ەلىمىزدىڭ اتوم ەنەرگياسى جونىندەگى اگەنتتىگى مامانداردى دايارلاۋدى جەدەلدەتەدى ءارى بولاشاق اەس قۇرىلىسىنا وتاندىق بيزنەستى تارتادى. بۇگىن اگەنتتىك توراعاسىنىڭ ورىنباسارى ۆاسيلي لاۆرەنوۆتىڭ توراعالىعىمەن ءوندىرىستى لوكاليزاتسيالاۋ مەن كادرلار دايارلاۋ جونىندەگى ۆەدومستۆوارالىق جۇمىس توبىنىڭ العاشقى وتىرىسى ءوتتى.
تالقىلاۋعا مەملەكەتتىك ورگانداردىڭ, «اتامەكەن» ۇكپ-نىڭ, عىلىمي جانە قوعامدىق ۇيىمداردىڭ وكىلدەرى قاتىستى. ولار اەس جوبالارىنا وتاندىق كاسىپورىنداردى تارتۋ, ۇلتتىق ۇلەستى ارتتىرۋعا كەدەرگىلەر, سونداي-اق لوكاليزاتسيانىڭ حالىقارالىق تاجىريبەسى مەن ونى قازاقستاندىق جاعدايعا بەيىمدەۋ ماسەلەلەرىن قاراستىردى.
جەكە ءبولىم كادرلار دايارلاۋعا ارنالدى: جاڭا ءبىلىم بەرۋ باعدارلامالارىن ىسكە قوسۋ, شەتەلدىك جوعارى وقۋ ورىندارىمەن ىنتىماقتاستىقتى كەڭەيتۋ جانە بولاشاق اتوم جوبالارى ءۇشىن كادرلىق رەزەرۆ قۇرۋ.
كەزدەسۋ قورىتىندىسىندا جۇمىس باعىتتارىنىڭ باسىمدىقتارى ايقىندالىپ, جول كارتاسىن ازىرلەۋ كەلىسىلدى. وسىعان سايكەس, كەلەسى وتىرىس قازان ايىنا جوسپارلاندى.
