كوللاجدى جاساعان زاۋرەش سماعۇل «EQ»
جاڭا ءتاسىلدىڭ ارقاسىندا جول جابىندارىنىڭ جوندەۋارالىق مەرزىمى 20 جىلعا دەيىن ۇزارادى دەپ كۇتىلۋدە. بۇل ەلىمىزدىڭ كۇرت كونتينەنتالدى (قۇبىلمالى) كليمات جاعدايىندا ەرەكشە ماڭىزدى. جاۋىن-قارى ءجيى ءتۇسىپ, جاڭا توسەلگەن جولدى قاھاعان ايازدا قاقىراتا جارىپ, جارىقشاقتار مەن ويىقتاردى تەزدەدەتىن سولتۇستىك ءوڭىر مەن اپتاپ ىستىعى كۇندىز جەر باستىرمايتىن وڭتۇستىككە دە تەڭدەي ءتيىمدى بولادى.
«جاڭا تەحنولوگياعا كوشۋ قاجەتتىلىگى قازىرگى جولداردىڭ جاي-كۇيىمەن بايلانىستى. قوزعالىس كولەمى جىلدان جىلعا ارتىپ, جۇك كولىكتەرىنىڭ اعىمى مەن وستىك جۇكتەمەلەر ۇلعايۋدا. بۇعان قوسا, باستى سىناق, ول – كليمات. قازاقستاندا جازدا اۋا تەمپەراتۋراسى +50°س-قا دەيىن كوتەرىلسە, قىستا - 40°س-قا دەيىن تومەندەيدى. مۇنداي كۇرت ايىرماشىلىق ءداستۇرلى ادىسپەن سالىنعان جابىنداردا جارىقتاردىڭ پايدا بولۋىنا, دەفورماتسياعا جانە قالىڭداۋ ىزدەرىنىڭ تۇزىلۋىنە اكەلەدى. سونىڭ سالدارىنان ءجيى جوندەۋ قاجەت بولىپ, شىعىندار ارتادى» دەدى قازاقستان جول عىلىمي-زەرتتەۋ ينستيتۋتىنىڭ (قازولعزي) ماماندارى.
«Superpave» تەحنولوگياسى وسىنداي سىن-تەگەۋرىندەرگە جاۋاپ بەرەدى. ول كليماتتىق جاعدايلار مەن كولىك اعىنىن ەسكەرىپ, اسفالتبەتون قۇرامىن ىستىقتا دا, قىستىڭ سۋىعىندا دا بەرىكتىگىن ساقتايتىنداي ەتىپ تاڭدايدى. ءادىستى قازاقستاندىق جاعدايعا بەيىمدەۋ جۇمىسىن «قازجولعزي» عالىمدارى جۇرگىزۋدە. 2024 جىلدان وسى جىلدىڭ ماۋسىم ايىنا دەيىن ينستيتۋت ماماندارى 300-دەن استام زەرتحانالىق سىناق وتكىزدى. ناتيجەلەر كورسەتكەندەي, «Superpave» قوسپالارى ىلعالعا, جوعارى تەمپەراتۋراعا جانە قايتالاناتىن جۇكتەمەلەرگە ءتوزىمدى. بۇدان بولەك, پوليمەر-بيتۋمدى بايلانىستىرعىش (پبب) ايماققا سايكەس PG ماركاسىنا ساي بولسا اسفالتبەتون قۇرامىن ىرىكتەۋ مەرزىمى 15 كۇننەن ءتورت كۇنگە دەيىن قىسقارادى. ماماندار بۇل بۇكىل پروتسەستى ايتارلىقتاي جەدەلدەتىپ, تەزدەتەتىنىن اتاپ ءوتتى.
جاڭا تاسىلدەردى زاڭدى تۇردە بەكىتۋ ماقساتىندا وتكەن جىلى قازاقستاندا ءۇش ۇلتتىق ستاندارت قابىلداندى. ال بيىل جىل اياعىنا دەيىن قوسپالاردى جوبالاۋ ەرەجەلەرى مەن بيتۋمداردى PG جۇيەسى بويىنشا جىكتەۋدى قامتيتىن تاعى بىرنەشە قۇجات دايىندالادى دەپ كۇتىلۋدە.
العاشقى سىناقتىق جولدار «الماتى - كوكپەك - كوكتال - قورعاس», «وتار - ۇزىناعاش», «قاپشاعاي - قۇرتى», استانا قالاسىنىڭ كوشەلەرىندە, «استانا - ششۋچينسك» جانە «قىزىلوردا - جەزقازعان» اۆتوموبيل جولدارى تەلىمدەرىندە توسەلدى.
تەحنولوگيانى ەنگىزۋدىڭ جول كارتاسى دا بەكىتىلگەن. وعان سايكەس, كەلەسى جىلى تاعى ءۇش ۋچاسكەدە سىناق جۇرگىزۋ جوسپارلانعان. بارلىق تاجىريبەلىك نىساندارعا مونيتورينگ 2027 جىلدىڭ سوڭىنا دەيىن جۇرگىزىلەدى. ناتيجەسىندە «Superpave» تەحنولوگياسىن تولىق كولەمدە ەنگىزۋ جونىندە قورىتىندى دايىندالماق.
ەلىمىز ءۇشىن بۇل تەحنولوگيانى ەنگىزۋ ستراتەگيالىق ماڭىزعا يە. «Superpave» قاتاڭ كليمات پەن ءوسىپ كەلە جاتقان كولىك جۇكتەمەسىنە توتەپ بەرە الاتىن ساپالى جولدار سالۋعا مۇمكىندىك بەرەدى. ول جوندەۋ شىعىندارىن ازايتىپ, كولىك جۇيەسىنىڭ سەنىمدىلىگىن ارتتىرادى دەگەن سەنىم مول.
