىمگىدەي قۋانعان. مىنە, بۇگىن جارقىراعان جاڭا پاتەرگە قولى جەتىپ, بالالارىمەن بىرگە مارە-سارە بولۋدا. – مەن ءۇي-ءىشىمنىڭ اتىنان, باسىمىزعا كۇن تۋعان ساتتە جىلى ءسوزىن اياماعان جەرلەستەرىمە, كومەك قولىن سوزعان جەرگىلىكتى بيلىك وكىلدەرىنە العىسىمدى ايتامىن, – دەيدى گۇلنار توسەنوۆا. – ءتىپتى, ەلباسىنىڭ ءوزى جاعدايىمىزدى قاداعالاپ, ۇكىمەت باسشىسىنىڭ ءبىرىنشى ورىنباسارى باقىتجان ساعىنتاەۆ باستاعىن ارنايى كوميسسيانى جىبەرۋى, ءوزىمىزدىڭ وبلىس اكىمى سەرگەي ۆيتالەۆيچتىڭ كۇن قۇرعاتپاي بىزدەن حابار الىپ تۇرعانى مەملەكەتىمىزدىڭ قوعام مۇشەلەرىنە دەگەن قامقور­لىعىنىڭ شەكسىزدىگىن بىلدىرەدى. مەن وسىنداي وتانىمنىڭ بار­لىعىنا ماساتتانامىن. بالا­لارىم دا وسى ەلدىڭ ءبىر تۇتقاسى بولسا ەكەن دەپ ارماندايمىن. اتباسار قالاسىندا, كوكتەمگى سۋ تاسقىنى كەزىندە 559 وتباسى اپات زاردابىن شەككەن بولاتىن. ونىڭ ىشىندە 208 ءۇي اۆاريالىق جاعدايدا دەپ تانىلىپ, ال 350-ىنە كۇردەلى جوندەۋ قاجەت دەپ شەشىلگەنىن ەسكە سالا كەتكىمىز كەلەدى. توتەنشە جاعدايدى جويۋ بويىنشا ءىس-شارالاردىڭ ناتيجەسىندە ءۇيسىز قالعان 208 وتباسى باسپانالى بولدى. بۇل ءۇشىن ارقايسىسى 45 پاتەرلىك ءتورت ءۇي سالىنىپ, بۇرىنعى جاتاقحانا عيماراتى 29 پاتەرلىك تۇرعىن جاي رەتىندە قايتا قۇراستىرىلۋدان ءوتتى. قالادا, سونداي-اق, جارتىلاي سۋ استىندا قالعان №1 ورتا مەكتەپ پەن 350 ۇيگە كۇردەلى جوندەۋ جۇمىستارى جۇرگىزىلىپ, ۇزىندىعى 21,4 كيلومەترلىك كوشە قالپىنا كەلتىرىلدى. ءسويتىپ, اتباسارداعى توتەنشە جاعداي زارداپتارىن جويۋ جونىندەگى جۇمىس جوسپارىنا ەنگىزىلگەن بارلىق شارالار تولىق كولەمدە ورىندالدى. باقبەرگەن امالبەك, «ەگەمەن قازاقستان». اقمولا وبلىسى.