ساپار اياسىندا دەپۋتاتتار ءىرى ونەركاسىپتەردى, تازارتۋ نىساندارىن جانە تاريحي سىناپتى لاستاۋمەن بايلانىستى «بىلقىلداق» جيناقتاعىشىن ارالادى.
جيىندا ءوندىرىستىڭ قورشاعان ورتاعا اسەرىن ازايتۋعا, تازارتۋ جۇيەلەرىن جاڭعىرتۋعا, بارلىق ءىرى لاستاۋشى كاسىپورىنعا اۆتوماتتاندىرىلعان مونيتورينگ جۇيەلەرىن ورناتۋعا جانە جيناقتالعان ەكولوگيالىق لاستانۋدىڭ سالدارىن جويۋعا نازار اۋدارىلدى.
كوميتەت توراعاسى ەدىل جاڭبىرشين مەملەكەت باسشىسى ءوز جولداۋلارىندا ەكولوگيا ماسەلەلەرىن ءاردايىم ايرىقشا ءمان بەرەتىنىن, قوعامدا ەكولوگيالىق مادەنيەتتى دامىتۋ جونىندە ناقتى تاپسىرمالار بەرگەنىن اتاپ ءوتتى.
«كوميتەت جوسپارىنا پاۆلودار وبلىسىنا ساپاردى بەكىتۋىمىز بەكەر ەمەس. ويتكەنى ەلىمىزدىڭ قورشاعان ورتاسىنا شىعاتىن لاستاۋشى شىعارىندىلاردىڭ ۇشتەن ءبىرىن وسى ءوڭىر قۇراپ وتىر. ءبىز ءوءڭىردىڭ ەكولوگيالىق ماسەلەلەرىنەن جاقسى حاباردارمىز جانە ولاردى شەشۋدى مۇددەلى مەملەكەتتىك ورگاندارمەن بىرلەسىپ تۇراقتى تۇردە تالقىلاپ كەلەمىز», دەدى ە.جاڭبىرشين.
ەكولوگيا جانە تابيعي رەسۋرستار ۆيتسە-ءمينيسترى جومارت اليەۆ رەسپۋبليكاداعى جالپى شىعارىندىلاردىڭ شامامەن 30 پايىزى پاۆلودار وبلىسىنا تيەسىلى ەكەنىن ايتتى. ول ءىرى كاسىپورىنداردى ەڭ وزىق قولجەتىمدى تەحنيكالارعا كوشىرۋ مەن ەرتىس وزەنىن قورعاۋعا ارنالعان تازارتۋ قۇرىلىستارىن جاڭعىرتۋ باسىم باعىت ەكەنىن العا تارتتى.
دەگەنمەن پاۆلودار وبلىسى اكىمىنىڭ ورىنباسارى ايگەرىم قابىلتاەۆا ءوڭىردىڭ يندۋستريالىق جۇكتەمەسى جوعارى بولعانىنا قاراماستان, قولجەتىمدى ەڭ وزىق تەحنيكالاردى ەنگىزۋ جانە ەكولوگيالىق شارالاردى جۇزەگە اسىرۋ ناتيجەسىندە اۋاعا شىعارىلاتىن زياندى زاتتاردىڭ كولەمى بىرتىندەپ ازايىپ كەلە جاتقانىن جەتكىزدى.
بۇل رەتتە پاۆلودار وبلىسىنىڭ مامانداندىرىلعان تابيعات قورعاۋ پروكۋرورى ەرلان سالحانوۆ قابىلدانعان شارالار ناتيجەسىندە تابيعاتتى پايدالانۋ سالاسىنداعى قۇقىقبۇزۋشىلىقتاردىڭ جولى كەسىلگەنىن, سۋ جانە ورمان رەسۋرستارىن قورعاۋ كۇشەيتىلءىپ, بيۋدجەتكە كەلۋى مۇمكىن ەلەۋلى شىعىندارعا توسقاۋىل قويىلعانىن ايتتى.
