قاسىم-جومارت توقاەۆ Cerberus Capital Management كومپانياسىنىڭ ينۆەستيتسيالاردى باسقارۋ سالاسىنداعى جاھاندىق كوشباسشىلىعىن جوعارى باعالاپ, ترانسكاسپي حالىقارالىق كولىك باعىتىن دامىتۋ اياسىنداعى ينفراقۇرىلىمدىق جوبالاردى قارجىلاندىرۋ نيەتىن قۇپتادى.
پرەزيدەنتتىڭ ايتۋىنشا, كومپانيانىڭ ستراتەگياسى قازاقستاننىڭ ۇلتتىق ەكونوميكانى ءارتاراپتاندىرۋ جونىندەگى باسىمدىقتارىنا ساي كەلەدى. ەلىمىز كولىك-لوگيستيكا ينفراقۇرىلىمىن دامىتۋعا ينۆەستيتسيا تارتا وتىرىپ, باعىتتاردىڭ وتكىزۋ مۇمكىندىگىن كەڭەيتۋگە قارقىندى تۇردە كىرىستى.
سونداي-اق مەملەكەت باسشىسى ۆاشينگتوندا ازەربايجان مەن ارمەنيا اراسىنداعى تاريحي كەلىسىمگە قول قويىلۋى ورتا ءدالىزدىڭ ماڭىزدى ساۋدا جولدارىنىڭ ءبىرى رەتىندەگى ماڭىزىنىڭ ارتا تۇسۋىنە وڭ اسەر ەتەتىنىن اتاپ ءوتتى. سوڭعى بەس جىلدا ترانسكاسپي حالىقارالىق كولىك ءدالىزى ارقىلى تاسىمالدانعان جۇك كولەمى التى ەسە ارتتى.
بۇدان بولەك, مەملەكەت باسشىسى كومپانيانىڭ تەحنولوگيالىق پلاتفورما مەن تسيفرلىق ەكوجۇيەنى تاراتۋ سالاسىنداعى اۋقىمدى تاجىريبەسىن اتاپ ءوتىپ, قازاقستانداعى تسيفرلىق باستامالارعا قاتىسۋدى ۇسىندى.
Cerberus Capital Management كومپانياسىنىڭ باس اتقارۋشى ديرەكتورى فرەنك برۋنو ورتا ءدالىزدى دامىتۋ الەۋەتىن جوعارى باعالايتىنىن ايتتى.
«پرەزيدەنت مىرزا, سىزگە جانە وسى جوباعا اتسالىسقان بارشاعا العىس ايتامىن. كومانداڭىزدىڭ كاسىبي دەڭگەيى جوعارى. سونىمەن قاتار ەكونوميكالىق ءوسىمدى قامتاماسىز ەتۋ جونىندەگى جوسپارلارىڭىزدى ەرەكشە اتاپ وتكىم كەلەدى. قازاقستانمەن بىرگە ورتا ءدالىزدى دامىتۋ الەۋەتىن, لوگيستيكا جانە تەلەكوممۋنيكاتسيا سالالارىنداعى مۇمكىندىكتەردى جوعارى باعالايمىز», دەدى ول.
