ءبىلىم جانە عىلىم ءمينيسترى اسلان ءسارىنجىپوۆ ينفورماتيكادان الماتى قالاسىندا وتكەن 27-ءشى حالىقارالىق وليمپيادادا ەل نامىسىن قورعاعان جەتكىنشەكتەردى قابىلدادى. كەزدەسۋ اياسىندا مينيستر 83 ەلدىڭ ىشىنەن 8-ءشى ورىن الۋىمىزدى جوعارى كورسەتكىشكە باعالاپ, جاس ورەندەردى جەتىستىكتەرىمەن قۇتتىقتادى. سونداي-اق, ولاردىڭ ەڭبەكتەرىنە العىس ءبىلدىرىپ, ەستەلىك سىيلىقتار تابىس ەتتى.
جيىن سوڭىنا قاراي باق وكىلدەرىنىڭ ساۋالدارىنا جاۋاپ بەرۋ بارىسىندا مينيستر قازىرگى تاڭدا ەلىمىزدە جۇرگىزىلىپ جاتقان جاڭا وقۋ جىلىنا دايىندىق جايى جوسپارداعىداي جۇرگىزىلىپ جاتقاندىعىنان حاباردار ەتتى. – تامىز ايىندا بۇل ماسەلە قىزۋ تالقىلاناتىندىقتان, ءبىز وسى كۇندەرى سان-سالالى باعىتتار بويىنشا جۇمىستار اتقارۋدامىز. اسىرەسە, ايماقتارمەن بىرلەسە قولعا الىنىپ جاتقان جوسپارلار قوماقتى. اتاپ ايتقاندا, وقۋشىلاردى وقۋلىقپەن قامتۋ ەڭ وزەكتى ماسەلە ەكەنى بەلگىلى. بۇل رەتتە وبلىستىق دەڭگەيدە شەشىلۋى ءتيىس پروبلەمالار ءبىرشاما تياناقتالدى دەسەك بولادى. ءتيىستى قاراجاتتار ءبولىنىپ, كورسەتىلەتىن كومەكتەر ويداعىداي ۇيلەستىرىلدى. ويتكەنى, ءبىز جۇمىستى جۇرگىزۋدىڭ جاڭا ىرعاعىن جىل باسىندا-اق قولعا العانبىز. ياعني, قاجەتتى وقۋلىقتار سانىن ادەتتەگىدەي كۇز تاياعاندا تاپسىرۋدى دوعارىپ, دەرەكتەردى جىلدىڭ العاشقى ايلارىندا جيناۋعا كىرىسكەن بولاتىنبىز. ناتيجەسىندە, كوكتەم سوڭىنا قاراي بارلىق كەلىسىمشارتتار ءتۇزىلىپ, بەكىتىلدى. ال ەندى قازىرگى كەزدە مەملەكەتتىك ساتىپ الۋ ءىسى ۇيىمداستىرىلىپ, كوپتەگەن ءبىلىم وشاقتارىنا قاجەتتى كىتاپتار جەتكىزىلە باستادى. جالپى, كىتاپپەن قامتۋ ۇدەرىسىن باقىلاۋ كوميتەتىنىڭ ايماقتارداعى دەپارتامەنتتەرى ارقىلى ءجىتى نازاردا ۇستاپ وتىرمىز. قازىرگى تاڭدا بىرقاتار وڭىرلەر بۇل ماسەلەنى تۇپكىلىكتى شەشىپ قويدى دەسەك تە بولادى. ناقتىلاي تۇسسەك, ماسەلەن بۇگىندە الماتى قالاسىنىڭ بارلىق مەكتەپتەرىنە وقۋلىقتار تولىق جەتكىزىلدى. سونىمەن قاتار, بۇعان كەرەعار كورسەتكىش رەتىندە قالىس قالعان وبلىستار دا جوق ەمەس. شىعىس قازاقستان جانە وڭتۇستىك قازاقستان وبلىستارىنىڭ كەي اۋداندارىندا وقۋلىق پروبلەماسى ءالى وڭتايلى شەشىمىن تابا قويمادى. ەندىگى جەردە بۇل ماسەلەنى جەرگىلىكتى اتقارۋشى ورگاندارمەن كۇن سايىن حابارلاسىپ, تالقىلاۋ ۇستىندەمىز. ولار بىزگە بارلىق ماسەلەنى 15 تامىزعا دەيىن تۇپكىلىكتى شەشىپ, سوڭعى نۇكتەسىن قوياتىن بولامىز دەپ ۋادە بەرىپ وتىر, – دەدى ۆەدومستۆو باسشىسى. سونىمەن قاتار, ءبىلىم جانە عىلىم مينيسترلىگىنىڭ ماماندارى 18 تامىزدا ۇكىمەت وتىرىسىندا وسى تاقىرىپتا ارنايى ەسەپ بەرەتىندىگى دە بەلگىلى بولدى. – مىنە, سول جەردە تەك كىتاپ جايىن عانا