دەپۋتاتتار «بىلقىلداق» جيناقتاعىشىنداعى سىناپتى لاستانۋ, رۇقسات ەتىلمەگەن قوقىس ۇيىندىلەرى, پاۆلودار, اقسۋ جانە ەكىباستۇزداعى كارىزدىك تازارتۋ قۇرىلىستارىنىڭ توزۋى, سونداي-اق وبلىس ورتالىعىندا نوسەرلىك-كارىز جۇيەسىنىڭ بولماۋى, سونىڭ سالدارىنان ەرتىس وزەنىنىڭ ۇستىڭگى اعىممەن لاستانۋى ماسەلەلەرىن كوتەردى. بۇل تۇيتكىلدىڭ بارلىعى تۇرعىنداردىڭ دەنساۋلىعىنا, ەكوجۇيەنىڭ تۇراقتىلىعىنا جانە ءوڭىردىڭ الەۋمەتتىك دامۋىنا تىكەلەي اسەر ەتەتىنىنە نازار اۋداردى.
كوميتەت توراعاسى دەپۋتاتتار بيۋدجەت زاڭناماسىنا ارنايى تۇزەتۋ ەنگىزگەنىن, ەندى ەكولوگيالىق زاڭنامانى بۇزعان جەر قويناۋىن پايدالانۋشىلاردان وندىرىلگەن ايىپپۇلدار رەسپۋبليكالىق بيۋدجەتكە ەمەس, جەرگىلىكتى بيۋدجەتكە ءتۇسىپ, تىكەلەي سول ءوڭىردىڭ ەكولوگيالىق جاعدايىن جاقسارتۋعا جۇمسالاتىنىن ەسكە سالدى.
«بۇل وڭىرلەردىڭ ەكولوگيالىق احۋالىن جاقسارتۋعا ناقتى قارجىلىق نەگىز قالىپتاستىراتىن قادام دەپ ەسەپتەيمىن. الدا جىلۋ ەلەكتر ورتالىعىنىڭ ك ۇلىن, مەتاللۋرگيا شلاكتارى مەن شلامدارىن ەكىنشى رەتتىك شيكىزات ەتىپ بەكىتۋ, قۇرىلىس جانە جول كومپانيالارىنىڭ كۇل مەن مەتاللۋرگيا قالدىقتارىن مىندەتتى تۇردە قولدانۋىن قاداعالاۋ, وندىرىستىك قالدىقتاردى قۇرىلىسقا پايدالانۋ ءۇشىن ىنتالاندىرۋ شارالارىن ەنگىزۋ سياقتى مىندەتتەر تۇر. پاۆلودار, اقسۋ جانە ەكىباستۇزداعى توزۋى 83-85 پايىزعا جەتكەن كارىز-تازارتۋ قۇرىلىستارىن جاڭعىرتۋ, زاماناۋي پوليگوندار مەن قايتا وڭدەۋ كەشەندەرىن سالۋ, «بىلقىلداق» لاس سۋلار قويماسىنداعى تاريحي سىناپتى لاستانۋدى جويۋ ءۇشىن الەمدەگى زاماناۋي تەحنولوگيالاردى ەنگىزۋ جۇمىستارىن دا باقىلاۋعا الاتىن بولامىز», دەدى ە.جاڭبىرشين.
كوشپەلى وتىرىس قورىتىندىسى بويىنشا كوميتەت توراعاسى مەملەكەتتىك ورگاندارمەن جانە كاسىپورىندارمەن بۇل باعىتتاعى ءوزارا ءىس-ارەكەتتى جالعاستىرۋعا دايىن ەكەنىن مالىمدەدى. نەگىزگى تۇجىرىمدار مەن ۇسىنىستار ازىرلەنىپ, ۇكىمەتكە جولداناتىن بولادى.
بۇعان دەيىن وڭىرگە ساپارى بارىسىندا دەپۋتاتتار «پاۆلودار-ۆودوكانال» جشس-ءنىڭ كارىز-تازارتۋ قۇرىلىستارىنداعى جانە «بىلقىلداق» جيناعىشىنداعى ەكولوگيالىق جاعدايمەن, سونداي-اق وبلىستىڭ ءىرى كاسىپورىندارى – پاۆلودار مۇناي-حيميا زاۋىتىنىڭ, پاۆلودار اليۋميني زاۋىتىنىڭ جانە قازاقستان ەلەكتروليز زاۋىتىنىڭ جاڭعىرتىلۋىمەن تانىستى.
