فوتو: قورعانىس مينيسترلىگى
جارىس سەگىز كەزەڭنەن تۇردى. اسكەري قىزمەتشىلەر جەكە جانە كوماندالىق ەسەپتە باق سىناپ, جاۋىنگەرلىك دايىندىق, دەنە شىنىقتىرۋ, تاكتيكالىق جانە زياتكەرلىك قابىلەتتەرى بويىنشا باعالاندى.
قازاقستان قارۋلى كۇشتەرىنىڭ باس سەرجانتى, شەبەر-سەرجانت تەمىربەك حالىقوۆتىڭ ايتۋىنشا, بيىلعى بايقاۋدىڭ باستى ەرەكشەلىگى – تاكتيكالىق مەديتسينا ەلەمەنتتەرىن قولدانۋ.
«بيىلعى جيىننىڭ ەرەكشەلىگى تاكتيكالىق مەديتسينا ەلەمەنتتەرىمەن ناقتى ۇرىس جاعدايىن مودەلدەيتىن ستسەناريلەردى پىسىقتاۋ, تاۋلى نەمەسە جوعارعى رەلەفتى جەردە باعدار تابۋ, بولىمشە قۇرامىندا ۇرىس جۇرگىزۋ بولدى», دەدى قر قك باس سەرجانتى شەبەر-سەرجانت تەمىربەك حالىقوۆ.
«ايبىن» اسكەري-سپورتتىق كوپسايىسىندا دەسانتتىق-شابۋىلداۋ اسكەرلەرى 48386 اسكەري ءبولىمىنىڭ سەرجانتى جانداربەك يسابەكوۆ جەكە ەسەپتە ۇزدىك شىقتى.
«باعدار» نوميناتسياسىندا 14776 اسكەري ءبولىمىنىڭ اعا سەرجانتى بەكزات اجىعاليەۆ توپوگرافيالىق كارتامەن جۇمىس ىستەۋ جانە مارش كەزىندە باعدارلاۋ بويىنشا جەڭىمپاز اتاندى.
تاكتيكالىق مەديتسيناعا ارنالعان «جاردەم» كەزەڭىندە «وڭتۇستىك» وڭىرلىك قولباسشىلىعى 66597 اسكەري ءبولىمىنىڭ 2-سىنىپتى سەرجانتى المات امانباەۆ ۇزدىك اتاندى.
كەدەرگىلەر جولاعىنان وتۋگە نەگىزدەلگەن «قايسار» سايىسىندا 18404 اسكەري ءبولىمىنىڭ سەرجانتى جاندوس راقىمعازى ەرەكشە ناتيجە كورسەتتى. ول 15 كەلىلىك جۇكپەن 21 شاقىرىمدىق مارشتى 2 ساعاتتا ەڭسەرىپ, رەكورد ورناتتى. زياتكەرلىك جارىس ء«بىلىمپازدا» اسكەري پوليتسيا باس باسقارماسىنان كەلگەن سەرجانت ەرمەك ءجۇنىسوۆ جەڭىمپاز بولدى.
«مەرگەن» كەزەڭىندە 14776 اسكەري ءبولىمىنىڭ سەرجانتى دانيار ساپاراليەۆ وق اتۋ بويىنشا ۇزدىك اتقىش اتاندى. ال «كەرۋەن» تاكتيكالىق دايىندىق سايىسىندا «باتىس» وڭىرلىك قولباسشىلىعى 30238 اسكەري ءبولىمىنىڭ سەرجانتى تىلەۋباي ماحامبەتوۆ جەڭىسكە جەتىپ, «جەكپە-جەكتە» دە قارسىلاستارىنان وق بويى وزىپ شىقتى.
جالپىكوماندالىق ەسەپتە دەسانتتىق-شابۋىلداۋ اسكەرلەرىنىڭ كومانداسى توپ جارسا, ەكىنشى ورىن 14776 اسكەري بولىمىنە بۇيىردى. ۇزدىك ۇشتىكتى «باتىس» وڭىرلىك قولباسشىلىعى تۇيىندەدى. بايقاۋدىڭ ءابسوليۋتتى جەڭىمپازى بولىپ 18404 اسكەري ءبولىمىنىڭ سەرجانتى جاندوس راقىمعازى تانىلىپ, «اسكەر تۇعىرى» اتاعىن يەلەندى.
ۇيىمداستىرۋشىلاردىڭ ايتۋىنشا, XV بۇكىلارميالىق بايقاۋ سەرجانتتاردىڭ كاسىبيلىگىن ايقىنداپ قانا قويماي, تاجىريبە الماسۋعا, تاكتيكالىق ماشىقتارىن شىڭداۋعا جانە جاۋىنگەرلىك رۋحتى كوتەرۋگە ىقپال ەتتى.
