تۇركيادا اپاتقا ۇشىراعان اۆتوبۋستا قازاقستان ازاماتتارى بولعان

استانا. 6 شىلدە. تۇركيادا ءىرى جول اپاتىنا ۇشىراعان تۋريستىك اۆتوبۋستا قازاقستاننىڭ جەتى ازاماتى بولعان. بۇل تۋرالى tengrinews.kz حابارلادى. دەرەككوزدىڭ اقپارى بويىنشا, قازاقستاننىڭ تۇركياداعى كونسۋلدىعىنىڭ قىزمەتكەرلەرى بەس قازاقستاندىقپەن بايلانىس ورناتتى, ولار جول-كولىك وقيعاسىنان جاراقات الىپ, اۋرۋحاناعا تۇسكەن. ولاردىڭ ومىرىنە قاۋىپ ءتونىپ تۇرعان جوق. قازىرگى ۋاقىتتا تاعى ەكى ازامات ىزدەستىرىلىپ جاتىر. وقيعا استانا ۋاقىتى بويىنشا 19.30-دا تۇركيانىڭ وڭتۇستىك باتىسىنداعى دەنيزلي قالاسىندا بولدى. تۋريستەر اۆتوبۋسى پامۋككالەدەن انتالياعا ءجۇرىپ بارا جاتقان. جول-كولىك وقيعاسىنان 4 ادام قازا بولىپ, 38 ادام جاراقات الدى. ريا «نوۆوستي» اگەنتتىگىنىڭ ناقتىلانعان اقپارىنا قاراعاندا, اۆتوبۋستا رەسەيدىڭ, قازاقستاننىڭ, ليتۆانىڭ جانە بەلارۋستىڭ ازاماتتارى بولعان. ايدار ورىسباەۆ. دەرەك: tengrinews.kz. سۋرەت: mynet.com.