ەمەس, جالپى ءبىلىم بەرۋ ىسىنە قاتىستى بارلىق سۇراقتار قارالادى دەپ جوسپارلانۋدا. ونىڭ ىشىندە مامان ماسەلەسى مەن مەكتەپتەردى جوندەۋ, وقۋلىقپەن قامتۋ, كيىم كيۋ مەن باستاۋىش سىنىپ وقۋشىلارىن تاماقتاندىرۋ جايى سەكىلدى قىزمەتتەردىڭ ءبارى دە تالقىلانادى دەپ كۇتىلۋدە. جالپى ايتار بولساق, ءبىزدىڭ بيىلعى وقۋ جىلىنا دايىندىعىمىز قالىپتى جاعدايدا, جوسپارعا ساي جۇرگىزىلۋدە دەپ نىق سەنىممەن ايتا الامىن, – دەدى اسلان باكەن ۇلى ءوز سوزىندە. نەگىزىندە ءسوز باسىن حالىقارالىق وليمپيادا تاقىرىبىندا باستاعان بولاتىنبىز. كۇن تارتىبىندەگى كۇيىپ تۇرعان ماسەلە بولعاندىقتان, كىتاپتىڭ جايىن كەيىنگە قالدىرا المادىق. ال ەندى باستاپقى اڭگىمەگە ورالساق, قازاقستان ۇلاندارى حالىقارالىق وليمپيادادا تاعى ءبىر ەرلەدى دەسەك تە بولادى. 324 ۇمىتكەر قاتىسقان جارىستا تورتەۋدەن قۇرالعان ءبىزدىڭ توپ «توپ وندىققا» ەندى. ءمينيستردىڭ سوزىمەن ايتساق, «83 ەلدىڭ ىشىنەن 8-ءشى ورىن يەلەنىپ جوعارى كورسەتكىشكە قول جەتكىزدىك». – بۇل ۇلكەن جەتىستىك دەپ باعالاۋعا تۇرارلىق دۇنيە. ويتكەنى, ءبىزدىڭ ەلىمىز العاش رەت وسى جارىستى وزىمىزدە ۇيىمداستىردى جانە شارا اياسىندا ەكى رەكوردتىق كورسەتكىش كورىنىس بەردى. ونىڭ ءبىرىنشىسى – جالپى وسى وليمپيادا تاريحىندا العاش رەت 83 مەملەكەتتىڭ ورەندەرى باق سىناسا, قاتىسۋشىلار سانى جاعىنان دا جوعارى كورسەتكىشكە يە بولدىق. وسى كەزگە دەيىن وتكەن وليمپيادالار وركەنيەتى وق بويى وزىق كەتكەن ەلدەردە ۇيىمداستىرىلعانىمەن, 324 ۇمىتكەر ەشقاشان قاتىسپاعان ەكەن. مىنە, وسىنداي يگىلىكتەر قازاق جەرىندە وتكەن جيىندا جاريا بولۋدا. سونداي-اق, وسى 83 ەلدىڭ ىشىنەن ەلىمىزدىڭ العاشقى سەگىزدىكتىڭ قاتارىنان كورىنۋىن وتە جاقسى جەتىستىك رەتىندە باعالاۋعا بولادى, – دەدى ول. ءبىزدىڭ ەلىمىزدىڭ وسىنداي بيىكتەردەن كورىنۋىنە سەبەپكەر بولعان جەتكىنشەكتەرگە زور العىسىن ءبىلدىرگەن مينيستر وليمپيادا قاتىسۋشىلارىنا قاراپ, ءوز قاتارلاستارى بوي تۇزەيتىندىگىن اتاپ ءوتتى. ايتا كەتەيىك, تمد ەلدەرى ءىشىندە قازاقستان حالىقارالىق وقۋشىلار وليمپياداسىن وتكىزۋ قۇقىعىنا يە بولعان ەكىنشى مەملەكەت. مۇنىڭ الدىندا ينفورماتيكا پانىنەن وليمپيادانى 1990 جىلى بەلورۋسسيا ۇيىمداستىرعان ەدى. كەلەر جىلى بۇل شارا قازان قالاسىندا وتەدى دەپ جوسپارلانۋدا. ال ەندى قازاقستان قۇراماسىنىڭ وكىلدەرىن اتاپ وتسەك, ولار: مەيرامبەك ومىرزاق – قازاق-تۇرىك ليتسەيىنىڭ تۇلەگى (الماتى), بەكجان بەكبولات ۇلى – قازاق-تۇرىك ليتسەيىنىڭ تۇلەگى (اقتاۋ), نازاربەك التىباي – قازاق-تۇرىك ليتسەيىنىڭ 10-سىنىپ وقۋشىسى (اقتوبە) جانە دانيار مامينوۆ – قازاق-تۇرىك ليتسەيىنىڭ تۇلەگى (الماتى).
نۇرلىبەك دوسىباي, جۋرناليست.
